Pakikikabtang sa Ministeryo Bilang Pamilya
1 An dusay na pamilya na lubos na nakikikabtang sa sagradong paglilingkod—kaiba an ama, ina, asin mga aki na naglilingkod sa Dios nin bilog na kalag—kaomawan sa dakulang ngaran ni Jehova. Naoogma kita na dakol sa siring na mga pamilya an yaon sa mga kongregasyon kan banwaan ni Jehova sa bilog na daga.
2 Siempre, an ama an may enot na paninimbagan na mag-asikaso sa espirituwal na mga pangangaipo kan saiyang pamilya. (1 Cor. 11:3) Paagi sa kooperasyon kan saiyang agom asin mga aki, puedeng magkaigwa nin makosog na impluwensia sa iba an saiyang pamilya. (Mat. 5:16) Ano an nagkapirang kabtang kun saen ikakapaheling an kooperasyon na ini?
3 Nangengenot an mga Magurang: Sa dakol na kamugtakan, an ama tibaad sarong magurang sa kongregasyon o ministeryal na lingkod. Ini nangangahulogan na dagdag pa sa intereses kan saiyang pamilya, an iba kan saiyang panahon asin atension dapat na itao sa mga bagay-bagay sa kongregasyon. An paninimbagan kan ama iyo na seguradohon na pagbarangaon an yaon na panahon. Ini tibaad bakong pirmeng pasil huli sa mga pangangaipo na maninigong asikasohon sa saiyang limitadong panahon. Alagad huling an pamilya nia an saiyang pangenot na paninimbagan, maninigo niang regular na iiskedyul an iba sa panahon nia na makaibanan an saiyang pamilya sa pag-adal, sa paglilingkod sa langtad, sa mga pagtiripon, asin sa angay na pag-aling-aling. Huli sa mga kamugtakan tibaad may beses na maliwat an iskedyul kan ama, alagad kapakipakinabang nanggad kun makakaiba nia an mga miembro kan saiyang pamilya kada semana sa paglilingkod sa langtad!
4 Mahalagang marhay an kooperasyon kan agom na babae. Sia puedeng magin kakomplemento kan saiyang agom sa pinakamahalagang paagi na pagtabang sa pagsasanay kan mga aki sa ministeryo. An saiyang arogan na kaigotan asin debosyon dakula an magigibo tangani na maimpluwensiahan an mga aki na tumalubo sa saindang pagpapahalaga sa ministeryo. Girumdomon kun paano an ina ni Timoteo na si Eunice asin an saiyang lola na si Loida sinanay si Timoteo “poon sa pagkaomboy” sa “banal na mga kasuratan,” sa ibong kan bagay na an ama ni Timoteo daing pagtubod. (2 Tim. 3:14, 15) Posible na ini nagkaipo nin dakulang pagtubod, paghihingoa, asin pagsakripisyo kan sadiri. Alagad binalosan ini kan si Timoteo umoswag sa espirituwal asin nagin maigot na misyonero.—Fil. 2:19-22.
5 Igwa nin dakol na kaagid na halimbawa ngonyan kun saen an sarong may pagtubod na magurang ginigibo an espirituwal na paninimbagan asin mapangganang sinasanay an mga aki sa ministeryo. Huli sa marahayon na halimbawa kan saindang ina o ama, dakol na hoben an marigon na nanindogan para sa katotoohan asin, arog ni Timoteo, nagkakamit nin dakol na pribilehio sa bilog na panahon na ministeryo.
6 Iyo, kaipuhan an halimbawa nin mga magurang tangani na itadom sa mga aki an halaga kan pagkaigwa nin marahay na iskedyul para sa regular na pakikikabtang sa ministeryo. Kaipuhan nin mga magurang na mag-establisar nin daing liwat-liwat na semanal na rutina para sa paglilingkod asin magdanay dian, tanganing maaraman kan mga aki kun anong kabtang kan semana an pirmeng nakatagama para sa paghuhulit.
7 Paninimbagan kan mga Aki: Kumusta man an paninimbagan kan mga aki? Dawa an sangkap na Aki nin Dios, si Jesus, mantang sadang pa, nagpasakop sa paggiya asin pagtotokdo kan saiyang mga magurang. (Luc. 2:51) Kun siring, kun iinaareglo kan ama asin ina na an pamilya mag-iribanan sa ministeryo, obligasyon kan mga aki na ipaheling an saindang diosnon na debosyon paagi sa pakikikooperar sa saindang mga magurang.—Efe. 6:1-3.
8 An iribang pagsamba bilang pamilya—pag-adal, pakikikabtang sa ministeryo sa langtad, asin pag-atender sa mga pagtiripon—nagpapakosog kan bogkos nin pagkamoot asin pagkasararo sa pamilya. An mga magurang sagkod mga aki igwa nin paninimbagan mapadapit digdi.