‘Maghinanyog Asin Maglaog sa Isip nin Dagdag na Tokdo’

¹ Sa nagdadangadang na mga pandistritong kombension, dakol na panahon asin paghihingoa an ginamit tanganing andamon an sarong programa na tinatawan nin atension an mga pangangaipo kan pambilog na kinaban na kasararoan nin magturugang. Kun iaaplikar, an itinataong espirituwal na pagtotokdo makakatabang sa sato na mapagdanay an marahay na relasyon ki Jehova. Tunay nanggad, may marahay na dahelan kita na ‘maghinanyog asin maglaog sa isip nin dagdag na tokdo.’—⁠Tal. 1:5.

² Andamon an Saindong Puso: ‘Inandam ni Esdras an saiyang puso na konsultahon an ley ni Jehova asin gibohon iyan.’ (Esd. 7:10) Paano niato aandamon an satong puso tanganing maako an pagtotokdo na itinatao ni Jehova? Kun nakua na nindo an saindong imprentadong programa sa kombension, repasohon an mga titulo kan manlaenlaen na kabtang na nakalista asin hapoton an saindong sadiri: ‘Ano an sinasabi sa sako ni Jehova paagi sa programang ini? Paano ko magagamit an impormasyon tanganing makinabang ako asin an sakong pamilya?’ (Isa. 30:21; Efe. 5:17) Padagos na ihapot an mga iyan sa bilog na kombension.

³ Maghinanyog Asin Maghorophorop: Inomaw ni Jesus si Maria huli sa pagtao nin dai nababangang atension sa saiyang mga tataramon, na sinasabi: “Pinili ni Maria an marahay na kabtang, asin iyan dai hahaleon sa saiya.” (Luc. 10:39, 42) Kun kita igwa kan kaparehong aktitud, dai niato totogotan na madisturbo kita kan daing halagang mga bagay. Mientras na may programa, iyan an “panahon na dai maggirong” asin maghinanyog. (Ecl. 3:7) Maninigo na seguradohon niato na kita nakatukaw asin atento durante kan bilog na programa. Ano an makakatabang sa sato na labanan an tendensia na maglagawlagaw an isip? Papagdanayon na nakaheling kamo sa nagpapahayag. Sundan sa saindong Biblia kun may binabasang mga teksto asin papagdanayon na nakabukas an Biblia nindo mantang tinotokar an mga iyan.

⁴ Kun kita naghihinanyog sa mga pahayag, marahay na magsurat nin haralipot na nota tanganing tabangan kita na magkonsentrar. Maninigo niatong ikonektar an satong nadadangog sa dati na niatong aram. Makakatabang ini sa sato na masabotan asin matandaan an materyales. Dangan kada banggi, bago magtorog, taano ta dai repasohon an saindong mga nota asin analisaron kun gurano nindo kaingat na sinususog an paagi nin pamumuhay ni Jehova.—⁠Tal. 4:10-13.

⁵ Iaplikar an Saindong Nanonodan: Mantang an programa daing duda na magigin nakakaparigon sa boot nindo asin kan saindong pamilya, bakong igo para sa sato na humale sana na nakakamateng naparigon asin nare­preskohan. Sinabi ni Jesus: “Kun aram nindo an mga bagay na ini, maogma kamo kun gibohon nindo iyan.” (Juan 13:17) Dapat niatong mahigos na iaplikar an mga punto na personal na aplikado sa sato. (Fil. 4:9) Ini an liabe sa ‘paglaog sa isip nin dagdag na tokdo.’