Hapot

◼ Tama daw na mag-areglo nin pagpabakal nin mga gamit na segunda mano o iba pang mga aktibidad para sa pagtipon nin pondo tangani na makatabang sa kongregasyon?

Napagkatodan na kan relihiosong mga organisasyon na mag-isponsor nin mga aktibidad para sa pagtipon nin pondo, arog baga nin pormal na mga bangkete, pagpapabakal, o piesta. Minsan ngani tibaad naniniwala an nagkapira na ini para sa marahay na katuyohan, an totoo an mga aktibidad na iyan mga paagi nin paghagad. An Mga Saksi ni Jehova dai naghahagad nin pinansial na suporta sa paaging iyan.

Ini an sinabi kan ikaduwang isyu kan Watch Tower na Agosto 1879, manongod sa satong pagsayuma na arogon an mga iglesia asin maghagad nin pondo: “Kami nagtutubod na an nagsusuportar sa ‘Zion’s Watch Tower’ iyo si JEHOVA, asin mantang ini an kamugtakan iyan dai noarin man makikilimos ni makikimaherak sa mga tawo sa paghagad nin suporta. Kun Sia na nagsasabi: ‘An gabos na bulawan asin plata sa kabukidan sadiri ko,’ dai na makatao kan kinakaipuhan na pondo, sasaboton mi na iyan na an panahon na ipondo an pagpublikar.”

Padagos niatong sinusunod an prinsipyo sa Kasuratan na: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Cor. 9:7) Igwa nin mga kahon sa kontribusyon sa Kingdom Hall tangani na an mga indibiduwal boluntad na makapagdonar kun boot ninda. (2 Ha. 12:9) Dai hinahagad an mga kontribusyon; ni itinatao man iyan na an katuyohan makakua nin balos.