‘Gumibo kan Marahay sa Gabos’
1 Sa An Satong Ministeryo sa Kahadean na isyu kan Marso 2006, inenkaminar kita na gumibo nin dugang pang paghihingoa na tabangan an mga interesado na umatender sa Memorial, na ginagamit an bagong imbitasyon sa Memorial. Bilang resulta, daing duda na dakol na bagohan asin inaktibo an nag-atender sa selebrasyon. Ngonyan, “mantang igwa kita nin marahayrahay na panahon para kaiyan, [padagos na] gumibo kita kan marahay sa gabos.”—Gal. 6:10.
2 Imbitaran Sinda na Umatender Giraray: Sa Pilipinas, labing 300,000 katawo na bakong mga parahayag kan maogmang bareta an nag-aatender sa Memorial kada taon. Ano an dapat niatong gibohon tangani na mapahiro an mga “may tamang tendensia sa buhay na daing katapusan” na magin “mga paratubod”? (Gibo 13:48) Sa pinakamadaling panahon na mapupuede, enkaminaron sinda na umatender nin regular sa mga pagtiripon kan kongregasyon.
3 Taano ta dai imbitaran an sarong interesado na umatender sa Pag-adal sa Libro kan Kongregasyon tangani na ikaogma nia an interesanteng pag-orolay sa libro nin Kapahayagan? Kun kamo sarong paryente o kamidbid kan tawong iyan asin nakaiskedyul kamong magtao nin nagdadangadang na pahayag sa Teokratikong Paadalan sa Pagmiministro, puede nindong imbitaran an sarong iyan na umatender asin maghinanyog sa saindong kabtang. Pirmeng ipaisi sa saiya an titulo kan mga pampublikong pahayag na itatao sa maabot na mga semana. (Maninigong ipaskil an bagong iskedyul sa information board.) Asin siempre, kun dai pa sia nakikipag-adal sa Biblia sa sarong parahayag, puede nindong maboot na alokan sia nin pag-adal.
4 Padagos na Enkaminaron an Inaktibo: An dakol sa mga nag-atender sa Memorial nagdusay na ki Jehova. Minsan siring, nag-abot an panahon na sinda uminontok sa aktibong paghuhulit kan maogmang bareta. Sinadol kita ni Pablo na ‘gumibo kan marahay orog na sa mga may relasyon sa sato sa pagtubod.’ (Gal. 6:10) Huli kaini, an mga inaktibo maninigong pangenot na pahelingan niato nin interes.
5 Tibaad an nagkapira nagsimbag na sa pag-enkaminar kan kamagurangan na makikabtang giraray sa ministeryo. Kun pinakiolayan kamo kan kamagurangan na ibanan an sarong rineaktibar, aram nindo na an pagkamoot mismo nindo ki Jehova asin sa ministeryo sa langtad an mapatalubo kan kompiansa kan sarong iyan. Ipaheling sa saiya kun paano kamo nagpapartisipar sa manlaenlaen na kabtang kan ministeryo tanganing makanompong sia nin kagayagayahan dian asin sa siring maenkaminar sia na magdanay dian saka makaeksperyensia sia nin dakol na bendisyon.
6 Tawan nin Marahay na Pagpoon an Bagohan na mga Parahayag: Kun an saro na inaadalan nindo sa Biblia aprobado na ngonyan na pumoon sa pakikikabtang sa paglilingkod sa langtad, tabangan sia na magkaigwa nin marahay na pagpoon. Tabangan sia na pataluboon an kaugalean sa pag-andam para sa asin pakikikabtang nin regular sa ministeryo sa langtad kada semana.
7 Kun aki mismo nindo an nagin bagong dai pa bautisadong parahayag, tabangan sia na umoswag oyon sa saiyang edad asin abilidad. Paagi sa dikit na tabang nindo, tibaad masorpresa nia kamo kun gurano sia karahay na makipag-olay sa sarong tawo, magbasa sa Biblia, asin mag-alok nin mga babasahon. Kun makanompong sia nin interesado sa paglilingkod sa langtad, sanayon sia sa pagdalaw liwat asin pagkultibar kan interes.
8 Pahiwason an Saindo Mismong Ministeryo: Nagtotogot daw an mga kamugtakan nindo na dagdagan an saindong pakikikabtang sa pag-ebanghelyo dawa nakalihis na an mga bulan nin Abril asin Mayo? Kun ikinakaogma nindo an pag-auxiliary payunir ngonyan na bulan, napag-isip-isip na daw nindo an posibilidad na ipagpadagos ini nin regular, o tibaad maglaog pa ngani sa paglilingkod bilang regular payunir? Girumdomon na mientras na dakol na oras an ginagamit niato sa ministeryo, dakol man an matatabangan niato na akoon an katotoohan. (Gibo 8:26-39) Mantang inaasahan niato an mga aldaw na maabot, “danay na hanapon [niato] an karahayan kan lambang saro asin kan gabos na iba pa.”—1 Tes. 5:15.