Sarong Patotoo sa Pagtubod!
1. Anong nakakapurisaw na mga pangyayari an ihinula ni Jesus?
1 Odok na naghinanyog an mga apostol mantang nagtataram si Jesus manongod sa saiyang presensia asin sa pagtatapos kan sistema nin mga bagay. Maeeksperyensiahan nin katawohan an nakakapurisaw na mga pangyayari—mga guerra, kakulangan nin kakanon, linog, peste. Sunod, sinabi ni Jesus na an saiyang mga parasunod ikakaongis, dadarahon sa kahorasaan, asin gagadanon. Malataw an falsong mga propeta asin ilalagalag ninda an dakol. Magigin malipot an pagkamoot nin dakol.
2. Taano ta pambihira na ikinakahulit sa bilog na kinaban an maogmang bareta?
2 Sa kamugtakan na iyan, siertong nakabigla sa mga apostol kan sabihon ni Jesus kaidto na an maogmang bareta kan Kahadean nin Dios ihuhulit sa bilog na ineerokan na daga. (Mat. 24:3-14) Ngonyan naheheling niato an pambihirang kaotoban kan nakakaogmang hula na iyan. Minsan ngani nabubuhay kita sa peligrosong mga panahon, maigot na ibinabalangibog kan Mga Saksi ni Jehova an maogmang bareta. Mantang an pagkamoot kan kinaban naglilipot, an satong pagkamoot naglalaad nin orog pa kaliwanag. Minsan ngani ikinakaongis kan “gabos na nasyon,” naghuhulit kita sa haros lambang nasyon.
3. Anong nakakaparigon sa boot na mga bilang an naheheling nindo sa pambilog na kinaban na report?
3 Nakakaparigon nanggad sa boot na repasohon an aktibidad kan Mga Saksi ni Jehova durante kan nakaaging taon nin paglilingkod siring kan ipinapaheling sa tsart sa pahina 3 sagkod 6! Sa laog nin 16 na sunod-sunod na taon, labing sarong bilyon na oras an ginamit sa paghuhulit asin paggibo nin mga disipulo. Patotoo nanggad iyan na sinda may makosogon na pagtubod! May mga pag-oswag na 5.8 porsiento sa bilang nin mga payunir, 3.1 porsiento sa mga parahayag, asin 4.4 porsiento sa mga pag-adal sa Biblia. An bilang nin mga nabautismohan mas halangkaw nin 20.1 porsiento kisa kan nakaaging taon nin paglilingkod. Nakakapukaw sa boot na maheling na haros pitong milyon katawo an maimbod na naglilingkod ki Jehova—mas dakol ngonyan kisa kasuarin man sa kasaysayan nin tawo! Mantang sinisiyasat nindo an tsart, ano an naheheling nindo na nangorognang nakakaparigon sa boot nindo?
4. Anong mga problema an napangganahan nin sarong lalaki mantang naghihingoa siang makualipikar sa bautismo?
4 Minsan ngani makangangalas an mismong mga bilang na iyan, maninigo na nungka niatong lingawan na iyan nangangahulogan nin mga tawo na pinatunayan an saindang pagtubod. Isip-isipa an sarong halimbawa. Nagdakula si Guillermo sa Bolivia. Namundag kan 1935, nagtrabaho sia sa sarong plantasyon nin coca poon pa kan sia nuebe anyos. Poon pa sa pagkaaki, nagngungutanguta na sia nin dahon nin coca bilang pampaginhawa sa kasakitan nin magabat na pisikal na trabaho. Paghaloyhaloy sia nagpalabilabi sa inomon na de alkohol asin nanigarilyo. Mantang nagpoon na siang makanood manongod sa hinahagad sa saiya ni Jehova, si Guillermo nagpondo sa paninigarilyo dangan sa pagpalabilabi sa inomon na de alkohol. An pinakadepisil iyo an pagpondo sa bilog na buhay na pagparangutanguta nin dahon nin coca. Namibi sia nin daing ontok asin napangganahan nia an bisyong ini. Huling nadaog na nia an saiyang mga bisyo, sia nabautismohan. “Ngonyan,” an sabi nia, “an pagmate ko malinig ako asin ogmahon ako.”
5. Ano an saindong kamawotan?
5 Talagang interesado si Jehova sa mga tawo. Kamawotan nia na an gabos makapagsolsol. (2 Ped. 3:9) Iyan man an satong kamawotan. Logod na pahiroon kita kan satong puso na gibohon an gabos na makakaya niato sa padagos na pagtabang sa mga sadiosan an puso na mamidbid asin mamotan si Jehova arog niato.