Pagtao na Nagtataong Onra ki Jehova

¹ Sa Talinhaga 3:9, nagtao nin instruksion si Hadeng Salomon: “Tawan mo nin onra si Jehova paagi sa saimong mahahalagang bagay asin paagi sa enot na mga bunga kan gabos mong inani.” Sa suanoy na Israel, kahagadan kan Ley na an dies porsiento kan saindang ani itagama sa pagtao nin onra ki Jehova. Kumusta man an mga Kristiano? Minasimbag si apostol Pablo sa 2 Corinto 9:7, “Gibohon kan lambang saro an oyon sa napagdesisyonan nia sa saiyang puso, na bakong maraot sa boot o napipiritan, huli ta an Dios namomoot sa maogmang paratao.”

² An “maogmang paratao” boluntaryong nagtatao, na dai “napipiritan.” An nagmomotibar sa saiya na magtao iyo an pagmawot nia na magtaong onra ki Jehova asin magpaheling nin pagpahalaga sa gabos na ginigibo nia para sa sato. Minsan ngani dai napipiritan na magtao, an nagdusay na Kristiano nakakamate nin obligasyon na ipaheling an rarom kan pagkamoot asin pagpahalaga nia ki Jehova asin sa saiyang mga tugang. (1 Juan 4:11) Dakol sa satong mga tugang an nagpaheling nin siring na pagkamatinao paagi sa pagsuportar sa pagtogdok nin mga Kingdom Hall, na nagpapagin posible na digdi sana sa Pilipinas ginatos na Kingdom Hall na an ikinatogdok.

³ Kaipuhan an Pag-atang: Sa Ley ni Moises, an gabos na Israelita, baga man mayaman o dukha, kaipuhan na regular na mag-atang ki Jehova, minsan ngani an halaga kan dolot magkakalaen oyon sa pinansial na kakayahan kan nagdodolot. Ipinaheling ni Jesus na kakaipuhanon man nin sarong Kristiano na ‘paindahan an saiyang sadiri’ asin magsakripisyo tanganing matawan nin onra si Jehova. (Mat. 16:24) Kaiba digdi an paglimitar sa personal na mga kaginhawahan asin materyal na mga rogaring tanganing magamit an mahahalagang bagay nin sarong tawo sa sagradong paglilingkod tanganing makatabang sa iba. Naghatol si Pablo: “Dai nindo paglingawan . . . an paghiras nin mga bagay sa iba, huli ta sa siring na mga atang naoogmang gayo an Dios.”—Heb. 13:16.

⁴ Paano niato magigibo an siring na ‘maogmang pagtao’ mapadapit sa programa na pagtogdok nin mga Kingdom Hall? Pag-olayan niato kun paano ini magigibo sa (1) mga kongregasyon na dai kaiba sa presenteng programa na pagtogdok nin mga Kingdom Hall, (2) mga may utang pa para sa Kingdom Hall, asin (3) mga naggagamit nin bagong togdok na mga Kingdom Hall na sadiri kan sangang opisina.

⁵ Mga Kongregasyon na Dai Kaiba sa Programa na Pagtogdok nin mga Kingdom Hall: Tibaad an saindong kongregasyon may sadiring Kingdom Hall na dai kaiba sa presenteng programa na pagtogdok nin mga Kingdom Hall. Kun siring kaini, paano kamo makakatabang na suportaran an programang iyan? Kasuarin pa sana, may itinaong instruksion na magbugtak nin suway na kahon sa kontribusyon na may markang “Kingdom Hall Construction Worldwide.” An ano man na kontribusyon sa kahon na ini makakasuportar sa pagtogdok nin mga Kingdom Hall sa iba pang kongregasyon, bako sanang sa sato. Kaoyon ini kan mga tataramon ni Pablo: ‘Nagririsa, bakong sa personal na interes sa sadiri sana niatong mga bagay-bagay, kundi siring man sa personal na interes sa mga bagay-bagay kan iba.’—Fil. 2:4.

⁶ Minsan ngani an mga indibiduwal puedeng maghulog nin mga kontribusyon sa kahon na ini, inaprobaran paagi sa resolusyon nin nagkapirang kongregasyon, pati na nin nagkapirang nagbabayad nin utang para sa Kingdom Hall, na magpadara nin espesipikong kantidad kada bulan hale sa pondo kan kongregasyon tanganing suportaran an pagtogdok nin mga Kingdom Hall sa bilog na kinaban. Sa siring na kamugtakan, an bulanan na kantidad na napagdesisyonan idadagdag sa ano man na donasyon na ihinuhulog sa kahon na may markang “Kingdom Hall Construction Worldwide” kun ipapadara na iyan sa sangang opisina.

⁷ Mga Kongregasyon na May Utang Pa: Ipinapaheling kan samong mga rekord na labing 700 na kongregasyon sa Pilipinas an may utang pa para sa Kingdom Hall. Paano makakatabang an mga kongregasyon na ini sa pagtogdok nin mga Kingdom Hall? An sarong paagi iyo an pagigin mahigos sa pagbayad kan kantidad na napagdesisyonan nindang ipadara sa sangang opisina kada bulan. Ipinapaheling kan samong mga rekord na, sa promedyo, an ipinapadara nin mga may utang sa sangang opisina mayo pang kabanga kan ipinanuga nindang ibabayad kada bulan. Sa siring, kun ikakapadara kan mga ini an bilog na kantidad na napagdesisyonan, madodoble kaiyan an pondong magagamit sa pagtogdok nin mga Kingdom Hall para sa ibang mga kongregasyon na nangangaipo kaiyan. An mga parahayag na gustong magkontribwir para sa katuyohan na ini mahulog kan saindang mga kontribusyon sa kahon na may markang “Local Congregation Expenses.” Dangan sa katapusan kan bulan, ipapadara kan kamagurangan sa sangang opisina an total na napagdesisyonan na kantidad bilang bayad sa utang ninda para sa Kingdom Hall.

⁸ Mga Kongregasyon na Naggagamit nin mga Kingdom Hall na Sadiri kan Sangang Opisina: Labing 600 na kongregasyon na ngonyan an nagtitiripon sa mga Kingdom Hall na itinogdok paagi sa bagong programa na pagtogdok nin mga Kingdom Hall. An lambang saro sa mga kongregasyon na ini naggibo nin resolusyon na magpadara nin espesipikong kantidad kada bulan bilang boluntad na kontribusyon ninda. Ano an nagpahiro sa sainda na magtao nin siring na kontribusyon? Iyan huli ta minimidbid ninda na dakol na tugang an nagsakripisyo na magkontribwir sa pondo para sa Pagtogdok nin mga Kingdom Hall tanganing magkaigwa sinda nin bagong Kingdom Hall. Ngonyan na may bagong hall na sinda, gusto man nindang tabangan an iba na mayo pa kaiyan. Sa paggibo kaini sinusunod ninda an ipinasabong na sadol: “An lambang saro padagos na maghanap, bakong kan saiyang sadiring karahayan, kundi kan sa ibang tawo.”—1 Cor. 10:24.

⁹ Kaomaw-omaw na dakol sa mga kongregasyon na ini an nagpapadara kan bilog na napagdesisyonan na kantidad kada bulan, mantang may pira na nagpapadara nin mas dakol pa ngani. Pero dakol an dai nagpapadara kan bilog na kantidad na saindang napagdesisyonan, tibaad huli ta an nagkapirang parahayag dai nagkontribwir kan kantidad na orihinal na sinabi nindang itatao ninda. Minsan ngani an lambang saro an ‘nagdesisyon sa saiyang puso’ kan kantidad na itatao nia, iyan panuga ki Jehova asin kabtang kan dolot niato sa saiya. (2 Cor. 9:7) Huli kaini, an maimbod na pagtao kan kantidad na ini kabtang kan satong pagsamba kaya iyan maninigo na eksklusibong itagama para sa katuyohan na ini. Ini an idinagka ni apostol Pablo na gibohon kan sia magsabi, sa 1 Corinto 16:2: “Sa kada enot na aldaw kan semana an lambang saro sa saindo sa saiyang sadiring harong magtagama na sono sa saiyang nakukua.” Naheling nin dakol na tugang na marahay na “magtagama” kan siring na ipinanugang mga kontribusyon paagi sa pagbugtak kaiyan sa suway na sobre tanganing dai iyan magamit sa ano man na iba pang katuyohan.

¹⁰ Dakol na kongregasyon an duminakula na poon kan enot sindang maggibo nin resolusyon na magkontribwir para sa paggamit kan Kingdom Hall ninda. Huli kaini, isinusuherir kan Namamahalang Grupo na kada taon, maninigong repasohon kan kamagurangan an resolusyon na ginibo asin helingon kun puedeng dugangan iyan. An bulan nin Enero 2009 marahay na oportunidad na repasohon ini, na sinasabi sa mga parahayag na isurat sa sarong papel kun gurano an sa pagmate ninda ikakakontribwir ninda kada bulan huli sa pagpahalaga sa saindang Kingdom Hall. Dai malaag nin ngaran sa papel. Dangan tibaad booton kan kamagurangan na magpresentar nin bagong resolusyon na aaprobaran kan bilog na kongregasyon. Kun nagibo na an sarong bagong resolusyon, maninigong magpadara an kamagurangan nin kopya kaiyan sa sangang opisina tanganing salidahan an dati.

¹¹ Aram niamo na inaarog nin dakol sa saindo an mga kongregasyon sa Macedonia kan enot na siglo na sa ibong nin “grabeng kadukhaan pinaabunda an . . . saindang pagigin buka an palad. Huli ta ini sono sa talagang kakayahan ninda, iyo, nagpapatotoo ako, labi pa sa talagang kakayahan ninda, mantang sinda sa sadiri nindang kagustohan padagos na nakimaherak sa samo . . . para sa pribilehio na maboot na pagtao.” (2 Cor. 8:1-4) Logod na ipaheling niato gabos an iyo man sanang espiritung iyan kan mga taga Macedonia mantang buka an palad na nakikikabtang kita sa pagtao na nagtataong onra ki Jehova!