Magin Lubos na Andam Para sa Memorial

Para sa mga parasunod ni Cristo, saro nanggad na kagayagayahan asin pribilehio na lubos na mag-andam para sa banggi nin paggirumdom niato sa kagadanan ni Jesu-Cristo! (Luc. 22:19) Anong praktikal na mga lakdang an maninigong gibohon tanganing makapag-andam para sa Memorial?

◼ Oras Asin Lugar: Maninigo na aram kan gabos an oras asin eksaktong lugar na seselebraron an Memorial. Kun labi sa sarong kongregasyon an magamit sa sarong Kingdom Hall, mahalaga na mag-abot na nasa oras asin maghale na areglado, huling limitado an oras kan mga pag-oltanan nin lambang pagtiripon. Maninigo na maghingoa na malikayan an dai kinakaipuhan na pagsurusoan sa may pinto, sa mga gilid nin tinampo, asin sa paradahan.

◼ Mga Imbitasyon: An gabos daw na parahayag may mga imbitasyon na, asin pamilyar daw sinda sa laog kaiyan? Nagpraktis na daw kamo kun paano nindo itatao an imbitasyon na ini? Sairisay an tatawan nindo nin imbitasyon? Maninigo na maghingoa tanganing ikatao an gabos na imbitasyon.

◼ Malulunadan: An nagkapirang interesado saka mga tugang tibaad nangangaipo nin malulunadan o iba pang personal na tabang. Anong mga areglo an ginibo tanganing asikasohon an saindang mga pangangaipo?

◼ Mga Emblema: Seguradohon na an mga emblema dai ililibot sagkod na dai pa minasolnop an saldang. Maninigong gumibo nin mga areglo na serbihan nin emblema an siisay man sa mga linahidan na maluya an hawak asin dai kayang umatender. Maninigo na igwa na asin andamon na antes pa an tamang klase nin tinapay asin arak na gagamiton.​—Helingon an Torrengbantayan na Pebrero 15, 2003, pahina 14-15, parapo 14, 17.

◼ Kingdom Hall: Maninigong linigan nang marhay antes pa an hall. Maninigo na darahon na sa hall asin areglaron na antes pa an mga plato, kopa o baso nin arak, saka angay na lamesa asin mantel. Kun gagamiton an ibang lugar na tiriponan, seguradohon na magkaigwa nin tamang sound system tanganing an ispiker madangog kan gabos na maatender. An mga attendant saka maserbi kan mga emblema maninigong pilion asin tawan nin instruksion antes pa manongod sa saindang mga obligasyon, sa tamang prosedimiento na dapat sunodon, saka sa pangangaipo na maggubing asin magpakarhay sa sadiri sa may dignidad na paagi.

Sa pinakaimportanteng okasyon na ini, an Memorial kan kagadanan ni Jesu-Cristo, gusto niatong magin lubos na andam bilang mga indibiduwal, asin bilang sarong kongregasyon. Tunay nanggad, an mayaman na bendisyon ni Jehova makakamtan kan gabos na nagpapaheling kan saindang odok sa pusong pagpapahalaga sa gabos na itinatao ni Jehova sa katawohan paagi sa atang kan saiyang namomotan na Aki, si Jesu-Cristo.