“Madia Magin Parasunod Taka”
1. Anong oportunidad an itatao sa sato kan Pag-adal sa Biblia kan Kongregasyon sa maabot na mga bulan?
1 An apat na pagkasaysay sa Ebanghelyo kan buhay ni Jesus sa daga nagtatao nin detalyadong impormasyon dapit sa Aki nin Dios. Huling kaipuhan nin mga Kristiano na ‘sunodon nin estrikto an saiyang mga lakad,’ bobooton niatong mag-andam na marhay asin magtao nin maingat na atension mantang pinag-oolayan niato an librong “Madia Magin Parasunod Taka” sa Pag-adal sa Biblia kan Kongregasyon na mapoon sa semana nin Marso 1. (1 Ped. 2:21; Mar. 10:21) Maninigo sa espesyal na atension niato an mga aspekto kan buhay ni Jesus na makakaparigon sa sato sa ministeryo.
2. Paano kita makikinabang sa halimbawa nin pakatagal ni Jesus?
2 Halimbawa na Ipinaheling ni Jesus: Nakaeksperyensia na daw kamo nin negatibong reaksion mantang naghuhulit sa harong-harong? Kun napapaatubang kita sa siring na reaksion, narerealisar niato na totoo an mga tataramon ni Jesus: “Kun ako pinersegir ninda, kamo pepersegiron man ninda.” (Juan 15:20) Totoo, bakong gabos na negatibong reaksion nangangahulogan nin pagpersegir. Minsan siring, an kagayagayahan na ibinugtak sa atubangan nia an nakatabang ki Jesus na matagalan an gabos na klase nin pagbalo asin kasakitan. Puede man kitang magkonsentrar sa pagkamit kan pag-oyon ni Jehova asin kan balos sa satong kaimbodan. Makakatabang ini sa sato na dai ‘mapagal asin mangluya an satong kalag.’ (Heb. 12:2, 3; Tal. 27:11) Mantang nagmamaigot kita sa ministeryo, makakasarig man kita sa suporta ni Cristo Jesus.—Mat. 28:20.
3. Paano niato maaarog an pagmansay ni Jesus sa ministeryo?
3 “Dahel Kaini Ako Isinugo”: An paghuhulit kan Kahadean iyo an pangenot sa buhay ni Jesus. (Luc. 4:43) Dakol na panahon asin kosog an itinao nia sa ministeryo. Minansay nia na apuradong gibohon iyan asin pirme siang naghahanap nin mga oportunidad na isabi an manongod sa Kahadean. Huling kita mga parasunod ni Jesus, saen kita ginigiyahan kan saiyang mga lakad? Mantang ginigibo niato an satong pangaroaldaw na rutina, may mga tawo daw na puede niatong kaolayon manongod sa maogmang bareta? Logod na an pagkamoot ni Cristo magpahiro sa sato na ipaabot an maogmang bareta sa pinakamahiwas na mapupuede!—2 Cor. 5:14.
4. Sa anong mga paagi niato mapapaoswag an kalidad kan satong ministeryo?
4 “Mayo Pa nin Ibang Tawo na Nagtaram nin Arog Kaini”: An mga nagdadangog ki Jesus nagngalas nin labi-labi sa saiyang paagi nin pagtotokdo. (Juan 7:46; Mat. 7:28, 29) Ano an kalaenan nia sa ibang mga paratokdo? Namotan nia an mga katotoohan na itinokdo nia, namotan nia an mga tawong tinokdoan nia, asin naggamit sia nin manlaenlaen na paagi sa pagtotokdo. Paagi sa pag-arog sa Dakulang Paratokdo, mapapaoswag niato an kalidad kan satong ministeryo.—Luc. 6:40.
5. Ano an maninigong magin pasohan niato mantang pinag-aadalan an “Madia Magin Parasunod Taka”?
5 Pira sana ini sa mga kayamanan na ihinayag sa buhay ni Jesus. Anong iba pang mga kayamanan an makukua nindo? Mantang sinisiyasat nindo an buhay ni Jesus sa Pag-adal sa Biblia kan Kongregasyon, magin pasohan nindo na “maaraman an pagkamoot kan Cristo” paagi sa pag-arog sa saiyang mga tataramon asin gibo.—Efe. 3:19.