‘An Maogmang Baretang Ini Ihuhulit’!
1. Paano niato naaaraman na mayo nin ano man na makakapugol sa gibohon na paghuhulit?
1 Mayo nanggad nin ano man na makakapugol ki Jehova sa pag-otob kan saiyang kabotan. (Isa. 14:24) Minsan ngani si Hokom Gedeon asin an saiyang 300 na tawohan garo baga imposibleng manggana tumang sa hukbo nin 135,000 na Midianita, sinabi ni Jehova sa saiya: “Siertong ililigtas mo an Israel hale sa kamot kan Midian. Bako daw na isinusugo taka?” (Hok. 6:14) Anong gibohon sa ngonyan an sinusuportaran ni Jehova? Sinabi ni Jesus: “An maogmang baretang ini kan kahadean ihuhulit sa bilog na ineerokan na daga.” (Mat. 24:14) Mayo nin siisay man na makakapugol sa pagkaotob kan gibohon na ini!
2. Taano ta maaasahan niato na personal kitang tatabangan ni Jehova sa ministeryo?
2 Personal Kitang Tinatabangan ni Jehova: Minsan ngani makapagtitiwala kita na gigibohon ni Jehova na magin mapanggana an saiyang mga Saksi bilang grupo, makakaasa daw kita na personal kitang tatabangan ni Jehova? Kan panahon na nangaipo si apostol Pablo, namatean nia an personal na tabang ni Jehova paagi sa saiyang Aki, si Jesus. (2 Tim. 4:17) Makapagtitiwala kita na bebendisyonan man ni Jehova an satong mga paghihingoa bilang indibiduwal na otobon an saiyang kabotan.—1 Juan 5:14.
3. Sa anong mga kamugtakan kita tinatabangan ni Jehova?
3 Kamo daw haros nauubosan na nin kosog para sa ministeryo huli sa mga kahaditan sa aroaldaw? “Sia nagtatao nin puersa sa napapagal.” (Isa. 40:29-31) Napapaatubang daw kamo sa persekusyon o pagtumang? “Ipasa mo ki Jehova mismo an pagabat sa saimo, asin sia mismo matabang sa saimo.” (Sal. 55:22) Kamo daw kun beses nawawaran nin kompiansa? “Lakaw, asin ako mismo mapapasa kaibanan kan saimong ngoso.” (Ex. 4:11, 12) Kamo daw may mga problema sa salud kaya limitado an nagigibo nindo sa ministeryo? Pinapahalagahan ni Jehova asin puede niang gamiton an saindong bilog na kalag na mga paghihingoa, gurano man iyan kasadit.—1 Cor. 3:6, 9.
4. Ano an epekto sa sato kan pagkaigwa niato nin kompiansa ki Jehova?
4 An kamot ni Jehova “an nakaunat, asin siisay an makakapugol kaiyan?” (Isa. 14:27) Huling may kompiansa na bebendisyonan ni Jehova an satong ministeryo, padagos logod kitang maghulit na daing ontok na “may pagkapusoan paagi sa autoridad ni Jehova.”—Gibo 14:3.