An Kristianong mga Ministro Kaipuhan na Mamibi

1. Ano an kaipuhan tanganing maotob an satong ministeryo?

¹ Dai niato kayang otobon an ministeryo na kita sana. Tinatawan kita ni Jehova nin kosog na gibohon iyan. (Fil. 4:13) Ginagamit nia an saiyang mga anghel tanganing tabangan kita sa paghanap nin mga arog-karnero. (Kap. 14:6, 7) Si Jehova an nagpapatubo sa mga banhi nin katotoohan na satong itinanom asin binaribi. (1 Cor. 3:6, 9) Importante nanggad para sa Kristianong mga ministro na magsarig sa satong langitnon na Ama paagi sa pamibi!

2. Ano an nagkapirang bagay na dapat ipamibi?

² Para sa Satong Sadiri: Maninigo kitang mamibi sa kada beses na kita naghuhulit. (Efe. 6:18) Ano an nagkapirang bagay na dapat ipamibi? Puede kitang mamibi na magin positibo an saboot niato sa satong teritoryo asin na magin pusoan kita. (Gibo 4:29) Puede niatong hagadon ki Jehova na giyahan kita sa mga may tamang kamugtakan nin puso na puede niatong adalan sa Biblia. Kun maghapot an kagharong, puede kitang mamibi nin silensio asin halipot sana na hinahagad ki Jehova na tabangan kitang makasimbag nin tama. (Neh. 2:4) Puede man kitang maghagad nin kadonongan tanganing mapagdanay niatong prioridad an ministeryo. (Sant. 1:5) Dugang pa, naoogma si Jehova kun iiniiba niato sa pamibi an pasasalamat para sa pribilehio na magin mga ministro nia.—Col. 3:15.

3. Paano an pamimibi para sa iba nakakatabang sa gibohon na paghuhulit?

³ Para sa Iba: Maninigo man kitang ‘mamibi para sa lambang saro,’ na sinasambit pa ngani an ngaran kan satong mga kapwa ministro kun angay. (Sant. 5:16; Gibo 12:5) Limitado daw an nagigibo nindo sa paghuhulit huli sa nagluluyang salud? Kun siring, ipamibi an saindong mga kapwa ministro na may marahay na salud. Nungkang menoson an puersa kan saindong mga pamibi para sa sainda! Angay man na ipamibi na an mga autoridad magkaigwa nin paborableng pagmansay sa gibohon na paghuhulit, tanganing “padagos na makapamuhay nin tiwasay asin toninong” an mga tugang niato.—1 Tim. 2:1, 2.

4. Taano ta maninigo kitang magmaigot sa pamimibi?

⁴ Masakit na asignasyon an pagpahayag kan maogmang bareta sa bilog na ineerokan na daga. Kun kita ‘nagmamaigot sa pamimibi,’ maootob niato an gibohon sa tabang ni Jehova.—Roma 12:12.