Puede daw Kamong Makikabtang sa Ministeryo sa mga Aldaw nin Domingo?
1. Ano an manonodan niato sa mga ginibo ni Pablo asin kan kairiba nia sa Filipos?
1 Sabbath kaidto, aldaw na nagpapahingalo an kadaklan na Judio sa Filipos. Si Pablo asin an kairiba nia nagdadalaw sa siudad durante nin saro sa saindang mga pagbiahe sa pagmimisyonero. Mayo man kutanang makritikar sa sainda kun gamiton ninda an aldaw man na iyan para sa angay nanggad na pagpahingalo sa saindang ministeryo. Minsan siring, aram ninda na an mga Judio nagtitiripon sa luwas kan siudad tanganing mamibi, kaya inaprobetsaran ninda an oportunidad na maghulit sa mga ini. Siertong ogmahon si Pablo asin an kairiba nia kan si Lidia maghinanyog asin an bilog kaining pamilya mabautismohan! (Gibo 16:13-15) Huling dakol ngonyan an nagpapahingalo kun Domingo, taano ta dai nindo gamiton an kabtang kan aldaw na ini tanganing maghulit sa sainda?
2. Anong mga kadepisilan an pinangganahan kan banwaan ni Jehova tanganing makapaghulit kun Domingo na dai riniribok kan iba?
2 An Pakikipaglaban Para sa Paghuhulit sa Aldaw nin Domingo: Durante kan 1927, dinagka an banwaan ni Jehova na gamiton sa ministeryo an sarong kabtang kan kada Domingo. Ini nagresulta tolos sa pagtumang. Dakol an inarestar sa Estados Unidos huli sa pagbalga kan mga ley dapit sa Domingong Sabbath, pag-istorbo sa katoninongan, asin pagpabakal na mayo nin lisensia. Alagad dai nagpondo an banwaan ni Jehova. Kan dekada nin 1930, nag-organisar sinda nin “mga kampanya nin mga dibisyon,” kun saen an mga parahayag sa magkataraed na kongregasyon matiripon tanganing hulitan an sarong teritoryo. May mga pangyayari na kan arestaron an mga parahayag, kadakol-dakol sinda kaya dai sinda kayang papondohon kan mga autoridad. Talaga daw na pinapahalagahan nindo an ginibong mga pagsasakripisyo kan mga tugang na idto tanganing makapaghulit kita kun Domingo na dai riniribok kan iba?
3. Taano an Domingo ta marahay na aldaw na makikabtang sa ministeryo?
3 Sarong Marahayon na Aldaw Tanganing Maghulit: Dakol na tawo an yaon sa harong hale sa trabaho kun Domingo. Sa parate, sinda mas relaks. An nagkapirang parasimba tibaad mas andam na makipag-olay manongod sa Dios sa aldaw na ini. Kun may pagtiripon kita kun Domingo, nakabado na kita na angay man sa ministeryo, kaya taano ta dai magplano na maglingkod sa langtad bago o pagkatapos kan pagtiripon? Kun kaipuhan, magbalon nin simpleng pagkakan.
4. Anong kagayagayahan an puede niatong maeksperyensiahan kun gagamiton niato sa ministeryo an sarong kabtang nin Domingo?
4 Kun gagamiton niato an sarong kabtang nin Domingo para sa ministeryo, igwa pa man giraray kita nin oras para sa kaipuhan niatong pahingalo. Asin kita mapahingalo na may satispaksion na resulta kan pakikikabtang sa sagradong paglilingkod. (Tal. 19:23) Puede pa ngani niatong maeksperyensiahan an kagayagayahan na makanompong nin saro na arog ki Lidia!