Ano an Saimong ‘Dahelan na Maggayagaya nin Labi-labi’?

1. Ano an dahelan niato na maggayagaya nin labi-labi sa kada katapusan kan bulan?

¹ Sa katapusan kan kada bulan kun hinahagad na sa gabos an saindang report nin paglilingkod sa langtad, ano an saimong ‘dahelan na maggayagaya nin labi-labi’? (Gal. 6:4, NW) Baga man kita mga espesyal payunir na nagrereport nin 130 oras sa ministeryo o mga parahayag na inaprobaran na magreport nin tigki-15 minutos, gabos kita maninigong maggayagaya sa satong bilog na kalag na paglilingkod ki Jehova.—Sal. 100:2.

2. Taano ta maninigo kitang maghingoa sa paglilingkod ki Jehova?

² Bilang Soberanong Kagurangnan kan uniberso, si Jehova maninigo sa pinakamarahay na maitatao niato. (Mal. 1:6) Huli sa pagkamoot sa saiya, idinusay niato an satong buhay sa paggibo kan kabotan nia. Sa siring, sa katapusan kan aldaw o sa katapusan kan bulan, kun may kompiansa kita na itinao niato sa paglilingkod ki Jehova an ‘mga tinagba’ o pinakamarahay na kabtang kan satong panahon, kakayahan, asin kosog, igwa kita nin dahelan bilang indibiduwal na maggayagaya nin labi-labi. (Tal. 3:9) Minsan siring, kun sinasabi kan satong konsensia na orog pa an kaya niato, maninigo tang pag-isipan kun ano pa an magigibo niato tanganing umoswag.—Roma 2:15.

3. Taano ta bakong madonong na ikomparar an satong sadiri sa iba?

³ “Bakong sa Pagkomparar sa Ibang Tawo”: Bakong madonong na ikomparar niato an satong sadiri sa ibang tawo, o sa satong sadiri mismo kan kita mas makosog pa. Nagbabago an mga kamugtakan. Nagkakalaenlaen an mga kakayahan. An pagkomparar parateng minaresulta sa kompetisyon o sa pakamate nin kadaihan nin halaga. (Gal. 5:26; 6:4) Si Jesus dai naggibo nin mga pagkomparar. Imbes, nagtao sia nin komendasyon segun sa nagibo nin saro.—Mar. 14:6-9.

4. Anong mahalagang mga leksion an manonodan niato sa parabola ni Jesus dapit sa mga talento?

⁴ Sa parabola ni Jesus dapit sa mga talento, an lambang trabahador nag-ako nin mga talento “siring sa saiyang maaagod” o kakayahan. (Mat. 25:15) Kan magbuelta an kagurangnan asin hagadon an report kan nagibo ninda, an mga mahigos na nagtrabaho segun sa saindang kakayahan asin kamugtakan nag-ako nin komendasyon asin naglaog sa kagayagayahan kan saindang kagurangnan. (Mat. 25:21, 23) Sa kaagid na paagi, mantang kita nagdadanay na sibot sa paghuhulit kan Kahadean, may kompiansa kita na yaon sa sato an pag-oyon nin Dios asin may dahelan kita na maggayagaya nin labi-labi!