Ingatan an Saimong Konsensia
1. Ano an tema kan satong programa sa aldaw nin espesyal na asamblea para sa 2013, asin ano an katuyohan kan programa?
1 Aroaldaw, napapaatubang kita sa mga situwasyon na puedeng magin dahilan na mabalga niato an satong konsensia. Huli kaiyan, an tema kan satong programa sa aldaw nin espesyal na asamblea para sa taon 2013 iyo an “Ingatan an Saimong Konsensia.” (1 Tim. 1:19) Ginibo an programa tanganing tabangan an kada saro sa sato na seryosong pag-isipan kun paano niato ginagamit an marahayon na regalong ini kan satong Kaglalang.
2. Anong mahahalagang hapot an sisimbagon sa programa?
2 Antabayanan an mga Puntong Ini: Sisimbagon kan programa an pitong pangenot na hapot mapadapit sa konsensia:
• Ano an puedeng magsapeligro sa konsensia?
• Paano niato sasanayon an satong konsensia?
• Paano posible na magin malinig sa dugo kan gabos na tawo?
• Ano an ihinahayag dapit sa sato kan satong pag-isip asin paghiro oyon sa mga prinsipyo sa Biblia?
• Paano niato malilikayan na makulgan an iba kun dapit sa mga bagay na kalabot an konsensia?
• Mga hoben, paano kamo makakatagal kun ginigipit na magkompromiso?
• Anong mga bendisyon an nakakamtan kan mga minahiro kaoyon kan saindang konsensiang ginigiyahan nin espiritu?
3. Paano kita makikinabang sa programa?
3 Sa tabang ni Jehova malalabanan niato an paghihingoa ni Satanas na raoton an satong konsensia. Paagi sa Tataramon asin organisasyon nin Dios, an mamomoton na Ama niato sa langit nagsasabi sa sato: ‘Iyo ini an dalan, lakaw kamo dian.’ (Isa. 30:21) An programang ini sarong paagi na itinatao ni Jehova an siring na paggiya. Kun siring, planohon na umatender sa bilog na programa. Maghinanyog na marhay, asin isip-isipon kun paano personal na iaaplikar an impormasyon. Pag-olayan an programa bilang pamilya. An pag-aplikar niato kan mga pagtotokdong itatao sa sato papakusogon kita na padagos na ‘magkaigwa nin marahay na paghonahona’ o konsensia, asin makakatabang sa sato na dai madara kan temporaryong kaalingan kan kinaban ni Satanas.—1 Ped. 3:16.