Hilingon an Karahayan sa Saindong Kahigosan
1. Ano an puedeng makaina sa satong kaigotan sa ministeryo?
1 Linalang an tawo sa paagi na ‘makahiling nin karahayan huli sa saiyang kahigosan.’ (Ecl. 2:24, NW) Minsan siring, kun dai niato nahihiling an marahay na mga resulta sa satong ministeryo, puedeng mawara an kagayagayahan niato asin mainaan an satong kaigotan huli sa pagkadisganar. Ano an makakatabang sa sato na magdanay na positibo?
2. Taano ta maninigo kitang magin realistiko sa satong mga inaasahan dapit sa reaksion kan mga tawo sa satong ministeryo?
2 Magin Realistiko sa mga Inaasahan: Girumdomon na dawa dikit an nagdangog ki Jesus, daing duda na nagin mapanggana an saiyang ministeryo. (Juan 17:4) Sa saiyang ilustrasyon manongod sa parasabwag, ihinula ni Jesus na sa katapustapusi an kadaklan na puso dai maako kan arog-banhing mensahe kan Kahadean. (Mat. 13:3-8, 18-22) Minsan siring, dakol pa man giraray kitang nagigibo huli sa satong maigot na paghihingoa.
3. Paano kita puedeng ‘magbunga’ dawa dikit an nagdadangog sa paghuhulit niato?
3 Kun Paano Kita Nagbubunga nin Dakol: Segun sa ilustrasyon ni Jesus, ‘magbubunga’ an mga nag-aako kan mensahe. (Mat. 13:23) Pag nagsupang asin nagtalubo na an poon nin trigo, an bunga kaiyan bakong sadit na mga poon nin trigo kundi bagong mga banhi. Kaya an bunga nin mapangganang mga Kristiano, bako man bagong mga disipulo, kundi dakol na banhi kan Kahadean, na iyo an satong mga kapahayagan dapit sa Kahadean. Ini nagreresulta sa dakol na “karahayan” na dian puede kitang magkamit nin satispaksion, baga man magdangog an mga tawo o dai. Nakakakontribwir kita sa pagpakangbanal kan ngaran ni Jehova. (Isa. 43:10-12; Mat. 6:9) Igwa kita nin pribilehio na magin kapwa trabahador nin Dios. (1 Cor. 3:9) Asin an siring na ‘bunga nin mga ngabil’ nagpapaogmang marhay ki Jehova.—Heb. 13:15, 16.
4. Ano an puedeng magin resulta kan satong ministeryo dawa dai ta aram?
4 Dugang pa, an satong kahigosan tibaad magkaigwa nin resulta na dai niato nahihiling. Posible na an nagkapirang nagdangog sa paghuhulit ni Jesus nagin sanang mga disipulo pagkatapos kan saiyang ministeryo digdi sa daga. Kaagid kaiyan, an isinabwag tang banhi kan Kahadean tibaad dai tolos makagamot asin magtalubo sa puso nin sarong tawo, pero tibaad akoon nia an katotoohan dawa dai ta aram. Tunay nanggad, dakol na karahayan an nagigibo kan satong ministeryo. Kun siring, logod na kita ‘magburunga nin dakol’ asin patunayan niato na kita mga disipulo ni Jesus.—Juan 15:8.