Magtukdo sa Simpleng Paagi
1. Ano an sarong mahalagang aspekto nin malinaw asin epektibong pagtutukdo?
1 An pagigin simple mahalagang marhay para magin epektibo an pagtutukdo. An pag-estudyar sa paagi nin pagtutukdo kan Dakulang Paratukdo, si Jesus, makakatabang sa sato na mapauswag an satong abilidad sa ‘pagtutukdo.’—2 Tim. 4:2; Juan 13:13.
2. Paano kita magtutukdo sa simpleng paagi, asin ano an epekto nin siring na pagtutukdo?
2 Magtaram sa Simpleng Paagi: Sa Sermon sa Bukid, yaon an nagkapira sa pinakahararom na mga katotoohan na itinaram nin tawo kasuarin man, na gabos ipinahayag sa simpleng paagi. (Mat., kap. 5-7) An mga tawong naghihinanyog ki Jesus ‘nagngaralas sa saiyang [paagi nin] pagtutukdo.’ An mga opisyal na sinugo para arestaron siya napahiro na magsabi: ‘Dai pa nin tawo na nagtaram nin siring.’ (Mat. 7:28, 29; Juan 7:46) Dai niyato kaipuhan na maggamit nin hararom asin komplikadong mga tataramon, o detalyadong marhay na mga ilustrasyon para magin lubos na nakakakumbinsir an katotoohan. An katotoohan malinaw na ikakatukdo paagi sa paggamit nin pamilyar na mga termino.
3. Taano ta an nagkapira tibaad magtao nin kadakul na impormasyon sa mga nakakaulay ninda, asin paano ini malilikayan?
3 Determinaran Kun Gurano Kadakul na Impormasyon: Kinonsiderar ni Jesus an mga nagdadangog sa saiya sa pagdeterminar kun gurano kadakul na impormasyon an itatao niya kada magtukdo siya. (Juan 16:12) Dapat kitang magin mapagmasid asin makibagay sa kamugtakan kan mga nakakaulay ta, lalo na kun nagpapatotoo sa mga paryente, bagong mga interesado, o mga aki. Maninigo na dai kita magtao nin kadakul na impormasyon dawa kun sinda garo baga atentibong naghihinanyog. An mga sadiyusan an puso padagos na magkukua nin kaaraman dapit sa tunay na Diyos, si Jehova.—Juan 17:3; 1 Cor. 3:6.
4. Taano ta marahay na magkonsentrar sa panginot na mga punto imbes na sa mga detalye?
4 Magkonsentrar sa Panginot na mga Punto: Dai pinakomplikado ni Jesus an itinutukdo niya paagi sa pagsambit nin dakulon na detalye. Kan sabihon niya: ‘An gabos na nasa lulubngan maruluwas,’ bako idto an panahon na ipaliwanag niya an duwang kaaabtan kan mga bubuhayon liwat. (Juan 5:28, 29) Kun nagkokondukta nin pag-adal, dapat kitang magkonsentrar sa panginot na mga punto asin likayan na magdagdag nin dai kinakaipuhan na mga detalye.
5. Anong bendisyon an makakamtan niyato kun nagtutukdo kita sa simpleng paagi?
5 Nagpapasalamat nanggad kita na itinutukdo ni Jehova sa simpleng paagi an gabos na kaipuhan tang maaraman! (Mat. 11:25) Lugod na magtukdo kita sa simpleng paagi asin maeksperyensiyahan niyato an kagayagayahan na resulta nin mabungang ministeryo.