Gibuhon na Arugan an mga Propeta—Si Amos
1. Taano ta makakapakusog sa sato an halimbawa ni Amos?
1 Namatian mo na daw na bako kang kuwalipikadong maghulit huling hababa an inadalan mo asin tios an pamilya nindo? Kun iyo, mapapakusog ka kan halimbawa ni Amos. Saro siyang paraataman nin karnero asin pana-panahon sanang trabahador, alagad pinakusog siya ni Jehova para ipahayag an sarong magabat na mensahe. (Amos 1:1; 7:14, 15) Sa ngunyan, ginagamit man ni Jehova an ordinaryong mga tawo. (1 Cor. 1:27-29) Ano pa an manunudan niyato ki propeta Amos na makakatabang sa satong ministeryo?
2. Taano ta makakapagdanay kitang marigon sa ibong nin pagtumang sa ministeryo?
2 Magdanay na Marigon sa Ibong nin Pagtumang: Si Amasias sarong saserdote na nagsasamba sa ugbon na baka sa sampulong tribong kahadian nin Israel sa amihanan. Kan madangog niya an hula ni Amos, garo man sana sinabi niya: ‘Humali ka na! Pabayaan mo kami! May relihiyon na kami!’ (Amos 7:12, 13) Kan nakikiulay ki Hading Jeroboam na ipagbawal an gibuhon ni Amos, biniribid ni Amasias an sinabi kan propeta. (Amos 7:7-11) Pero dai natakot si Amos. Sa ngunyan, may mga klerigo na naghahagad nin tabang sa mga pulitiko tanganing persegiron an mga lingkod ni Jehova. Pero, sinisiyerto sa sato ni Jehova na mayo nin armas na ginibo tumang sa sato an magigin mapanggana.—Isa. 54:17.
3. Ano an duwang kabtang kan satong mensahe ngunyan?
3 Ipahayag an Paghukom nin Diyos Asin an mga Bendisyon Niya sa Maabot: Dawa ngani ihinula ni Amos an paghukom sa sampulong tribong kahadian nin Israel, tinapos niya an libro sa Bibliya na Amos paagi sa panuga ni Jehova na ibabalik giraray idto asin itatao an abundang bendisyon. (Amos 9:13-15) Ihinuhulit ta man an maabot na ‘aldaw nin paghukom’ nin Diyos, pero kabtang sana ini kan ipinapahayag tang ‘maugmang bareta kan kahadian.’ (2 Ped. 3:7; Mat. 24:14) An paglaglag ni Jehova sa mga maraot sa Armagedon mabukas kan dalan para sa sarong paraisong daga.—Sal. 37:34.
4. Taano ta sigurado kita na magigibo niyato an kabutan ni Jehova?
4 Sa paghuhulit kan mensahe kan Kahadian sa kinaban na dakul an nagtutumang, talagang mababalo an satong determinasyon na utubon an satong pagdusay ki Jehova asin gibuhon an kabutan niya. (Juan 15:19) Pero sigurado kita na padagos na itatao ni Jehova an kaipuhan niyato para magibo an saiyang kabutan, arog kan ginibo niya ki Amos.—2 Cor. 3:5.