An Paghuhulit Nagpapadanay sa Sato na Makosog sa Espirituwal
1. Anong pakinabang an itinatao sa sato kan paghuhulit?
1 An aktibong pakikikabtang sa paghuhulit makakapakosog sa sato sa espirituwal asin makakadagdag sa satong kaogmahan. Siempre, nakikikabtang kita sa ministeryo sa pangenot tanganing paogmahon si Jehova. Minsan siring, paagi sa pagkuyog sa pagboot na ‘ihulit an tataramon,’ nag-aako kita nin mga bendisyon ni Jehova asin nakikinabang man kita sa iba pang mga paagi. (2 Tim. 4:2; Isa. 48:17, 18) Paano man nanggad kita mapapakosog asin mapapaogma kan paghuhulit?
2. Sa anong mga paagi kita napapakosog kan ministeryo?
2 Kita Napapakosog Asin Nagkakamit nin mga Bendisyon: An paghuhulit nakakatabang sa sato na magkonsentrar sa mga bendisyon kan Kahadean imbes na sa mga problema ngonyan. (2 Cor. 4:18) An pagpaliwanag nin mga katokdoan sa Biblia nagpapakosog sa satong pagtubod sa mga panuga ni Jehova asin nagpapatalubo kan satong pagpahalaga sa katotoohan. (Isa. 65:13, 14) Mantang tinatabangan niato an iba na magtalubo sa espirituwal tanganing sinda magin “bakong kabtang kan kinaban,” napapakosog niato an sato mismong paninindogan na magin siblag sa kinaban.—Juan 17:14, 16; Roma 12:2.
3. Paano an ministeryo niato nakakatabang sa sato na mapatalubo an Kristianong mga kualidad?
3 An pakikikabtang sa ministeryo nakakatabang sa sato na mapatalubo an Kristianong mga kualidad. Halimbawa, an paghihingoa niato na “[magin] gabos na bagay sa gabos na klase nin tawo” nakakatabang sa sato na makapatalubo nin orog na kapakumbabaan. (1 Cor. 9:19-23) Mantang nakikipag-olay kita sa mga “naanitan asin nagkaralagalag siring sa mga karnero na mayong pastor,” posibleng marhay na makanood kitang magpaheling nin simpatiya asin empatiya. (Mat. 9:36) Nakakanood kitang magtagal kun kita nagmamaigot sa ibong nin kawaran nin interes o pagtumang. Nadadagdagan an satong kagayagayahan paagi sa paggamit kan satong buhay sa pagtabang sa iba.—Gibo 20:35.
4. Paano nindo minamansay an saindong ministeryo?
4 Sarong bendisyon nanggad na magkaigwa nin ministeryo na nagtatao nin kaomawan sa solamenteng Saro na maninigo sa satong pagsamba! An ministeryo nagpapakosog sa sato. Nagtatao iyan nin abundang bendisyon sa mga aktibo nanggad na nakikikabtang sa ‘lubos na pagpatotoo dapit sa maogmang bareta.’—Gibo 20:24.