‘An daga magtatao kan saiyang bunga; bebendisyunan kita nin Diyos, kan satuyang Diyos.’—SALMO 67:6

Makakamtan Mo an Daing Sagkod na mga Biyaya kan Satong Kaglalang

Nanuga an Diyos sa propetang si Abraham na an saro sa mga gikan niya magdadara nin mga biyaya sa ‘gabos na nasyon sa daga.’ (Genesis 22:18, An Banal na Biblia [Paulines]) Siisay an magigin gikan na iyan?

Haros 2,000 na taon na an nakaagi, tinawan nin Diyos si Jesus, na naggikan ki Abraham, nin kapangyarihan na gumibo nin makangangalas na mga milagro. Ipinarisa kan mga milagrong iyan na an ipinanuga ki Abraham makakaabot sa mga nasyon paagi ki Jesus.—Galacia 3:14.

Paagi sa mga milagrong ginibo ni Jesus, namidbid kan mga tawo na siya an pinili nin Diyos na magtao nin mga biyaya sa katawuhan, asin ipinahiling man kaiyan kun paano siya gagamiton nin Diyos para biyayaan an katawuhan sagkod lamang. Mangnuhon kun paano hiling-hiling sa mga milagro ni Jesus an nagkapira sa magagayon niyang kuwalidad.

Mapagpadangat—Pinaumayan ni Jesus an mga may hilang.

Sarong beses, sarong may leproso an nakimahirak ki Jesus na paumayan siya. Dinutan siya ni Jesus asin sinabi: “Buot ko!” Tulos na nahali an leproso.—Marcos 1:40-42.

Bukas-palad—Pinakakan ni Jesus an mga nagugutom.

Habo ni Jesus na magutom an mga tawo. Sa nagkapirang pagkakataon, milagroso niyang pinakakan an rinibong tawo kan pangyarihon niya na padakulon an dikit na tinapay saka pirang sadit na sira. (Mateo 14:17-21; 15:32-38) Pakakakan kan gabos, nabasog sinda asin dakul pa an natada.

Mapagmalasakit—Binuhay ni Jesus an mga gadan.

Huling ‘nahirak na marhay’ si Jesus, binuhay niya an kasaro-saruing aking lalaki nin sarong nagmumundong babaying balo na mayo nang ibang mag-aataman.—Lucas 7:12-15.

DAING SAGKOD NA MGA BIYAYA SA DAGA

Naipahiling na ni Jesus na may kapangyarihan an Diyos na biyayaan an katawuhan. Dai mahahaloy, pagbalik ni Jesus, arog kan ipinanuga niya, gagamiton siya kan Makakamhan sa Gabos para gumibo nin mas urog pang mga milagro sa bilog na daga!

Ano kaya an magigin buhay digdi sa daga pag inutob na nin Diyos an panuga niya ki Abraham? An mga namumuot asin nagsusunod sa Diyos ‘[magmamana] kan daga’ asin ‘magkakararanga nin labi-labi sa katuninungan.’ (Salmo 37:11) “An kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kapahayagan 21:4.

Magayunon nanggad na biyaya an mabuhay nin matuninong asin daing sagkod digdi sa daga! Inaagda mi ika na buksan an www.jw.org/bcl para makanuod nin urog pa manungod sa mga biyaya na madali ta nang makamtan pag namahala na an Diyos.