Tulong Paagi na Maipapahiling Mo an Pagsarig ki Jehova

Nadaog ni David si Goliat huling nagsarig siya ki Jehova. (1Sa 17:45) Gusto ni Jehova na ipahiling an saiyang kusog alang-alang sa gabos niyang lingkod. (2Cr 16:9) Paano ta maipapahiling na nagsasarig kita sa tabang na itinatao ni Jehova imbes na sa satong sadiring eksperyensiya asin kakayahan? Ini an tulong paagi:

• Pirming mamibi. Mamibi bako sana para maghagad nin kapatawadan pagkatapos makagibo nin sala kundi pati man para sa kusog pag natetentaran na gumibo nin sala. (Mat 6:12, 13) Mamibi bako sana para hagadon na bendisyunan ni Jehova an mga desisyon na nagibo na kundi pati man para sa saiyang paggiya asin kadunungan bago gumibo nin mga desisyon.—San 1:5

• Magkaigwa nin rutina nin pagbasa saka pag-adal nin Bibliya. Basahon an Bibliya aroaldaw. (Sal 1:2) Magtao nin panahon para hurop-hurupon an mga halimbawa sa Bibliya asin isabuhay an mga leksiyon na nanudan. (San 1:23-25) Mag-andam para sa ministeryo imbes na magsarig sa personal na eksperyensiya. Makinabang nin lubos sa mga pagtiripon kan kongregasyon paagi sa patiinot na pag-adal kan mga pag-aadalan

• Magsunod sa organisasyon ni Jehova. Pirming aramon an pinakabagong mga instruksiyon hali sa organisasyon asin tulos-tulos iyan na sunudon. (Bi 9:17) Magdangog sa mga elder pag nagtatao sinda nin mga sadol asin instruksiyon.—Heb 13:17

HILINGON AN VIDEO NA MAYO NIN DAHILAN NA MATAKOT SA PERSEKUSYON, DANGAN SIMBAGON AN MINASUNOD NA MGA HAPOT:

• Ano an mga ikinatakot kan mga tugang?

• Ano an nakatabang sa sainda na malabanan an mga ikinakatakot ninda?