An Punto-de-Vista kan Biblia

Ano an Nangyayari sa Kalag Pagkagadan?

SI James Kidd, sarong minero na nagsosolosolo sa buhay, parateng iniisip-isip an temang: ‘Talaga daw na igwa ako nin kalag na nabubuhay bilang kabtang ko?’ Huling preokupado na patunayan an saiyang suspetsa sa bilog niang buhay, si Mr. Kidd nagwalat nin haros $300,000, na sinasabi sa saiyang testamento na an kuwarta gagamiton sa “pagsiyasat sa sientipikong pruweba na may kalag an hawak nin tawo na minaluwas pagkagadan.”

Bakong arog ni Mr. Kidd, tibaad daing gayo kamo interesado sa aktuwal na pagpatunay na kamo igwa nin kalag na magpapadagos na mabuhay pagkagadan nindo. Alagad sa likod kan saindong isip, tibaad naniniwala kamo dian. Minilyon ngonyan an naniniwala huli sa relihiyosong mga katokdoan, sa mga bareta manongod sa mga eksperyensia daa nin buhay pagkagadan, o sa saindang personal na mga pagmate.

Alagad, interesanteng gayo, an pagsurbey kan Magmata! sa mga naniniwala sa inmortalidad kan kalag nagpaheling na parareho an simbag kan gabos sa hapot na ini: “Sa paghona daw nindo an kalag naghahangos tanganing mabuhay?” “Dai,” sabi ninda.

An Kalag Naghahangos

Sa Genesis kapitulo 2, bersikulo 7, an makaoogmang rekord manongod sa paglalang sa tawo minapoon: “Asin pinorma ni Jehova Dios an tawo hale sa kabokabo kan daga.”

Imahinara an milagrong nangyayari! Hale sa mga elemento kan mismong daga pinorma an 206 na tolang, komplikadong mga organo, labing 600 na kalamnan, asin an makangangalas na hotok, na gabos napapatos nin kublit, tanganing mabilog an sangkap na tawo. Pero, may saro pang “ingrediente” na kaipuhan tanganing matapos an makangangalas na akto nin paglalang: sarong bagay tanganing pahiroon asin buhayon an hawak na ini. Kaya an Dios “hinangosan sia sa saiyang dongo kan hangos nin buhay.” Sa puntong ini, sa paglaog nin aire (kaiba an oksiheno), durungan na binuhay nin Dios an minilyon na selula sa pisikal na hawak paagi sa espiritu, o puwersa nin buhay. Mantang buhay na, an tawong ini na an ngaran Adan naghangos palaog asin paluwas nin mga 14 beses kada minuto, o labing 20,000 na beses kada aldaw! Sa pagtapos sa bersikulo 7, mangnoha na an naghahangos na ngonyan, nabubuhay na tawo inaapod “buhay na kalag.”

An resultang ini ikababaing sa magasin na binabasa nindo ngonyan. Papel, tinta, asin pasta an minabilog sa magasin na ini. Pero kun suruhaysuhay mayong kahulogan an mga bagay na ini. Solamente kun pag-iiribanon sinda na magkakaigwa nin magasin. Kaya an pisikal na hawak, an hinangos, asin an puwersa nin buhay kakadikit kan halaga kun mayo an iba. Pero kun pinag-iiriba, an mga iyan minabilog nin sarong buhay na kalag. Kaya, si Adan “nagin” buhay na kalag.

Mantang mayo man lamang nin sinasabi tanganing magparisa na an enot na tawo binugtakan nin kalag o nag-ako kaiyan, kaipuhan na ihapot niato: Kun an kalag “nagin” sanang kalag pakatapos na maghangos, taano ta iisipon niato na iyan nagpapadagos na mabuhay kun an tawo minapondo na sa paghangos asin nagagadan? Dai mamamaluan an bagay na ini: An paghangos may halagang ikabubuhay-o-ikagagadan sa sarong kalag.

Kaya, an mga parasurat sa Biblia parateng ginagamit an terminong “kalag” bilang kapareho sa kahulogan kan tawong naghahangos. Halimbawa, helinga an nangyari sa mga kaiwal kan banwaan nin Dios sa daga nin Canaan. An banwaan nin Dios “rinulugad an lambang kalag na yaon dian [sa daga] sa tarom nin minasbad, na linaglag ninda sinda. Mayo nin tinadang ano man na naghahangos na bagay.” (Josue 11:11) An lambang kalag naghahangos na bagay. Siring man, an lambang naghahangos na bagay sarong kalag. Sarong may laman, naheheling, naghahangos na tawo an nagadan, bakong sarong dai naheheling na espiritung bagay.

An Gabos daw na Nabubuhay na Linalang Kalag?

Minsan ngani an tawo napapalaen sa hayop, iyan bakong huli sa saiyang pagigin kalag. Kan butasan nin Dios an mapanlaglag na baha kan kaaldawan ni Noe, ‘an gabos na laman, mga naglalayog na linalang, mga magarong hayop, mga mabangis na hayop, an gabos na nagkakanap, asin an gabos na tawo, an gabos na igwa sa dongo kaiyan kan hinangos kan puwersa nin buhay nagadan.’ An iyo man sanang mga hayop na iyan inaapod na “mga buhay na kalag” sa tala kan paglalang.—Genesis 7:21, 22; 1:24.

Arog kan ipinaheheling kan Biblia, ‘an gabos na laman, an gabos na nagkakanap, asin an mga tawo’ nagkakaipo nin aire asin nagsasarig sa pagpunsionar kan saindang laen-laen na sistema nin respiratoryo tanganing magpadagos na mabuhay bilang mga kalag. Kun pumondo na an prosesong ini na nakasusustenir sa buhay, an kalag minabalik sa kabokabo. An kalag—tawo o hayop—nagigin daing pag-aram asin dai nag-eeksister.—Genesis 3:19; Salmo 146:4.

An Kalag Puwedeng Mabuhay Sagkod Lamang!

Mantang lakop na gayo an paniniwala na an kalag nagpapadagos na mabuhay pagkagadan, malinaw na may pagmate an tawo na seguradong an buhay bako sanang arog kan naeeksperyensiahan ninda ngonyan. An mga pagmateng ini natural sana, ta sinasabi kan Biblia na an Dios “ibinugtak an kadaihan nin katapusan sa isip nin tawo.” (Eclesiastes 3:11, Revised Standard Version) Para sa dakol, an pagmawot na iyan nin “kadaihan nin katapusan,” o buhay sagkod lamang, aktuwal na maootob. Enot, may kaipuhan na itanos—an pagkabakong sangkap asin kasalan na dahelan na an kalag nin tawo nagagadan. (Roma 5:12) Oras na an mga ini mahale, an hawak nin tawo na sustenido nin Dios puwedeng mabuhay sagkod lamang.—Kapahayagan 21:3, 4.

Alagad ano an paglaom kaidtong mga dati nang gadan? An sosyedad sa pagsiyasat na benepisyaryo kan kayamanan ni Mr. Kidd dai nakanompong kan simbag. Pakatapos nin apat na taon na pag-adal, dai ninda napatunayan na an kalag nin tawo separadong kabtang nin tawo na minaluwas sa hawak pagkagadan. Alagad ta positibo nanggad an paglaom sa Biblia! Garantisado an panuga na an mga kalag na gadan ibabalik sa buhay digdi sa daga, iyo, bubuhayon liwat.—Juan 5:28, 29; Gibo 24:15; Hebreo 6:18.

Dangan an katuyohan nin Dios para sa kalag nin tawo manonodan kan mga binuhay liwat na tawong iyan. Asin para sa mga nag-aaplikar na ngonyan kan Tataramon nin Dios, na iyo “an klase na may pagtubod sa ikapagdadanay na buhay kan kalag,” an paghangos dai kaipuhan na pumondo noarin pa man!—Hebreo 10:39.

[Mga ritrato sa pahina 24]

Ini gabos kalag