“Paghona Ko an Pagsasalin nin Dugo Buhay, Bakong Kagadanan”

AN MGA tataramon na iyan isinabi ni Sal Cirella, ama nin sarong biktima nin hepatitis, sa programa sa telebisyon sa E.U. na 20/20 kan Disyembre 11, 1986. An aki niang babae na si Tracy sinalinan bilang “palakaw kan ospital,” minsan idto tumang sa kabotan kan mga magurang. (Kulibat palan, bako sindang mga Saksi ni Jehova, na nagsasayumang pasalin huli sa relihiyosong mga dahelan.) Nagkaigwa sia nin hepatitis, asin an buhay nia ikinaligtas sana nin pagbalyo nin katoy.

Si Tracy inatake nin sarong klase nin hepatitis na inaapod non-A/non-B hepatitis. An iyo man sanang programa sa TV nagbareta: “Labing 190,000 na Amerikano an nagkakaigwa kaiyan sa mga pagsasalin kada taon. Iyan nagtatao nin permanenteng danyos sa katoy o minagadan sa haros 10,000 katawo taon-taon. Madali na kaiyan na gadanon si Tracy.”

An sarong siruhano na nag-operar na mayo nin dugo sa 14,000 na kaso nagsabi man: “May naheheling akong mga tawo na sinasalinan an mga tawo na dai man nagkakaipo kaiyan, asin sa pundamental tinatahoban an sadiri nindang mga sala nin pagkadurat, kun mayo na ngani nin iba, paagi sa pagsasalin nin dugo. Asin para sa sako iyan biyong sala.” An saro pang doktor, dating opisyal kan U.S. Food and Drug Administration, nagsabi: “Sa paghona ko an gabos na produkto nin dugo sobra an paggamit. Paghona ko igwa nin bastanteng ebidensia na patunayan iyan. An gawe na kaipuhan na liwaton iyo an gawe nin mga doktor, an ipinagboboot nindang itao sa pasyente. Asin sobra an dugong ipinagboboot nindang itao.”