An mga Akto nin Kabootan Nagpapagian sa Kalamidad na Dara kan Bagyong si Gilbert

SA ENOT na mga oras kan aga nin Setyembre 14, 1988, an bagyong si Gilbert tuminama sa baybayon Caribbeano nin Mejico. Iyan tuminama sa mga estado nin Quintana Roo asin Yucatán. Kan petsa 15 asin 16, an mga estado naman sa amihanan na Tamaulipas asin Nuevo León an pinasakitan. Sa gabos na inagihan kaiyan, si Gilbert nanlaglag. An makokosog na doros asin oran nagtao nin grabeng baha. Sa timog-sirangan, 50,000 na pamilya an nawaran nin harong. Sa amihanan, 30,000 an nawaran nin harong. Mga 250 katawo an nagadan mantang an bagyo nagdadalagan sa inagihan kaiyan na 1,600 kilometros.

Tolos-tolos, an sangang opisina kan mga Saksi ni Jehova naghiro. Pag-Sabado, Setyembre 17, an enot na mga trak na pano nin kakanon, gubing, asin materyales na pan-atop pasiring na sa Yucatán Peninsula. May duwang representante hale sa sanga na nagbiyahe pasiring duman tanganing helingon an kamugtakan asin organisaron an lokal na mga komite sa pagwaras kan ayuda. Sa madaling panahon, ipinadara an dugang pang mga trak na may darang kakanon asin materyales na pan-atop. An mga autoridad kan gobyerno naghiro man sa pagtao nin pinasasalamatan na gayong tabang.

Alagad an enot na uminabot iyo an mga padara kan mga Saksi ni Jehova sa Siudad nin Mejico. Ini nagtao sa mga Saksi nin labi-labing karangahan asin kagayagayahan. Apuwera sa materyales na pan-atop na ipinadara kan mga Saksi, mayo nin makukua sa lokal, asin mayo kaiyan sa laog nin labing sarong bulan. Nakaoogmang maheling kun gurano kadaling ikinatogdok liwat an harong nin mga tugang. An lugar nin pagsamba para sa mga Saksi ni Jehova sa Kolonya nin Yucatán iyo an enot na edipisyo na nahirahay an atop. Sa Mérida an edipisyong ginagamit para sa mga pansirkitong asamblea asin pandistritong kombension kan mga Saksi nagaba nin entiro, asin ginibo tolos an mga areglo para sa pagtogdok nin bagong lugar para sa asamblea.

Grabe an danyos sa mga estado nin Nuevo León asin Tamaulipas. An lokal na mga Saksi nag-ako tolos nin ayuda paagi sa komite na inorganisar sa Monterrey. May itinaong pundamental na mga kasangkapan, arog baga nin mga katre, lamesa, silya, kusinilya, asin lutuan. Sa Monterrey mismo, 32 na pamilya nin mga Saksi ni Jehova an nawaran kan gabos nindang rogaring, pati an saindang harong. Huli sa nagdadangadang na haros nasa zerong mga temperatura nin tiglipotan, kaipuhan na may gibohon tolos.

An duwang Saksi, an saro arkitekto, nag-eroplano paduman hale sa Siudad nin Mejico. Nakipag-olay sinda sa kamagurangan asin nagbibiyaheng mga representante. Dai nahaloy, pinonan an pagtogdok tanganing tawan nin bagong harong an 32 na pamilya. Kaiba digdi an pagbakal nin daga asin makinarya sa pagprefabrikar sa kinakaipuhan na mga harong. Kan an kakanon, gubing, asin mga katre madaling ikinatao sa mga Saksi, an mga pagtaraed naghangang gayo sa pagkamoot asin pagkamatinao na ipinaheling nin ibang Saksi sa saindang mga tugang na nangangaipo. Gurano pa an magigin paghanga ninda kun maheling ninda an 32 na pamilya na bumalyo sa saindang bagong harong na may duwang kuwartong torogan!

Ini tipiko sa lakop sa kinaban na asosasyon nin magturugang kan mga Saksi ni Jehova. Bako sanang an mga Saksi sa Mejico an nagtao nin materyales, trabaho, asin kuwarta sa pagtabang sa saindang mga tugang kundi siring man an mga Saksi sa ibang parte kan kinaban. Pagkabareta tolos sa TV kan kalaglagan na itinao kan bagyong si Gilbert, nagpoon na umabot an mga kontribusyon sa opisina prinsipal nin mga Saksi ni Jehova sa Brooklyn, Nueva York. Uya an pirang halimbawa:

“Tabi gamiton nindo an kadikit na kontribusyon na ini sa pagtabang na magin komportable an satong mga tugang na binagyo. Boot kong magpadara pa nin mas dakol, pero kaipuhan na ipahirahay ko an makina kan kotse kan sakong agom ngonyan na semana. Hihingohaon kong magpadara pa pag-abot kan masunod kong suweldo.”

“Ikinokontribuwir mi ini sa pagtabang sa satong mga tugang sa lugar na binagyo. Boot ming ipamate sa sainda an samong pagkamoot asin pagmakolog. Arog kan sabi ni Pedro: ‘Magkaigwa nin makosog na pagkamoot sa lambang saro.’”—1 Pedro 4:8.

“Bilang kadikit na kontribusyon sa ayuda, tabi akoon nindo an tsekeng ini para sa $1,000. Boot ko kutanang mas dakula pa an itao, pero kun ano an itinogot ni Jehova na mapasakuya boot kong ihiras.”

“Tabi akoon nindo an money order na ini para sa $20. Kaipuhan ko an bilog kong tseke asin dai ko kayang tumabang sagkod na marealisar ko na may mga tugang na nawaran kan gabos.”

“Kalakip kaini an tseke para sa $25. Boot ming ikontribuwir iyan sa pondo para sa kalamidad. An regalo kadikit sana, pero an bilog ming puso nasa namomotan niatong mga tugang na babae asin lalaki sa lugar na ini.”

Maiimahinar daw nindo na magpautang ki Jehova, an Kagsadiri sa bilog na uniberso? Minsan siring, iyan an ginigibo kan mga nagkontribuwir na ini, huli ta an Talinhaga 19:17 nagsasabi: “An nagpapaheling nin pabor sa dukha nagpapautang ki Jehova, asin an saiyang pagtratar Saiyang babayadan sa saiya.”