Ihinahapot nin mga Hobenes . . .

Ano an Hilom sa Pagpili nin Tamang mga Gubing?

ARAM ni Mike kun paano an pagpili nin may kuwalidad na mga gubing—asin kun paano mababakal an mga ini sa marahay na presyo. May mga panahon na an mga miembro kan saiyang pamilya pinakikiolayan siang mamakal para sa sainda! Sa sarong pamamakal na biyahe, nagpili sia nin mga gubing para sa saiyang ina, may agom na tugang na babae, asin sa walong taon an edad na sobrina—an tamang mga sokol asin estilo na mawot ninda! Mantang namamakal sia, nakapili sia nin sarong bagong bata de banyo para sa saiya sa on-kuwartong halaga kan regular na presyo kaini. Para ki Mike, bako ini padusa kundi sarong tunay na kaogmahan.

Tibaad mayo kamo nin kaagid na kagustohan ni Mike sa pamamakal. Alagad siring sa kadaklan na hobenes, tibaad gusto nindo na magheling sa pinakamarahay nindo sa eskuwelahan, trabaho, asin sa pagkawat. An problema, an mismong katunayan na an sarong partikular na estilo na kinokonsiderar na uso sa mga hobenes dai nangangahulogan na iyo an tamang isulot, o na an pamamakal an kaipuhan nanggad na “tamang bagay” na pinakamarahay na paggamitan kan saindong kuwarta. Kaya, ipamugtak na tinogotan kamo kan saindong mga magurang na magkaigwa nin libertad na pilion an saindong sadiring mga gubing, uya an kadikit na giya kun paano an pagpili asin pagbakal nin tamang mga gubing.

Pagpili nin Tamang “Kasulotan”

Enot, haleon niato an ideya na minsan ano puwede kun manongod sa gubing. Nagkakaedad na kamo, asin an mga paglaom sa paghanapbuhay asin tibaad pagsuporta nin pamilya yaon sa enotan nindo. Kun paano kamo naggugubing maapekto bako sana sa saindong mga paglaom sa pagtatrabaho kundi siring man sa paagi na mamansayon asin tatrataron kamo nin iba. Orog na mahalaga, kitang mga Kristiano “bakong magpaoyon sa sato man sana,” kundi kita maninigong mahadit manongod sa kun paano an satong ginigibo—o sinusulot—nakaaapektar sa iba.—Roma 15:1.

An Talinhaga 25:20 nagsasabi manongod sa saro “na naghahale kan gubing sa malipot na panahon.” Bakong angay nanggad! Kapareho bakong angay na magsulot nin sunod sa modang gubing na bakong angay sa okasyon. An sarong aktor sa pasale sa entablado maingat na nagpipili nin kasulotan na angay sa saiyang kabtang. Asin sa tunay na buhay, an mga kabtang na satong inaatubang parateng naghahagad nin manlaenlaen na “kasulotan.” Bilang halimbawa, magpapainterbio daw kamo para sa sarong trabaho? Kun siring an angay na gubing sa negosyo an angay na kasulotan. Maeskuwela daw kamo? Kun siring an pustorang mawot nindo tibaad bakong pormal alagad malinig minsan siring.

Si Millie, sarong Saksi ni Jehova, nag-eskuwela kun saen nag-oorog an kadahasan. An paggubing na garo maatender nin Kristianong pagtiripon magpaparisang gayo sa saiya. Kaya nagsulot sia nin mabining padis nin pantalon durante kan panahon nin pag-eskuwela, mantang iyan an inaako sa saiyang eskuwelahan. Alagad mantang nakikikabtang sia sa edukasyonal na gibohon pakatapos kan klase, nagdadara sia nin bestida. Pagbabago nin kabtang, pagbabago nin gubing.

An mga hobenes sa tahaw nin mga Saksi ni Jehova nagtatao nin partikular na kaisipan sa kun ano an saindang isinusulot sa Kristianong mga pagtiripon asin sa saindang panpublikong gibohon na paghuhulit. Bilang halimbawa, an mga pantalon asin tenis, na tibaad angay nanggad sa eskuwelahan, bakong angay durante kan pormal na pagsamba; naiinaan kaiyan an paghihingako nin saro bilang ministro nin Dios.—Ikomparar an 2 Corinto 6:3.

An Halaga nin Konserbatibong Paggugubing

Tibaad magngalas kamo sa pilosopiya manongod sa paggubing kan hoben na si Rudy. Sinasabi nia: “Gusto ko an klase nin paggubing na isinusulot nin mga tawo kan nakaaging 50 taon.” Mayong paglaom daw na makaluma? Bako man. Nanodan ni Rudy na sa ibong na ‘an kamugtakan kan kinaban na ini nagbabago,’ an pangenot na mga estilo bihirang mabago. (1 Corinto 7:31) An saiyang reglamento: Dai magsulot nin labilabing sunod sa uso na sa dai mahahaloy magigin dai sa uso! “Sa paaging ini, permi kang sunod uso,” an sadol ni Rudy.

An mga eksperto minaoyon. An konsultant na si Amelia Fatt, bilang halimbawa nagsasabi na an konserbatibong mga tabas “mas marahay na tipon.” Dai iyan tolos-tolos nawawara sa uso huli ta sa pagheling bako iyan espisipikong gayo. Bilang dugang na pakinabang, parateng mas pasil na iiba an konserbatibong mga estilo sa iba pang gamit nin saindong mga gubing.

An nagkapirang modernong estilo bakong angay para sa mga Kristiano. An iba may marahay na pagpili. Ipamugtak na oyon an saindong mga magurang, kun manompongan nindo na an usong gayong gubing bako sanang magayon helingon sa saindo kundi siring man sa iba pang gamit sa saindong mga gubing, tibaad mawot nindong isulot ini. Alagad mag-ingat na magin oripon nin moda! An konsultant sa moda na si Carole Jackson nagkokomento: “Kun susunudon nindo an mga moda tanganing magin ‘sunod sa uso,’ minsan siring na an presenteng uso bakong angay sa saindo, dinadaya nindo an saindong sadiri.”

Igwa pa nin iba pang bentaha an pagigin konserbatibo sa gubing. Nanompongan nin nagkapirang hoben na babae na nagpapaluya ini sa seksuwal na pag-atake sa eskuwelahan asin sa lugar nin trabaho. Dugang pa, an sarong hoben na nagdadanay sa tradisyonal na mga estilo mas posibleng mansayon nin iba bilang maygurang, marigon, bakong madaling ipalid nin lambang doros nin uso asin moda.

Si Tammy bilang halimbawa, sarong hoben na babae na naglilingkod bilang pambilog na panahon na ebanghelisador. Minsan siring na an haralipot na gubing an uso sa saindang lugar, sinasabi nia, “Para sa sakuya, an medyo hababa sa tuhod an komportableng laba.” Oyon ini sa Kristianong kabinian. (1 Timoteo 2:9) Siyempre pa, an mga pamantayan sa kabinian nalalaen sa bilog na kinaban. Asin kun nagdududa kamo kun baga an sarong estilo angay o bako, ipakipag-olay ini sa magurang o sa mas matuang katood.

Madonong na Pamamakal

“Paagi sa madonong na pagigiya makipaglaban ka,” an sadol kan Biblia sa Talinhaga 20:18. An madonong na paggiya hinahagad minsan sa kinabanon na mga bagay siring sa pamamakal. Bilang halimbawa, igwa daw kamo nin kasakitan sa pagpili nin mga gubing na angay saimo? Puwede kamong makakua nin madonong na paggiya paagi sa pagduman sana sa sarong panpublikong librarya asin magkaigwa nin nagkapirang pagsiyasat! Igwa nin mga libro asin artikulo na makatatabang sa saindo na gamiton an manlaenlaen na tabas, kolor, asin estilo nin gubing na matakop sa mga problema sa kurte nin lalauogon, laba nin liog, pigura, asin iba pa.

Kumusta an kuwalidad kan mga gubing na binabakal nindo? Minsan siring na pobre sa materyal si Jesu-Cristo kan anion pa sa daga, malinaw na nagsulot sia nin gubing na may halangkaw na kuwalidad mala ta an mga naggadan sa saiya nagpaagi sa kapaladan kun siisay an magsasadiri kaini! (Juan 19:23, 24) Sa kaagid na paagi, maninigong magmaigot kamo na magdanay sa may kuwalidad na mga gubing, minsan siring na limitado an saindong mga pundo asin kaipuhan kamong magtipon bago mamakal. Sa bandang huri, an mas mahal na may kuwalidad na gubing na nagtatao saindo nin mga taon nin paggamit an nagigin mas barato kisa sa madali maraot na binakal na barato.

Paano kamo makapagpaoswag nin mata para sa kuwalidad? Probaran na magheling sa mas mahal na mga tindahan na nagtitinda nin may kuwalidad na mga gubing. Aramon an magayon paghelingon asin hibog nin marahay na mga gubing. Sinasabi kan librong Elegance: “Dai magpadara sa ngaran; an gubing maninigong depende sa kuwalidad kaini . . . An maluyang kuwalidad, ano man an nakasurat digdi, bakong barato.” Kaptan an materyal. Siyasaton an kuwelyo, hapin, asin an ohales. Hanapon an maposog an pakatahi.

Si Mike (na sinambit sa enotan) nakapaoswag nin mata para sa kuwalidad. Kaya, aram nia na an baratong bata de banyo tunay na barato! Minsan siring, “dai magpadaya sa mga ‘barato,’” an patanid ni Amelia Fatt. An sarong mahal na gubing na panlipot na puwedeng isulot kairiba an nagkapirang gamit sa saindong gubing tibaad magtao saindo nin orog na paglilingkod kisa sa baratong gubing na panlipot na mayo nin kapadis. Sinasabi kan Talinhaga 21:5: “An gabos na naghuhumari daing liban na mapasiring sa kadukhaan.” Likayan an pamamakal kun naghihidale kamo. Mamakal kun bakong matawong marhay an mga tindahan. Aramon nin patienot kun ano an hinahanap nindo. Kun mas dakol an nasa isip nindo kan tela, estilo, kolor, asin presyo na mawot nindo, mas dikit an posibilidad na masiod kamo na makabakal nin bagay na dai talaga nindo kaipuhan.

An mga tindera puwedeng magin dakulang tabang kun sasabihon nindo an saindong espisipikong mga pangangaipo. (Iyo nanggad, sa tabang nin sarong tindera kaya nakabakal si Mike nin mga gubing para sa mga babaeng miembro kan saiyang pamilya.) Alagad dai nindo pagpabayaan na akiton kamo paagi sa boladas kan mga tindera tumang sa saindong mas marahay na paghusgar. “An gabos man na kablas nagtutubod sa gabos na tataramon, alagad an madonong naghohorophorop sa saiyang mga lakad.”—Talinhaga 14:15.

Magin angay sa paggubing asin postura kun kamo namamakal. Paano nindo masasabi kun an sarong amerikana magayon paghelingon kun probaran nindo ini sa ibabaw nin kamiseta? O paano kamo makapagdedesisyon kun baga angay saindo an sarong trahe o bestida kun nakasulot kamo nin tenis? Sarong manunurat ngani an nagsabi na kun bakong marahay an saindong paggubing, an mga tindera may tendensia na “honaon na kamo tawong maluyang pumili asin/o na mayo nin kuwartang panggastos,” asin aasikasohon ninda an ibang parokyano.

Katapustapusi, tibaad manompongan nindo na parateng “mas marahay an duwa kisa sa saro” kun namamakal. (Eclesiastes 4:9) An sarong katood o magurang puwedeng magsabi saindo kun paano paghelingon an gubing sa likod, kun baga ini mahiwas na gayo, piot na gayo, o sa nagkapirang ibang paagi bakong mabini.

An Orog na Mahalagang mga Bagay

Sa Filipos 1:10, pinakosog an mga Kristiano na “siertohon an orog na mahalagang mga bagay.” An totoong mahalagang mga bagay sa buhay nakasentro sa pagkakaigwa nin kaaraman sa Dios—bakong sa gubing. Mamondong sabihon, an nagkapirang hobenes tibaad pulidong maggubing alagad bakong areglado sa saindang abilidad sa panpublikong pagpahayag kan saindang pagtubod.

Kaya mantang marahay na magin madonong na parabakal asin magheling na kasin presentable sagkod sa itinotogot kan saindong kuwarta, pagmaigotan nin marhay na magin sarong maygurang na Kristiano. Pag-adalan na mamuhay sa kabtang na iyan, asin an paggubing para digdi magigin natural na sana.

[Ritrato sa pahina 26]

An sunod na gayo sa modang mga gubing madali sanang mawara sa uso. An konserbatibong mga estilo para sa manlaenlaen na paggamit may tendensiang maghaloy