Ihinahapot nin mga Hobenes . . .

Maninigo daw Akong Magpabautismo?

AN TRESE anyos na si Susana nasa ultimo nang mga tangga nin kanser kan sia umatender sa ultimo niang kombension kan mga Saksi ni Jehova. Dai nia aram na sia magagadan sa laog nin sampulo na sanang aldaw. Minsan siring, minsan kanser dai nakapogol saiya na maotob an pinakamamawot nia: an mabautismohan bilang nagdusay na Saksi ni Jehova asin disipulo ni Jesu-Cristo.

Si Susana saro sana sa rinibong hobenes sa mga Saksi ni Jehova sa nakaaagi pa sanang mga taon na nagmawot kan pribilehiyo na pabautismo. Pero seguro sa paghona nindo medyo nakatatakot an paggibo nin siring kamapusong paninindogan. Bakong huli ta dai kamo nagtutubod sa mga katotoohan na basado sa Biblia na itinokdo sa saindo. Tibaad kamo regular na nag-aatender sa mga pagtiripon na Kristiano asin tibaad regular kamong nakikikabtang sa pagdara sa iba kan mga katotoohan sa Biblia. Pero, pag-abot sa pagdusay kan saindong buhay sa Dios, tibaad nag-aalangan kamo. Kun siring, gurano kahalaga nin bautismo? Asin taano ta medyo takot dian an dakol na hobenes?

Relihiyon na Mayo nin Pagdusay

Sa Kakristianohan, an isyu sa bautismo parateng sinisimbag para sa mga hobenes kan saindang mga magurang. An nagkapirang sekta dinadagka an mga magurang na pabautismohan an saindang mga aki na omboy pa. Asin dawa kun an bautismo irenereserba para sa mga nasa edad na, an mga hobenes parateng linalaoman na sumunod sa relihiyon kan saindang mga magurang bilang pinagkatodan, bakong sa pagpili.

Alagad, interesante nanggad, ipinaheling nin sarong surbey nin Gallup sa Estados Unidos na minsan ngani “haros gabos na tin-edyer (96 porsiento) nagtutubod na may Dios,” 39 porsiento sana an parateng namimibi. Asin 52 porsiento sana an may kompiansa sa organisadong relihiyon. Kaya an hoben na si Diane kapareho nin kadaklan sa pagsabi: “Nagtutubod ako sa Dios, pero mas nagtutubod ako sa paghihingoa sanang magin marahay na tawo kisa pagbasa sa kada linya kan Biblia.”

Iyo, an relihiyon puwedeng magin maluya nanggad na puwersa kun iyan ipinirit sa sarong hoben kan saiyang mga magurang. Ini orog pang iiniilustrar kan pagsiyasat sa sarong grupo nin mga delingkuwenteng hobenes na Katoliko. An kabanga sa sainda nagsisimba. An kadaklan tatao sa pundamental na mga doktrina kan saindang relihiyon. Asin haros 90 porsiento sa sainda an dai oyon sa paghabon. Pero, labing dos-tersio an parahabon! An komento kan librong The Adolescent: “Tibaad an sarong dahelan iyo na an relihiyosong pangako kan mga barobata maluya. An gabos namundag na Katoliko; an enot nindang pangako ginibo para sa sainda kan saindang mga magurang. An relihiyon ninda bako nindang sadiri.”

Bautismo—Kun Taano ta Kahagadan sa Kristiano

Kaya, may marahay na dahelan na hinahagad kan Biblia na kamo—bakong an saindong mga magurang—an gumibo nin personal na pagdusay sa Dios.a ‘Marahay iyan,’ tibaad sabihon nindo, ‘pero kun an pagdusay personal, bagay na sa pag-oltanan mi nin Dios, taano ta kaipuhan akong magpabautismo?’

Huli ta an bautismo may labot sa ‘kaligtasan kan saindong kalag.’ (1 Pedro 1:9) Katuyohan nin Dios na “mamalos sa mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus. An mga ini mismo magtitios kan silot nin daing sagkod na pagkalaglag.” (2 Tesalonica 1:8, 9) Ipinaheheling kan gabos na tanda na an kalaglagan na ini maabot sa satong aldaw.b

Alagad ta an kabotan nin Dios iyo na “an gabos na klase nin tawo makaligtas.” (1 Timoteo 2:4) Boot nia na kamo makadulag sa katapusan kan palakaw na ini nin mga bagay asin mabuhay sagkod lamang sa Paraiso digdi sa daga! (Kapahayagan 21:3, 4) Alagad ta paano nindo ipamimidbid na kamo nagkukuyog sa maogmang bareta? Bakong igo na tumubod sana sa mga katotoohan sa Biblia na itinokdo sa saindo, ni igo man na umiba sana sa saindong mga magurang sa mga pagtiripon na Kristiano. (Ikomparar an Santiago 2:19.) An nagmamawot na maligtas kaipuhan na idusay an sadiri sa Dios asin gibohon an saiyang kabotan. Sabi ni apostol Pablo sa Roma 12:1: “Kaya ako nakikimaherak sa saindo huli sa mga pagkaherak nin Dios, mga tugang, na idolot nindo an saindong mga hawak na siring sa buhay na atang, banal, [“dusay,” The New English Bible] maaako nin Dios, sarong banal na paglilingkod na may kakayahan na mangatanosan.”

Alagad an pagdusay dai puwedeng magdanay na pribado. Total, gurano kadebotado, gurano kadedikado, an sarong disipulo sa hilom? (Ikomparar an Juan 19:38.) Sasarigan daw nindo an katood na gustong ihilom an pagigin magkatood nindo? Kaya, madonong nanggad, hinahagad nin Dios sa gabos na ‘magpahayag sa publiko para sa kaligtasan.’ (Roma 10:10) Ini minapoon sa bautismo. Sa panahon na iyan, an saro naggigibo nin berbal na kapahayagan kan saiyang pagtubod. Dangan, minasunod an bautismo sa tubig. (Mateo 28:19, 20) Alagad, ano an halaga nin pagbuntog sa tubig?

An bautismo bakong ordinaryong pagkarigos; iyan simbolikong paglobong. Kun kamo minairarom sa tubig nin pagbautismo, idinodoon kaiyan sa saindo na kamo nagadan sa dati nindong pamumuhay. Kaidto, an naeenot sa saindong buhay iyo an saindong personal na mga ambisyon, pasohan, asin kamawotan. Alagad ta sinabi ni Jesus na an saiyang mga disipulo ‘paiindahan an saindang sadiri.’ (Marcos 8:34) Kaya pagpatindoga sa saindo, ipinagigirumdom saindo na ngonyan kamo nabubuhay tanganing gibohon an kabotan nin Dios. An mapuso, hayag sa publikong aktong ini mahalagang kabtang kan tanda na nagpapamidbid sa saindo para sa kaligtasan!—Ezequiel 9:4-6; ikomparar an 1 Pedro 3:21.

‘Natatakot Akong Matiwalag’

Kun napakahalaga nin bautismo, taano ta nag-aalangan dian an ibang hobenes? Ihinapot iyan kan Magmata! sa nagkapirang hobenes na Kristiano. An sarong daragita nagsabi: “An dakol naghohona na mas libre sinda kun bako sindang bautisado. Naghohona sinda na kun sinda makagibo nin sala, daing gayo sinda maninimbag.” Inotro nin sarong barobatang si Robert an komentong ini sa pagsabi: “Sa paghona ko dakol na hobenes an nag-aalangan na pabautismo ta sinda natatakot na iyan ultimong tangga na dai ninda masisibogan. Naghohona sinda na kun makagibo sinda nin sala, iluluwas sinda sa kongregasyon.”

Totoo na an saro dai puwedeng sumibog sa pagdusay sa Dios. (Ikomparar an Eclesiastes 5:4.) An saro na nagdusay kan saiyang sadiri sa Dios minaako nin magabat na paninimbagan. Sia obligadong “maglakaw na angay ki Jehova sa katuyohan na lubos na makapaogma sa saiya.” (Colosas 1:10) An naggigibo nin grabeng kasalan namemeligro pa nganing paluwason sa Kristianong kongregasyon.—1 Corinto 5:11-13.

Pero, dai puwedeng mangatanosan an saro na basta sia dai pa nabautismohan, puwede minsan ano. Huli ta “kun naaaraman nin saro kun arin an tama alagad dai nia iyan ginigibo, iyan kasalan para sa saiya”—bautisado man o dai bautisado! (Santiago 4:17) Puwedeng malikayan an pormal na pagtitiwalag sa kongregasyon, pero an saro dai makadudulag sa paghokom ni Jehova. “Dai kamo masala,” an patanid ni Pablo, “dai puwedeng tuyaon an Dios; huli ta an tawo mag-aani kun ano an saiyang itinanom.”—Galacia 6:7, Byington.

Sa parate an pagkatakot na matiwalag sa katotoohan pantahob sa sekretong pagmawot na gumibo nin sala. An sarong daragita na an ngaran Natalie sadiosan na nagkomento: “Nagdakula ako sa kinaban ni Satanas asin aram ko kun arog iyan sa ano. Pero an dakol na hobenes gustong lumuwas asin namitan an yaon dian.” Imbes na togotan na pogolan kamo nin salang mga kamawotan sa pagpabautismo—o togotan na iyan magtalubo sa salang mga gibo—taano ta dai humagad nin tabang, tibaad ipakipag-olay iyan sa saindong magurang o maygurang na Kristiano?—Santiago 1:14, 15.

An totoo, an katalingkasan na iinoopresir kan kinaban ni Satanas imahinasyon sana. Arog kan isinabi ni apostol Pedro manongod sa nagkapira na nadaya kan saiyang kaaldawan: “Mantang pinanunugaan ninda sinda nin katalingkasan, sinda mismo nabubuhay bilang mga oripon nin kalapaan. Huli ta an siisay man na madaog nin iba naooripon kan sarong iyan.” (2 Pedro 2:19) Tunay daw na katalingkasan na kontrolon nin iba an saindong isip, gawe, asin moral? Tunay daw na katalingkasan an paggibo nin mga bagay na nagdadara sa helang, kasopganan, asin, ultimo, kagadanan?—Talinhaga 5:8-14.

An sarong barobatang Hapones na an ngaran Hitoshi napaatubang sa mismong mga hapot na iyan. Pinadakula sia nin Kristianong mga magurang asin nagigirumdoman nia: “Mantang nagkakawat an iba, ako kaipuhan na magduman sa mga pagtiripon. Nagmawot ako nin orog na katalingkasan. Paghona ko may nawawara sako.” Iyo, kapareho kan salmistang si Asaf, sia “nauri” sa mga parakasala. (Salmo 73:2, 3) Alagad pakahorophoropa nin igo sa bagay, naliwat an mga saboot ni Hitoshi. Sia nagsasabi: “Narealisar ko kun ano an magigin buhay ko kun mayo an katotoohan—naheling ko an sakong sadiri na nabuhay nin 70 o 80 taon dangan nagadan. Pero si Jehova nanunuga nin buhay na daing katapusan!” Kaya si Hitoshi guminibo nin pagdusay sa Dios asin nabautismohan.—Ikomparar an Salmo 73:19-28.

Napapahiro daw kamong gumibo man nin siring? An barobatang si David iyo. Nagigirumdoman nia: “An pagpabautismo bilang hoben pa proteksion para sa sako. . . . An ibang tin-edyer sa kongregasyon na dai bautisado nakamate na sinda libre sa autoridad kan kamagurangan asin bilang resulta naholog sa salang gibo. Pero ako permi kong ginigirumdom na idinusay ko an sakong buhay sa Dios.”

[Mga Nota sa Ibaba]

[Ritrato sa pahina 24]

An desisyon na maglingkod sa Dios saro na kamo sana an makagigibo. An bautismo nagpapamidbid sa saro bilang nagdusay na disipulo ni Cristo Jesus