Kamo daw Peligrosong Drayber?
Kan kabareta kan Magmata! sa Hapon
“ARAM niato an mga klase na posibleng maaksidente,” sabi ni Hiroyasu Ohtsuka, Hepe sa Traffic Safety sa National Institute of Police Science sa Hapon. “Pero, dai kita nagsasayuma na tawan sinda nin lisensia sa pagmamaneho, kundi boot niato na mamidbid nin mga tawo an mga diperensia ninda sa personalidad asin pagmaigotan na itanos iyan.”
An peligrosong mga drayber sa parate dai pinagheheling an sadiri na siring. Pero an mga eksperto may namimidbid na anom na klase nin diperensia sa personalidad na madaling mahayag kun an saro kumapot na nin manibela. Mantang hinohorophorop nindo an kada klase, pagmaigotan na horophoropon an sadiri, asin helingon kun gurano kamo kaseguradong drayber.
An mga Dai Tataong Makibagay sa Kapwa
Kabilang sa mga peligroso iyo an mga dai tataong makibagay, an mga may problema sa pakikiiba sa iba. Sinda an mga:
Sadiri Sana an Inaasikaso Ini an tawo na nag-iinsister na gibohon an gabos sono sa gusto nia. Sa likod kan manibela, an paghona nia sia ‘hade kan tinampo.’ An paghona nia sia libreng determinaran kun gurano sia karikas na madalagan, dai intindihon an ano man na reglamento na ibinibilang niang dai kaipuhan, asin magpasikat kun noarin nia gusto. Nalilingawan nia na kaipuhan na hirasan nia kan tinampo an gabos na ibang drayber. Sa paghiro sono sa gusto nia asin sa pag-abuso, nagigin dahelan sia nin mga aksidente ta dai nia naririsa an perming nagliliwat na kamugtakan sa tinampo asin makibagay dian.
Dai Nakikikooperar An dai nakikikooperar na drayber mayo nin pakikipagkapwa sa iba, ni nasasabotan man nia kun ano an nasa isip asin boot ninda. Huli ta nasasakitan siang makaoyon an ibang tawo, may tendensia siang likayan sinda. Ini ipinaririsa nin maraot na ugale sa tinampo asin pagigin daing galang sa ibang drayber—na pareho mga bagay na peligroso. Para sa nagkapira, an pakanood na makiiba sa mga tawo puwedeng magkaipo nin dakol na taon, asin ini sarong dahelan na dakol an aksidente sa mga hobenes.
Agresibo An sarong tanda nin agresibong drayber, sono sa librong Driving Instruction According to Aptitude, iyo “an biyong pagsayuma na paagihon an iba kun an drayber naniniwala na sia an may diretsong maenot. Dai nia palilihison an salang gibo nin ibang drayber o mga naglalakaw, asin ini nagbubunga nin pagsilyak, pag-abala sa ginigibo nin iba, . . . asin pagbusina . . . sa pagprotehir sa saiyang mga diretso sagkod sa mapait na katapusan.” Minsan an iniimahinar na mga kasalan puwedeng makapaanggot sa saiya. Kun sia man madaling mag-init an payo, an pagmaneho nia parateng malihis sa idinidikta nin sentido komon.
An mga May Diperensia sa Emosyon
Yaon man an mga may problema sa emosyon. Kabale digdi an mga:
Dai Makontrol an Boot An tawong dai makontrol an boot may mga palabilabing emosyon. Inaatake sia nin mga pagigin maesperansa, maogma, asin nin labi-labing kamondoan. Kun sia magmamaneho na mamondo, dai nia maheheling an mga peligro, asin an saiyang reaksion tibaad atrasadong marhay para sa ligtas na pagmamaneho. Kun sia magmaneho mantang maogmahon an boot, tibaad sia magin ragap. An mga patanid na itatao sa saiya kun sia nasa pagmateng ini posibleng magpalaad nin pagrerebelde. Tibaad an minimidbid sana niang abnormal iyo an saiyang labi-labing kamondoan.
Sobra Kanerbiyoso Parate na ini daing girong na tawo na interesado sana sa saiyang mga iniisip, na ikinahahadit an gabos na bagay. Kun nagmamaneho, an isip nia “pano nin impormasyon na dai konektado sa pagmamaneho,” kaya sia “mas posibleng malipasan an mahalagang impormasyon o mamis-interpretar iyan,” an komento kan mga parasiyasat na si Richard E. Mayer asin John R. Treat sa pagsiyasat ninda sa peligrosong mga drayber. An drayber na nerbiyoso tibaad mataranta minsan sa mga situwasyon na bakong kritikal, arog baga kun may minasabay na trak. An linalaoman nia pinakagrabe.
Pabiglabigla An arog kaining tawo madaling humiro. Imbes na magtao nin oras sa pagsierto sa mga bagay asin gumibo nin tamang paghusgar, may tendensia siang magsarig sa natural na tendensia. An oras na ginagamit sa paghalat sa mga ilaw nin trapiko asin sa mga naglalakaw garo baga para sa saiya mas haloy kisa sa ordinaryong tawo. Kaya sia nahahayo asin nawawaran tolos nin pasensia. Huli sa dai nia pakagibo nin tamang paghusgar bago humiro sia nagigin peligrosong drayber.
Naheheling daw nindo an saindong sadiri sa arin man sa mga klaseng ini nin tawo? Ano an reaksion nindo kun may daing konsiderasyon na drayber na minabalo sa saindong pagpapasensia? Sabi ngani kan sarabihon, kun husto an sapatos, isulot iyan. Para sa sadiri nindong kaligtasan, dangogon an patanid, asin pagmaigotan na mahale an mga kaluyahan. Kaipuhan na kontrolado nindo an saindong emosyon asin isip tangani kamong magin marahay na drayber.
An Drayber na Marahay Makiiba
Alagad ano an minagibo sa saro na magin marahay na drayber? Sa mga interbio kan Magmata!, an pangenot na mga parasiyasat sa pulisiya kan Hapon nagdoon kan konsiderasyon sa iba, pag-isip nguna bago humiro, kakayahan na masabotan an bilog na situwasyon, kadonongan na makagibo nin tamang paghusgar, pagmansay, kahoyoan, pagpopogol sa sadiri, asin paggawe sa paagi na nagpoprotehir sa ibang naggagamit kan tinampo.
Siring man, an sarong report hale sa Osaka Prefectural University ilinaladawan an marahay na mga drayber bilang “may halangkaw na grado nin emosyonal na kasarigan; an pag-andar nin isip sa mapagmansay na paghusgar mas marikas kisa reaksion kan saindang hawak; an paghusgar ninda eksakto; nakokontrol ninda an saindang emosyon.” Tama daw saindo an paglaladawan na ini?
Sa rinibo nang taon, tinotokdoan kan Biblia an mga tawo kun paano mapatatalubo an kadonongan, pagsabot, asin pagmansay. (Talinhaga 2:1-6) Ipinaheheling kaiyan kun paano masasalidahan nin mga tawong bakong sangkap an “kaanggotan, kaongisan, karatan, pagraway, asin maraot na pagtaram” nin “pagkamoot, kaogmahan, katoninongan, pakatios, kabootan, karahayan, pagtubod, kahoyoan, pagpopogol sa sadiri.” Iyo, an Biblia makatatabang ngani saindo na magin mas marahay na drayber!—Colosas 3:8-10; Galacia 5:22, 23.