Bakong an Pinakamarahay na mga Paagi sa Pagbago
ORAS na maestablisar an ugale, paano magigibo an pagbago? Siisay an madodolokan nindo, asin anong mga paagi an magagamit tanganing magibo an nagdadanay na pag-oswag?
Helingon niato an pira sa sobra man na mga paaging ginagamit ngonyan.
Politikal na Pangigipit
An minilyon na tawo ngonyan sakop nin mga gobyerno na naghihingoang pamogolan an mga pamantayan asin paggawe. An siring na mga gobyerno ginagamit an saindang kapangyarihan tanganing magibo an pagbabago—an iba pairarom, an iba sa puwersahan. An iba ginagamit an mga paagi nin pagdodoktrina, na parateng may kaibang pananakot, pagbilanggo, asin pagpadusa. Mantang kontrolado an parabareta asin iba pang sistema edukasyonal, hinihingoa nindang salidahan an gabos na dating establisadong ideya kan gusto kan presenteng namamahala. An gabos na laen na opinyon puwersahan na pinaoontok. An siisay man na habong patokdo tibaad paagihon sa makatatakot na tratamiento na sa parate nakalalaglag sa espiritu kan tawo.
Operasyon sa Payo Asin Pagkoryente
An pirang kabtang kan hotok sinasabing nakaaapektar sa espisipikong mga ugale asin gawe-gawe. An operasyon sa payo pisikal na paghale o paglaglag sa tisyu kan hotok na yaon sa parteng iyan kan hotok. Oras na mahale, an kabtang na iyan kan saindong hotok noarin man dai na mapunsionar, asin mawawara an ano man na gawe-gawe na impluwensiado kaiyan.
Sinasabi na rinibo nang siring na operasyon an ginibo, nangorogna sa mga tawong may abnormal asin peligrosong gawe-gawe sa sekso. An iba tinalbongan nin saradit na electrode sa saindang hotok, asin kun pinadadalagan an koryente, pinupukaw kaiyan o inoolang an aktibidad kan hotok sa parteng iyan. Sinasabi na liniliwat kaini an mga inklinasyon na nakakaapektar sa gawe-gawe na kontrolado kan kabtang na iyan kan hotok.
Droga
An paggamit nin droga sa sikiyatriya lakop asin parateng kaipuhan. May mga drogang pampatoninong, drogang pampatorog, drogang pampabagsik, asin drogang pantanos sa kemikal na pagkabakong balanse sa hotok. Igwa man nin mga droga na ginamit na pankastigo sa mga kalabos asin iba pang koreksional na institusyon. An duwa sa mga drogang iyan iyo an apomorphine asin Anectine.
An apomorphine itinatao sa mga preso na an gawe-gawe ibinilang na dai maaako. Iyan ginigikanan nin grabeng pagkalula asin pagsuka. Sinasabi sa preso na kun magawe na naman sia nin maraot, tatawan na naman sia nin apomorphine. Ini inaapod man na pagbolong paagi sa paglikay. An Anectine ginigikanan nin garo sa usol, nahahakug na pagmate sa dai nagtotoltol na preso. An paghona nia magagadan na sia. Kun sia gumibo giraray nin kalokohan, iiniksionan giraray sia nin Anectine.
Ini daw an mga paaging gagamiton nindo tanganing mabago an saindong gawe-gawe?
An kadaklan sa mga paaging nasambitan minalapas sa libreng kabotan. Kalabot man dian an impluwensia nin mga tawong may kapangyarihan sa iba pero bako man na perming ikararahay kan tawong iyan an nasa isip. An politikal daw na kapangyarihan sadiring bentaha an hinahanap o kan tawo? Sa operasyon sa payo, siisay an may kapot kan kutsilyong pan-operar? Siisay an may kontrol kan swits kun ginagamit an pagkoryente? Gurano kahaloy kan epekto nin pagbolong paagi sa paglikay? Masasarigan daw an parabolong?
Pag-olayan niato an mas marahay na paagi.