Kun Taano ta Naghali an Sarong Padi sa Saiyang Relihiyon

Istoryahi man tabi kami kan buhay mo kan aki ka pa.

Ipinangaki ako sa Italy kan 1943. Nagdakula ako kaiba kan mga tugang ko sa sarong sadit na baryo na diyan parauma saka karpintero si Tatay. Pinadakula kami kan mga magurang mi na magin marahay na mga Katoliko.

Taano ta gusto mong magin padi?

Kan aki pa ako, gustong-gusto kong nagdadangog sa mga padi sa simbahan. Nagagayunan talaga ako sa boses ninda, pati man sa kahanga-hangang mga ritwal. Dahil kaiyan, pinangarap ko na talagang magin padi. Kan 13 anyos ako, piglaog ako ni Nanay sa sarong boarding school para sa mga aking lalaki na pig-aandam sa mas halangkaw na edukasyon para sa pagpadi.

Kaiba daw sa pagsasanay saindo an pag-adal sa Bibliya?

An totoo, dai. Kan 15 anyos ako, saro sa mga maestro ko an nagtao sako nin sarong kopya kan mga Ebanghelyo—an mga istorya manungod sa buhay asin ministeryo ni Jesus—tapos binasa ko iyan nin nagkapirang beses. Kan 18 anyos ako, nagpa-Roma ako para mag-eskuwela sa mga unibersidad na direktang pinapangatamanan kan papa. Nag-adal ako nin Latin saka Griego, tapos nin kasaysayan, pilosopiya, sikolohiya, saka teolohiya. Dawa nagsasambit kami nin mga bersikulo hali sa Bibliya saka nagdadangog nin mga pagbasa sa Bibliya sa mga sermon pag Domingo, dai mi man talaga pinag-aadalan an Bibliya.

Nagin rektor ka. Kaiba sa ginigibo mo an pagtukdo?

An trabaho ko panginot nang sa pag-administrar. Pero nagtukdo man ako manungod sa mga dekreto kan Second Vatican Council.

Taano ta nagpuon kang magduda sa relihiyon mo?

Tulong bagay an nakapurisaw sako. Nakikilabot sa pulitika an simbahan. Kinukunsinti an salang mga gibo kan klero saka kan mga nagsisimba. Asin may nagkapirang katukduan kan Katoliko na garo baga bakong tama. Halimbawa, paano magigibo kan Diyos nin pagkamuot na padusahan nin daing sagkod an mga tawo pagkagadan ninda? Saka, gusto daw talaga nin Diyos na uruutruhon ta nin ginatos na beses an mga pangadyi gamit an sarong rosaryo?a

Ano an ginibo mo?

Namibi ako para sa paggiya mantang nagluluha. Nagbakal man ako nin sarong kopya kan Katolikong edisyon na Jerusalem Bible, na kakapublikar pa lang sa Italian, tapos pinunan kong basahon iyan. Dangan, sarong agang Domingo mantang isinasabit ko an sotana ko pagkatapos kan Misa, may duwang lalaking nag-abot sa seminaryo. Nagpabisto sinda na mga Saksi ni Jehova. Nag-ulay kami nin labing sarong oras manungod sa Bibliya saka sa kun ano an sinasabi kaiyan manungod sa kun paano mamimidbid an tunay na relihiyon.

Ano an impresyon mo sa mga bisita?

Naghanga ako sa kumbiksiyon ninda saka sa kun gurano kadali saindang magsambit nin mga teksto sa sarong Katolikong edisyon kan Bibliya. Dangan, may saro pang Saksi, na an pangaran Mario, na nagpuon na magbisita sako. Mapasensiya siya saka talagang regular na nagbibisita sako—kada agang Sabado, mauran man o mainit, nagdo-doorbell siya sa seminaryo pag alas nuwebe.

Ano an reaksiyon kan ibang mga padi sa pagbisita kan mga Saksi?

Inagda ko sindang umiba sa mga pag-uulay mi, pero mayo ni saro sainda an sineryoso an pag-adal sa Bibliya. Pero ako, nag-enjoy ako. Nakakanuod ako nin marahayon na mga bagay, arog kan kun taano ta tinutugutan nin Diyos an karatan asin pagsakit—sarong bagay na haloy ko nang iniisip-isip.

Pinurbaran daw kan mga superyor mo na disganaron ka sa pag-adal nin Bibliya?

Kan 1975, nagkapirang beses akong nagpa-Roma para ipaliwanag an pagmansay ko. Pinurbaran kan mga superyor ko na baguhon an kaisipan ko, pero ni saro mayong naggamit nin Bibliya. Kan huri, kan Enero 9, 1976, nagsurat ako sa Roma para sabihon na dai ko na ibinibilang an sadiri ko na Katoliko. Pakalihis nin duwang aldaw, naghali na ako sa seminaryo tapos nagsakay sa tren para mag-atender sa inot na pagkakataon sa pagtiripon kan Mga Saksi ni Jehova, na idto palan sarong asembleya na aatenderan nin nagkapirang kongregasyon. Gabos diyan ibang-iba talaga kisa sa kinatudan ko! An lambang Saksi may Bibliya asin nagsusubaybay sa mga ispiker mantang tinutukar ninda an manlain-lain na tema.

Ano an reaksiyon kan pamilya mo?

Kadaklan sainda talagang pigkontra ako. Pero naaraman ko na an saro sa mga tugang kong lalaki nakikipag-adal palan sa mga Saksi sa Lombardy, na sarong rehiyon sa norteng parte kan Italy. Nagduman ako para mahiling siya, tapos tinabangan ako kan mga Saksi duman na makahanap nin trabaho asin nin maiistaran. Kan taon man sanang idto, nabawtismuhan ako bilang sarong Saksi ni Jehova.

May pinagbabasulan ka daw?

Mayo lamang! Namatian ko man giraray na talagang harani na ako sa Diyos, dahil an mga aram ko manungod saiya nakabasar sa Bibliya, bako sa pilosopiya o tradisyon kan simbahan. Asin nakakapagtukdo na ako sa iba nin may kumbiksiyon asin sinseridad.