Nagpuon an Pagsakit

SA LUWAS kan hardin nin Eden, dakul an nagin problema ni Adan asin Eva. Kaipuhan nindang magtrabaho nin magabat ’nganing may makakan. Imbes na magagayon na kahoy na namumunga, puro matunok na tinanom an nahihiling nindang nagtutubo. Nangyari ini ta dai ninda sinunod an Diyos, kaya bako na niya sindang kaamigo.

Pero an mas grabe pa, dai na sinda mabubuhay sagkod lamang. An sabi baga sainda nin Diyos magagadan sinda kun magkakan sinda kan ipinagbabawal na bunga. Sa aldaw na kakanon ninda iyan, luway-luway sindang magurang asin sa katapustapusi magagadan. Kamangmangan talaga na dai sinda nagdangog sa Diyos!

An gabos na aki ni Adan asin Eva namundag pagkatapos na pahalion sinda sa Eden. Kaya, an mga aki ninda magururang man asin magagadan.

Kun nagsunod lang ki Jehova si Adan asin Eva, magigin maugma kutana an buhay ninda saka kan mga aki ninda. Sinda gabos puwede kutang mabuhay nin daing sagkod asin maugma digdi sa daga. Mayong magurang, magkakahilang asin magagadan.

Gusto nin Diyos na an tawo mabuhay nin daing sagkod asin maugma, asin nangangako Siya na mangyayari iyan. Bako sanang magigin magayon an bilog na daga, dai na man magkakahilang an mga tawo. Saka an gabos digdi sa daga magigin mag-aramigo asin magigin amigo man nin Diyos.

Pero si Eva bako nang amigo nin Diyos. Kaya nagin makulog an pangangaki niya. Siguradong grabe su kamunduan niya dahil dai siya nagsunod ki Jehova, bako daw?

Si Adan asin Eva nagkaigwa nin dakul na aki. An matua nindang aki nginaranan nindang Cain, an ikaduwa Abel. Aram mo kun anong nangyari sainda?