Puon sa Pagkasalbar sa Ehipto Sagkod sa Inot na Hadi nin Israel

Pinanginutan ni Moises an mga Israelita hali sa Ehipto pasiring sa Bukid nin Sinai. Duman itinao sainda ni Jehova an mga pagbuot niya. Paghaloy-haloy, nagsugo si Moises nin 12 lalaki para mag-espiya sa Canaan. Pero an sampulo sainda nagbalik na may maraot na bareta. Dahil diyan, gusto na kan mga Israelita na magbalik sa Ehipto. Huling mayo sindang pagtubod, pinadusahan sinda nin Diyos. Pinabayaan niya sindang maglagaw-lagaw nin 40 taon sa kaawagan.

Pag-abot nin panahon, pinili si Josue para panginutan an mga Israelita pa-Canaan. Tanganing tabangan sindang masakop an lugar, naggibo si Jehova nin mga milagro. Pinapundo niya an bulos kan Salog nin Jordan, pinabagsak an mga lanob kan Jerico, asin pinapundo nin maghapon an paghiro kan saldang. Pagkalihis nin anom na taon, nasakop kan mga Israelita an Canaan.

Puon ki Josue, mga hukom an nanginot sa Israel sa laog nin 356 na taon. Mamimidbid ta an dakul sainda, arog ni Barak, Gideon, Jefte, Samson, asin Samuel. Mababasa man niyato an manungod sa mga babaying si Rahab, Debora, Jael, Rut, Noemi, asin Delaila. Gabos-gabos, 396 na taon nin kasaysayan an laog kan Kabtang TRES.