An Bulawan na Ugbon na Baka

AY, AY! Ano ining piggigibo kan mga tawo? Nagsasaramba sinda sa sarong ugbon na baka! Ta’no daw?

Kan haluyon na si Moises duman sa bukid, sinabi kan banwaan: ‘Dai ta aram kun ano nang nangyari ki Moises. Maray pang gumibo kita nin diyos para giyahan kita pahali digdi.’

‘Sige lugod,’ an sabi ni Aaron na tugang ni Moises. ‘Itao nindo sako an mga hikaw nindong bulawan.’ Kan iyan matipon na, tinunaw iyan ni Aaron asin ginibong bulawan na ugbon na baka. Sinabi kan mga Israelita: ‘Ini an Diyos ta, na nagsalbar sato hali sa Ehipto!’ Tapos nagpiyesta sinda asin sinamba an bulawan na baka.

Kan mahiling ini ni Jehova, angguton siya. Sinabi niya ki Moises: ‘Dali, bumaba ka. May marauton na piggigibo an banwaan. Nalingawan ninda an mga pagbuot ko asin nagsasaramba sinda sa bulawan na baka.’

Dali-daling nagbaba si Moises sa bukid. Kan harani na siya, ini an nahiling niya. An mga tawo nagkakaranta asin nagsasarayaw sa palibot kan bulawan na baka! Sa kaanggutan ni Moises, naibaribad niya an duwang tablang gapo na diyan nakasurat an mga pagbuot, asin nagkapiridaso iyan. Tapos kinua niya su bulawan na baka, tinunaw iyan, dangan rinunot nin pinong-pino.

Marauton su ginibo kan banwaan. Kaya sinabi ni Moises sa nagkapirang lalaki na kuanon an espada ninda. ‘Dapat magadan an mga nagsamba sa bulawan na baka,’ an sabi niya. Ginadan kan mga lalaki an 3,000 katawo! Ano an leksiyon digdi? Si Jehova sana an dapat sambahon, bakong an arin man na diyos-diyosan.