Madunong na mga Gibeonita

NAGHAHANDA na an mga siyudad sa Canaan para labanan an Israel. Paghuna ninda manggagana sinda. Pero iba man an nasa isip kan mga taga Gibeon. Nagtutubod sindang pigtatabangan nin Diyos an mga Israelita, asin habo nindang kalabanon an Diyos. Ano daw an gigibuhon ninda?

Nagdesisyon sinda na magsagin na taga harayong lugar. Kaya an nagkapirang lalaki sainda nagsulot nin girising bado asin purudpod na sandalyas. Kinargahan ninda an saindang mga asno nin lumang mga sako, asin nagbalon sinda nin pig-aalamag na tinapay. Tapos nagduman sinda ki Josue asin nagsabi: ‘Hali pa kami sa harayuon na lugar. Nadangog mi an manungod sa makapangyarihan nindong Diyos, si Jehova. Nabaretaan mi su gabos na ginibo niya sa Ehipto para saindo. Kaya, sinabi samo kan mga lider mi na maghanda nin kakanon, magbaklay padigdi, asin magsabi saindo: “Mga uripon nindo kami. Mangako kamo na dai nindo kami sasalakayon.” Uni, girisi na an bado mi sa halawigon na pagbaklay asin pig-aalamag na an samuyang tinapay.’

Napaniwala kan mga Gibeonita si Josue asin an iba pang mga lider. Nangako sinda na dai ninda sasalakayon an mga Gibeonita. Pero, pakalihis nin tulong aldaw, naaraman kan mga Israelita na sa harani lang sinda nakaistar.

‘Ano ta sabi nindo hali kamo sa harayo?’ an hapot sainda ni Josue.

Nagsimbag an mga Gibeonita: ‘Nabaretaan mi kaya na nangako an Diyos nindong si Jehova na itatao saindo an bilog na dagang ini nin Canaan. Natakot kami na tibaad garadanon nindo kami.’ Pero inutob kan mga Israelita an pangako ninda, asin dai ginadan an mga Gibeonita. Imbes, ginibo nindang suruguon an mga ini.

Naanggot an hadi kan Jerusalem ta nakipagkatuninungan an mga Gibeonita sa Israel. Kaya sinabi niya sa apat pang hadi: ‘Mag-iba kamo sako asin giyerahon ta an Gibeon.’ Iyan man nanggad an ginibo kan limang hading ini. Madunong daw an pakipagkatuninungan kan mga Gibeonita sa Israel? Hilingon ta.