Si David Asin si Goliat

AN MGA Filisteo nakikilaban giraray sa Israel. An tulong kuya ni David nasa hukbo na ni Saul. Kaya sarong aldaw, sinabi ni Jese ki David: ‘Darahan mo nin trigo saka tinapay an mga tugang mo. Kumustahon mo sinda.’

Pag-abot ni David sa kampo, nagdalagan siya sa nakapuwestong mga suldados para hanapon an mga tugang niya. Nagluwas an higanteng Filisteong si Goliat ’nganing tuya-tuyaon an mga Israelita. Piggigibo niya ini kada aga asin banggi sa laog na nin 40 aldaw. Nagkurahaw siya: ‘Pili kamo nin lalaking malaban sako. Kun magadan niya ako, magigin uripon nindo kami. Pero kun siya an magadan ko, kamo an magigin uripon mi. Ano, si’say an maisog saindo?’

Naghapot si David sa mga suldados: ‘Ano an itatao sa makakagadan sa Filisteong ini asin makakahali kan kasusupgan sa Israel?’

‘Tatawan siya ni Hading Saul nin dakul na kayamanan,’ an sabi kan sarong suldados. ‘Itatao man kan hadi an saiyang aki para magin agom niya.’

Pero takot an gabos na Israelita ta dakulaon si Goliat. An langkaw niya lampas nuwebe piye (mga tres metros). May kaiba man siyang tagadara kan pansangga niya.

Nabaretaan ni Saul na gusto ni David na labanan si Goliat. Kaya sinabi ni Saul ki David: ‘Dai mo siya kaya. Aki ka lang, pero siya tuod nang makilaban.’ Nagsimbag si David: ‘May ginadan akong oso asin leon na luminalay kan karnero ni Tatay. An Filisteong ini magigin arog ninda. Tatabangan ako ni Jehova.’ Sinabi ni Saul: ‘Sige, tabangan ka man lugod ni Jehova.’

Nagduman si David sa sapa asin nagkua nin limang makinis na gapo, saka ilinaag ini sa bag niya. Dinara niya an saiyang lagpitaw asin sinabat an higante. Kan mahiling siya ni Goliat, ngalason ini. Inisip niyang pasilon gadanon si David.

‘Aber daw, magrani ka sako,’ an sabi ni Goliat, ‘kun dai ko itao an saimong bangkay para kakanon kan mga gamgam asin hayop.’ Pero sinabi ni David: ‘Ika minaatubang sako na may espada, garod,a asin dyabelin, pero ako maatubang saimo sa ngaran ni Jehova. Sa aldaw na ini, itatao ka niya sa sakuyang kamot, asin gagadanon taka.’

Pagkasabi niya kaiyan, nagdalagan si David parani ki Goliat. Nagkua siya nin gapo sa bag niya, dangan todong kusog na ilinagpitaw iyan. Tuminama iyan sa payo kan higante kaya natumba ini. Gadan si Goliat! Kan mahiling kan mga Filisteo na daog na an saindang panglaban, nagdurulagan sinda gabos asin linapag sinda kan mga Israelita. Gana an Israel!