Naghali sa Babilonya an Banwaan nin Diyos

HAROS duwang taon na an nakalihis puon kan masakop kan mga Medo asin Persiano an Babilonya. Tapos hilinga ngunyan an nangyayari! Pahali na sa Babilonya an mga Israelita. Paano nangyari ini? Si’say an nagpalibre sainda?

Pinalibre sinda ni Ciro na hadi kan Persia. Haloy pa bago mamundag si Ciro, arog kaini an ipinasurat ni Jehova sa propeta niyang si Isaias manungod saiya: ‘Gigibuhon mo an gusto ko. An mga trangkahan mawawalat na bukas tanganing masakop mo an siyudad.’ Si Ciro man nanggad an nanginot sa pagsakop sa Babilonya. Banggi kaidto kan laugon iyan kan mga Medo asin Persiano, na nag-aragi sa bukas na mga trangkahan.

Pero sinabi man ni propeta Isaias na matao nin pagbuot si Ciro na itindog giraray an Jerusalem asin an templo kaiyan. Ginibo daw iyan ni Ciro? Iyo. Sinabi niya sa mga Israelita: ‘Sige, magbaralik kamo sa Jerusalem asin itindog nindo an templo ni Jehova, an saindong Diyos.’ Iyan mismo an planong gibuhon kan mga Israelitang ini.

Pero, bakong gabos na Israelita sa Babilonya makakabaklay pa-Jerusalem ta harayuon iyan. Mga 800 na kilometro an distansiya kaiyan asin an dakul sainda gurangon na o kaya may hilang. May lain man na dahilan su nagkapira kaya dai sinda nag-iba. Alagad sinabi ni Ciro sa mga dai makakaiba: ‘Tawan nindo nin plata, bulawan, asin iba pang gamit su maduruman para itindog an Jerusalem saka an templo kaiyan.’

Kaya gulping dara-dara an mga Israelitang ini. Tapos, itinao man sainda ni Ciro su mga mangko asin kopa na kinua ni Nabucodonosor sa templo ni Jehova kan gabaon niya an Jerusalem.

Pakalihis nin mga apat na bulan na pagbaklay, nakaabot an mga Israelita sa Jerusalem nin tamang-tama sa panahon. Eksaktong 70 taon na puon kan magaba asin matiwangwang an siyudad. Pero maski ngani nakabalik na an mga Israelita sa sadiri nindang nasyon, maagi sinda nin mga kadipisilan arog kan sunod na maaaraman ta.