Si Mardokeo Asin Esther

MAGBALIK kita nin pirang taon bago nagduman si Esdras sa Jerusalem. Si Mardokeo asin Esther an pinakaimportanteng mga Israelita sa kahadian nin Persia. Si Esther an reyna, asin an pinsan niyang si Mardokeo an ikaduwa sa hadi. Hilingon ta kun paano ini nangyari.

Akion pa si Esther kan magadan an mga magurang niya, kaya si Mardokeo an nagpadakula saiya. Si Hading Ahasuero kan Persia may palasyo sa Susan, asin saro si Mardokeo sa mga lingkod niya. Sarong aldaw, dai nagsunod sa hadi an agom niyang si Vasti, kaya nagpili nin bagong reyna an hadi. Aram mo kun si’say an pinili niya? An magayon na daragang si Esther.

Hilinga ining hambugon na lalaking pigdudukuan kan mga tawo. Siya si Haman, sarong halangkaw na opisyal sa Persia. Hilinga man si Mardokeo na nakatukaw sa gilid. Gusto ni Haman na magduko man saiya si Mardokeo, pero habo kaini. Para ki Mardokeo, salang magduko sa maraot na tawong arog ni Haman. Angguton si Haman, kaya ini an ginibo niya.

Nagparaistorya siya nin bakong totoo sa hadi laban sa mga Israelita. ‘Daing data sindang mga tawo na habong magsunod sa mga pagbuot nindo,’ an sabi niya. ‘Dapat sindang gadanon.’ Dai aram ni Ahasuero na Israelita si Esther kaya napatubod siya ni Haman. Ipinagbuot kan hadi na pag-abot nin sarong piniling aldaw, gagadanon an gabos na Israelita.

Kan mabaretaan ini ni Mardokeo, haditon siya. Nagpadara siya nin mensahe ki Esther: ‘Makimahirak ka sa hadi na iligtas kita.’ Pero bawal magduman sa hadi an si’say man kun dai ipinapaapod. Alagad nagduman man giraray si Esther. Iginawgaw saiya kan hadi an bulawan na baston, na nangangahulugan na dai siya gagadanon. Inimbitaran ni Esther an hadi asin si Haman sa sarong dakulang handaan. Duman, hinapot kan hadi si Esther kun anong gusto niya. Sinabi ni Esther na sasabihon niya ini sa sunod na aldaw sa saro pang handaan kaiba an hadi asin si Haman.

Mantang nagkakakan sinda, sinabi ni Esther sa hadi: ‘Ipapagadan ako asin an mga kalahi ko.’ Angguton an hadi. ‘Si’say an nangahas na gibuhon ini?’ an hapot niya.

‘An maraot na tawong ini, si Haman!’ an sabi ni Esther.

Lalong naanggot an hadi. Ipinagbuot niyang gadanon si Haman. Tapos, si Mardokeo an ginibo kan hadi na magin ikaduwa saiya. Paagi ki Mardokeo, may ginibong bagong pagbuot na nagtutugot sa mga Israelita na ipaglaban an buhay ninda sa aldaw na pinili para gadanon sinda. Dahil halangkaw na opisyal na si Mardokeo, dakul an nagtabang sa mga Israelita, kaya nakaligtas sinda sa mga kaiwal ninda.