Ginapo si Esteban

AN LALAKING nakaluhod iyo si Esteban. Saro siyang maimbod na disipulo ni Jesus. Pero hilinga an nangyayari saiya! Piggagapo ninda siya. Ta’no daw ta angguton sinda ki Esteban? Aramon ta.

Tinabangan nin Diyos si Esteban na gumibo nin makangangalas na mga milagro. Dai iyan nagustuhan kan mga lalaking ini, kaya nakipagdiskutiran sinda saiya manungod sa pigtutukdo niya. Pero tinawan siya nin Diyos nin kadunungan, asin pinatunayan ni Esteban na an itinutukdo ninda an sala. Lalo pang naanggot su mga lalaki. Pinurugulan ninda siya asin naghanap sinda nin mga maakusar saiya.

Hinapot kan halangkaw na saserdote si Esteban: ‘Ano, totoo ining mga sahot saimo?’ Nagsimbag si Esteban paagi sa mahusay na pahayag basado sa Bibliya. Sinabi niya na naanggot man kaidto sa mga propeta ni Jehova an maraot na mga tawo. Tapos sinabi pa niya: ‘Pareho lang ninda kamo. Ginadan nindo an lingkod nin Diyos na si Jesus. Dai nindo sinunod an mga pagbuot nin Diyos.’

Dahil kaini, naanggot nin grabe an mga lider nin relihiyon! Biyong nagraragot su ngipon ninda. Pero nagtangada si Esteban asin nagsabi: ‘Uto! Nahihiling ko si Jesus sa langit na nakatindog sa tuo nin Diyos.’ Pagkasabi niya kaini, tinakupan kan mga lalaki an mga talinga ninda asin dinaguso si Esteban. Ginuyod ninda siya paluwas sa siyudad.

Hinuba ninda an mga alikboy ninda asin pinabantayan sa hoben na si Saulo. Nahihiling mo siya? Tapos pigparagapo ninda si Esteban. Nagluhod siya asin namibi: ‘Diyos na Jehova, dai mo po sinda pagpadusahan huli sa maraot na gibong ini.’ Aram niyang an iba sainda nadaya sana kan mga lider nin relihiyon. Dangan, nagadan si Esteban.

Pag may naggibo saimo nin maraot, nagbabalos ka daw, o namimibi sa Diyos na padusahan sinda? Dai iyan ginibo ni Esteban o ni Jesus. Mabuot sinda maski sa mga anggot sainda. Arugon ta sinda.