Si Timoteo—Bagong Katabang ni Pablo

AN HOBEN na kaiba digdi ni apostol Pablo iyo si Timoteo. Nakaistar siya sa Listra kaiba kan pamilya niya. An saiyang ina iyo si Eunice asin an lola niya iyo si Loida.

Ikatulo ining pagdalaw ni Pablo sa Listra. Sarong taon na kan inot na magdigdi si Pablo asin Bernabe para ipahayag an maugmang bareta. Ngunyan, nagbalik si Pablo kaiba an amigo niyang si Silas.

Aram mo kun anong sinasabi ni Pablo ki Timoteo? ‘Gusto mong mag-iba samo?’ an hapot ni Pablo. ‘Makakatabang ka samo sa pagpahayag kan maugmang bareta sa hararayong lugar.’

‘Iyo po, gusto ko,’ an simbag ni Timoteo. Dai nahaloy, nagpaaram si Timoteo sa pamilya niya asin nag-iba ka Pablo. Pero bago ta aramon an manungod sa pagbiyahe ninda, hilingon ta kun ano nang piggigibo ni Pablo. Mga 17 taon na an nakaagi kan magpahiling saiya si Jesus sa dalan pa-Damasco.

Kun narurumduman mo, nagpa-Damasco si Pablo para pasakitan an mga disipulo ni Jesus, pero siya mismo disipulo na ngunyan! Paghaloy-haloy, may mga nagplanong gadanon si Pablo. Habo kaya ninda kan pigtutukdo niya. Pero tinabangan si Pablo kan mga disipulo na makadulag. Ibinugtak ninda siya sa basket asin itinunton sa luwas kan lanob kan siyudad.

Pagkatapos, nagpa-Antioquia si Pablo para ipahayag an maugmang bareta. Digdi inot na inapod na mga Kristiyano an mga parasunod ni Jesus. Dangan ipinadara si Pablo asin Bernabe tanganing magpahayag sa hararayong nasyon. Saro sa mga dinalaw ninda iyo an Listra, na lugar ni Timoteo.

Pakalihis nin sangtaon, nagbalik si Pablo sa Listra. Kan mag-iba si Timoteo ki Pablo asin Silas, aram mo kun sain sinda nagduman? Hilingon ta sa mapa an pira sa mga lugar.

Inot, nagduman sinda sa Iconio, dangan sa saro pang siyudad na inaapod man na Antioquia. Tapos, nagbiyahe sinda pasiring sa Troas, saka sa Filipos, Tesalonica asin Berea. Nahihiling mo an Atenas sa mapa? Nagtukdo diyan si Pablo. Pagkatapos, saro may kabangang taon sindang nagpahayag sa Corinto. Kan huri, naghapit sinda sa Efeso. Dangan nagbarko sinda pabalik sa Cesarea saka nagbaklay pa-Antioquia, kun sain naghaloy si Pablo.

Ribo-ribong kilometro an pigbiyahe ni Timoteo asin Pablo ’nganing ipahayag an ‘maugmang bareta’ asin magbilog nin dakul na kongregasyon. Pagdakula mo, aarugon mo daw si Timoteo, na maimbod na lingkod nin Diyos?