Suminadsad sa Sarong Isla

HILINGA! Nagkakararaot na an barko! Nagrulukso sa tubig an mga pasahero. An iba sainda nakaabot na sa may baybayon. Ano, si Pablo iyan? Aramon ta kun anong mga nangyari saiya.

Kun nagigirumduman mo, duwang taon na nakapreso si Pablo sa Cesarea. Tapos, isinakay siya sa barko kairiba an iba pang mga preso tanganing darahon sa Roma. Pag-agi ninda harani sa isla nin Creta, inabot sinda nin makusugon na bagyo. Huling sa grabeng kusog kan duros, dai makontrol kan mga tripulante an barko. Dai na ninda nahihiling an saldang pag aldaw o an mga bituon pag banggi. Paglihis nin dakul na aldaw, an mga nakasakay sa barko nawaran na nin paglaom na makaligtas pa.

Sinabi ni Pablo sa mga pasahero: ‘Mayo ni saro na magagadan; an barko sana an mararaot. Kasubanggi, sinabi sako kan anghel nin Diyos, “Dai ka matakot Pablo! Kaipuhan kang umatubang sa Romanong tagapamahala na si Cesar. Ililigtas nin Diyos an gabos na kairiba mo sa barko.”’

Kaidtong matanga na kan ika-14 aldaw pagpuon kan bagyo, nariparo kan mga tripulante na naghahababaw an tubig! Sa takot nindang sumalpok sa mga gapo sa diklom, ibinaba ninda an mga angkla. Kan sunod na aldaw may natanaw sindang isla. Naglayag sinda pasiring sa baybayon kaiyan.

Kan harani na sinda, suminadsad an barko asin dai na makahali. Pigrapado iyan nin mga alon kaya nararaot na iyan. Nagsabi an opisyal nin mga suldados: ‘An gabos na tataong maglangoy, maglukso sa dagat saka maglangoy pasiring sa baybayon. Su dai tataong maglangoy, maglukso kasunod ninda tapos magkapot sa mga pidaso kan barko.’ Iyan an ginibo ninda. Kaya an 276 na sakay kan barko gabos nakaabot nin ligtas sa baybayon, arog kan ipinangako kan anghel.

An isla inaapod na Malta. Mabuuton an mga tawo duman, asin inasikaso ninda an mga nakaligtas. Kan magrahay su kamugtakan nin panahon, isinakay si Pablo sa ibang barko pasiring sa Roma.