Kapitulo 14

‘Ako Nakikipagtipan sa Saindo Para sa Sarong Kahadean’

1. Kan banggi bago magadan si Jesus anong paglaom an ibinugtak nia sa atubangan kan saiyang mga apostol?

KAIDTONG banggi bago si Jesus gadanon na sia nagsabi sa saiyang maimbod na mga apostol: ‘Sa harong kan sakong Ama kadakol kan ontokan. Ako maduman tanganing mag-andam nin lugar para sa saindo, tangani na kun saen ako duman man kamo.’ Sia nagsabi pa sa sainda: “Ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.” (Juan 14:2, 3; Luc. 22:29) Kamakangangalas nanggad kan paglaom na ibinugtak nia sa atubangan ninda!

2. Pira an makakaibanan ni Cristo sa saiyang langitnon na Kahadean?

² Minsan siring, dai boot sabihon ni Jesus na idto sanang mga apostol na idto an maghahade kaiba nia sa saiyang langitnon na Kahadean. Kan huri ipinahayag na an 144,000 na mga binalukat hale sa daga an magkakaigwa kan makangangalas na pribilehiyong iyan. (Kap. 5:9, 10; 14:1, 4) Igwa daw nin nagkapira ngonyan na naghihingoa na makapangapot dian?

Pagtipon sa mga Paramana kan Kahadean

3. Sa saiyang ministeryo sa publiko, sa anong oportunidad inapod ni Jesus an atension?

³ Pakatapos na si Juan Bautista ibilanggo ni Herodes Antipas, ginibo ni Jesus an maigot na kampanya nin paghuhulit sa publiko na dian isinentro nia an atension sa “kahadean kan kalangitan.” (Mat. 4:12, 17) Ipinaaram nia sa mga tawo na may oportunidad para sa sainda na lumaog sa Kahadean na iyan, asin an saiyang mga disipulo maigot na naghingoa na kamtan an premyong iyan.—Mat. 5:3, 10, 20; 7:21; 11:12.

4. (a) Kasuarin linahidan kan banal na espiritu an enot sa mga disipulo ni Jesus? (b) Ano an nagpapaheling na poon kaidto itinatao an atension sa pagtipon sa mga paramana kan Kahadean?

⁴ Kan Pentecostes nin 33 C.E. an enot sa mga disipulo ni Jesus linahidan kan banal na espiritu. (Gibo 2:1-4; 2 Cor. 1:21, 22) An probisyon nin Dios para sa kaligtasan na pasiring sa inmortal na buhay sa langit ipinahayag. Ginamit ni Pedro an “mga liyabe kan kahadean kan kalangitan” tanganing buksan an kaaraman na ini—primero sa mga Judio, sumunod sa mga Samaritano, dangan sa mga taganasyon na Hentil. (Mat. 16:19) Itinatao an espesyal na atension sa pagbilog sa gobyerno na maghahade sa katawohan sa laog nin 1,000 taon, asin haros an gabos na ipinasabong na surat sa Kristianong Griegong Kasuratan sa pangenot ipinanonongod sa grupong ini nin mga paramana sa Kahadean—“an mga banal,” “mga may kabtang sa langitnon na pag-apod.”a

5. An pagkaapod daw sa sainda sa langitnon na buhay huli ta sinda mas marahay na mga lingkod nin Dios ki sa mga nabuhay bago kaidto?

⁵ An pagkaapod sa sainda sa langitnon na buhay bakong huli ta sinda mas marahay ki sa gabos na lingkod nin Dios na nagadan bago kan Pentecostes nin 33 C.E. (Mat. 11:11) Imbes, ngonyan pinonan ni Jehova na pilion an magigin kairibang hade ni Jesu-Cristo. Sa laog nin 19 siglo pakalihis kaini saro sana an pag-apod, an langitnon. Idto dai na kutana maninigong pagkaherak na itinao nin Dios sa sarong limitadong kabilangan tanganing maotob an saiyang madonong asin mamomoton na mga katuyohan.—Efe. 2:8-10.

6. (a) Taano ta kinakaipuhan na umabot an panahon na matatapos an langitnon na pag-apod? (b) Siisay an magiya sa mga bagay tanganing an hula manongod sa “dakulang kadaklan” maotob man, asin ano an aktuwal na nangyari?

⁶ Pag-abot nin panahon an itinalaan alagad limitadong kabilangan na 144,000 makokompleto. An ultimong pagtanda sa espirituwal na mga Israelitas na ini bilang inoyonan harani na. (Kap. 7:1-8) Dangan si Jehova, paagi sa saiyang espiritu asin sa pakasabot sa saiyang Tataramon na pinapangyari nia para sa saiyang naheheling na organisasyon, magiya sa mga bagay tanganing maotob an saro pang kabtang kan saiyang katuyohan, na sinasabi sa Kapahayagan 7:9-17. An sarong “dakulang kadaklan” hale sa gabos na nasyon titiponon, na igwa kan makaoogmang paglaom na makaligtas sa dakulang kahorasaan asin mabuhay sagkod lamang na may pagkasangkap sa sarong daganon na Paraiso. Kun hohorophoropon niato an aktuwal na nangyari, minalataw na an langitnon na pag-apod sa pankagabsan natapos kaidtong taon 1935 C.E., kan an daganon na paglaom kan “dakulang kadaklan” malinaw na nasabotan. Poon kaidto ikinaasosyar sa pira sanang ribong natatada kan langitnon na grupo an minilyon na parasamba ki Jehova na odok na naglalaom na mabuhay sagkod lamang digdi mismo sa daga.

7. Posible daw na an nagkapira dawa ngonyan umako kan langitnon na pag-apod, asin taano ta siring an saindong simbag?

⁷ Ini daw nangangahulogan na mayo na nin inaapod ngonyan an Dios para sa langitnon na buhay? Sagkod na dai pa nagigibo an ultimong pagtanda, posible na an nagkapira na igwa kan paglaom na iyan dai magmaimbod, asin kinakaipuhan na pilion an iba tanganing sumalida sa sainda. Alagad garo baga rasonable na ini magigin bihira sana.

Espirituwal na mga Aki—Paano Ninda Naaaraman?

8. Anong paliwanag an itinatao ni Pablo na nagpapaheling kun paano an mga pinaniaki kan banal na espiritu nakakaaram kan bagay na iyan?

⁸ An espiritu nin Dios nagtatao nin positibong kasegurohan sa pag-ampon bilang espirituwal na mga aki sa bautisadong mga Kristiano na nag-ako kan langitnon na pag-apod. Ipinaheling ini ni apostol Pablo kan sia sumurat sa “mga banal” sa Roma, na ilinaladawan an kamugtakan nin gabos na tunay na Kristiano kan panahon na idto. Sia nagsabi: “An gabos na ginigiyahan kan espiritu nin Dios, ini an mga aki nin Dios. Huli ta kamo dai nag-ako nin espiritu nin kaoripnan na ginigikanan giraray nin takot, kundi kamo nag-ako nin espiritu nin pagpaniakia, na paagi kaiyan kita nag-aapod: ‘Abba, Ama!’ An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nin Dios, alagad kapwa mga paramana ni Cristo, basta kita iribang magtios tangani man kitang iribang mapamuraway.”—Roma 1:7; 8:14-17.

9. Paano “an espiritu man sana nagpapatotoo” kaiba kan espiritu kan mga tunay na aki nin Dios?

⁹ Dinadara sa satong atension digdi an duwang paggamit sa terminong “espiritu”: “an espiritu man sana” asin an “satong espiritu.” An enot iyo an dai naheheling na puwersa aktiba nin Dios. Pinupukaw kaiyan sa saiyang espirituwal na mga aki an marigon na pagtubod na sinda inampon bilang talingkas na mga aki nin Dios. An espiritung iyan nagpapatotoo man paagi sa ipinasabong na Tataramon nin Dios, an Biblia, na garo personal na surat sa saiyang espirituwal na mga aki. (1 Ped. 1:10-12) Kun nababasa kan mga pinaniaki kan banal na espiritu an sinasabi kan Kasuratan sa espirituwal na mga aki nin Dios, sinda tamang nakakapagsabi: ‘Iyan aplikado sa sako.’ Kaya an mismong puwersa aktiba nin Dios nagpapatotoo sa laen-laen na paagi kaiba kan saindang espiritu, an puwersang nagmomotibar sa saindang sadiring isip asin puso, na sinda mga aki nin Dios. Kaoyon sa ipinaririsa kan espiritu nin Dios, an saindang isip asin puso nagigin marigon sa paglaom na magin kairibang paramana ni Cristo, asin inaako ninda an mga paninimbagan kan espirituwal na mga aki nin Dios.—Fil. 3:13, 14.

10. (a) Anong mga bagay an sa saindang sadiri dai nagpapamidbid sa saro bilang linahidan na Kristiano? (b) Ano an punto-de-vista kan “ibang karnero” manongod sa saindang kamugtakan sa katuyohan nin Dios?

¹⁰ Totoo daw iyan sa saindo? Kun iyo, kamo igwa nin makangangalas na pribilehiyo. Minsan siring, magigin sala na isipon nin siisay man na huli ta an saro igwa nin pakasabot sa mas hararom na espirituwal na mga bagay o mahigos sa ministeryo sa langtad o may mainit na pagkamoot para sa saiyang mga tugang sia segurado na sarong Kristiano na linahidan nin espiritu. An mismong mga bagay na iyan totoo man sa dakol na “ibang karnero.” An saindang puso napapahiro man kan nababasa ninda sa Kasuratan manongod sa kairibang paramana ni Cristo, alagad ta dai sinda nangangahas na maghingako nin bagay na dai itinagama nin Dios para sa sainda. (Ikomparar an Bilang 16:1-40.) Minimidbid ninda an orihinal na katuyohan nin Dios para sa daga asin may pag-apresyar na naghihingoa na makapakikabtang dian.

Pakikikabtang nin Angay

11. Siisay an minaatender sa taonan na pagselebrar sa paggirumdom sa kagadanan ni Jesus, asin taano?

¹¹ Kada taon, sa Nisan 14, pagkasolnop kan aldaw, an linahidan na mga parasunod ni Jesu-Cristo sa gabos na kabtang kan daga ginigirumdom an saiyang kagadanan, kaoyon sa mga instruksion na itinao nia sa saiyang mga apostol. (Luc. 22:19, 20) An mga “ibang karnero” nag-aatender man, bakong bilang mga nakikikabtang sa tinapay asin arak, kundi bilang magalang na mga paramasid.

12. Paano an nagkapirang enot na Kristiano sa Corinto dai nakapagpaheling nin tamang pag-apresyar sa Pamanggihan kan Kagurangnan?

¹² Ini bakong daing kamanungdanan na relihiyosong rituwal kundi pano nin mapuwersang kahulogan. Sa mga Kristiano sa Corinto, Grecia kan enot na siglo, na an nagkapira dai nakapagpaheling nin tamang pag-apresyar sa okasyon, si apostol Pablo nagsurat nin magabat na hatol, na sinasabi: “An siisay man na kumakan kan tinapay o uminom kan kopa nin Kagurangnan na bakong angay magkakasala mapadapit sa hawak asin sa dugo kan Kagurangnan.” Ano an dahelan na sinda nagin ‘bakong angay’ na mga nakikikabtang? Dai ninda inandam nin tama an saindang puso asin isip. May mga pagkabaranga sa kongregasyon. An iba man nagpalabilabi sa kakanon asin inomon bago an pagtiripon. Indiperente sinda sa Pamanggihan kan Kagurangnan. Mayo sinda sa kamugtakan na mamansayan an seryosong kahulogan kan tinapay asin kan arak.—1 Cor. 11:17-34.

13. Ano an kahulogan kan tinapay asin arak na ilinilibot sa Memorial?

¹³ Ano an kahulogan kaiyan? Iyan mayo sa ipinamumugtak na milagrosong pagkaliwat kan tinapay asin kan arak. Si Cristo dai sa ano man na sentido iinaatang giraray sa kada Memorial. An Kasuratan nagsasabi na “an Cristo idinolot nin makasaro sa gabos na panahon tanganing magpasan sa mga kasalan kan kadaklan.” (Heb. 9:28; 10:10; Roma 6:9) An daing lebadurang tinapay asin an mapulang arak mga emblema sana tanganing magrepresentar sa literal na hawak na iinatang ni Jesus asin sa literal na dugo na saiyang pinabolos. Alagad ta napakahalaga nanggad kan mga katunayan na ini! An daing kasalan na hawak ni Jesus bilang tawo itinao tanganing an kinaban nin katawohan magkaigwa kan oportunidad na mabuhay sagkod lamang. (Juan 6:51) Asin an saiyang pinabolos na dugo may duwang katuyohan na naootob—linilinigan sa kasalan an mga tawo na minatubod dian, siring man ginigibong may epekto an bagong tipan sa pag-oltanan nin Dios asin kan kongregasyon nin espirituwal na Israel, na kompuwesto nin linahidan nin espiritung mga Kristiano. (1 Juan 1:7; 1 Cor. 11:25; Gal. 6:14-16) An mahahalagang probisyon na ini an nagpapangyari para sa mga miembro kan “sadangoton na aripompon” na ikapahayag nin Dios na matanos, na sa aktuwal iinaatribuwir sa sainda an pagkasangkap nin tawo. (Luc. 12:32) Ini ginigibo tanganing sinda paniakion kan banal na espiritu bilang mga aki nin Dios, sa katuyohan na sinda makaibanan ni Cristo sa saiyang langitnon na Kahadean. Sa saindang pakikikabtang sa mga emblema sa Memorial taon-taon, na sa siring nagpapatotoo sa saindang langitnon na paglaom, an saindang pag-apresyar sa pagigin nasa “bagong tipan” na si Cristo an tagapag-oltanan napapakosog giraray asin napapararom.—Heb. 8:6-12.

“Maiba Kami Saindo”

14. (a) Taano an “ibang karnero” ta dai nakikikabtang sa mga emblema sa Memorial, alagad ta ano an odok na hinahalat ninda? (b) Ano an punto-de-vista ninda manongod sa saindang pakikiiba sa natatada sa mga paramana kan Kahadean?

¹⁴ Namamansayan kan “ibang karnero” kun paano an pagtratar ni Jehova sa saiyang mga linahidan, asin sinda nakiiba sa sainda, na sinasabi: “Maiba kami saindo, huli ta nabaretaan niamo na an Dios yaon dian sa saindo.” (Zac. 8:20-23) Sinda bako sanang nagtitiripon kundi nagtatarabangan sa pagpahayag kan maogmang bareta kan Kahadean sa bilog na ineerokan na daga. Minsan siring, an mga “ibang karnero” dai pinalalaog sa “bagong tipan” na ginibo sa espirituwal na Israel ni iiniiba man sinda sa “tipan . . . para sa sarong kahadean” na ginibo ni Jesus sa mga pinili na makaibanan nia sa langitnon na buhay, asin kun siring, tama sana, dai sinda nakikikabtang sa mga emblema sa Memorial. (Luc. 22:20, 29) Alagad mantang naootob kan “bagong tipan” an katuyohan kaiyan, na tinitipon an huring mga miembro kan “sadangoton na aripompon” sa langitnon na Kahadean, naaaraman kan “ibang karnero” na ini nagpaparisa na an mga bendisyon na aakoon ninda sa daga paagi sa Kahadean na iyan harani na. Ibinibilang nindang sarong pribilehiyo, sa “huring mga aldaw” na ini, na maglingkod na kasaro kan maimbod na natatada sa mga paramana kan Kahadean.

[Nota sa Ibaba]

Pagrerepaso

● Taano an kadaklan sa Kristianong Griegong Kasuratan ta nagtatao nin atension sa langitnon na paglaom?

● Paano an mga pinaniaki bilang mga aki nin Dios nakakaaram kaiyan? Ano an kahulogan kan mga emblema sa Memorial na pinakikikabtangan ninda?

● Paano ipinaheheling kan mga “ibang karnero” na sinda tunay na kasaro kan “sadangoton na aripompon”?