Kapitulo 20
An Buhay Asin Dugo—Ibinibilang daw Nindong Banal Iyan?
1. (a) Ano an punto-de-vista nin Dios manongod sa buhay? (b) Paano niato ikakapaheling na inaapresyar niato an balaog nin Dios na buhay?
DAI niato maninigong ipagngalas na an punto-de-vista nin Dios manongod sa buhay laen na gayo sa kinaban. Para sa Dios, an buhay nin tawo banal. Arog man daw kaiyan an pagheling nindo dian? Kita biyong nagsasarig sa Dios, na “nagtatao sa gabos nin buhay asin hinangos asin gabos na bagay.” (Gibo 17:25-28; Sal. 36:9) Kun kapareho sa Dios an satong punto-de-vista, iingatan niato an satong buhay. Pero dai niato lalapason an banal na pagboot sa paghihingoa na iligtas an satong presenteng buhay. Pinahahalagahan niato an panuga nin Dios na buhay na daing katapusan sa mga tunay na nagtutubod sa saiyang Aki.—Mat. 16:25, 26; Juan 6:40; Jud. 21.
2. Kiisay na kaisipan manongod sa buhay an ipinaheheling kan kinaban, asin kun beses ini nagdadara sa anong klaseng pangangatanosan?
2 Al kontraryo, si Jesus nagsabi na si Satanas na Diablo, an poon kan kinaban na ini, “paragadan sa kapinonan.” (Juan 8:44; 12:31) Poon sa kapinonan kan saiyang pagrebelde sia nagdara nin kagadanan sa katawohan. An madahas na kasaysayan kan kinaban nagpapaheling kan saiyang espiritu. Pero si Satanas puwede man na magtao nin garo baga laen na itsura. Kaya an mga tawo na naimpluwensiahan kan saiyang kaisipan nangangatanosan na, minsan ngani marahay man an magin relihiyoso, kun nakataya an buhay makikinabang kamo sa pagdangog sa saindang “ekspertong” hatol imbes na magkotar sa Biblia. (Ikomparar an 2 Corinto 11:14, 15.) Kun napapaatubang sa situwasyon na buhay-o-kagadanan, saen an direksion kan saindong puso? Siyempre, an kamawotan niato paogmahon si Jehova.
3. (a) Taano ta maninigo kitang espesyal na interesado sa sinasabi kan Biblia manongod sa dugo? (b) Basahon an Genesis 9:3-6 asin Gibo 15:28, 29, dangan simbagon an mga hapot na nalilista sa itaas kaiba kan mga tekstong ini.
3 An Tataramon nin Dios nagpapaheling nin haraning relasyon sa pag-oltanan nin buhay asin dugo, na sinasabi: “An kalag [o buhay] kan laman yaon sa dugo.” Kun paanong an buhay banal, ginibo man na banal nin Dios an dugo. Iyan bagay na sadiri nia, na gagamiton sana sa paagi na inooyonan nia. (Lev. 17:3, 4, 11; Deut. 12:23) Kaya marahay na pag-adalan niato nin maingat kun ano an hinahagad nia sa sato mapadapit sa dugo.
Basahon an Genesis 9:3-6
Anong mga kaugalean sa saindong lugar an naghahagad saindo na mag-alisto tanganing dai makakakan nin dugo nin hayop?
Huli sa sinasabi sa bersikulo 4 manongod sa dugo nin hayop, ano an reaksion nindo sa pag-inom sa dugo nin tawo (na ginibo sa mga ralaban nin gladiador sa Roma)?
Arog kan ipinaheheling sa bersikulo 5 asin 6, kiisay pangenot na maninimbag an saro para sa pagpabolos nin dugo nin tawo?
Basahon an Gibo 15:28, 29
Sinasabi daw kaini na an mga kahagadan maaplikar sana sa limitadong panahon? Iyan daw aplikado sa sato?
Ipinupuwera daw an dugo nin tawo sa pananaram na ginamit digdi?
Ipinaririsa daw kan teksto na puwedeng gibohon an mga eksepsion kun may emerhensia?
4. Arog kan ipinaliliwanag digdi, anong aksion an ipinaheheling kan Kasuratan na tibaad kaipuhan na gibohon nin saro tanganing dai makikabtang sa pagkakasala sa dugo?
4 Kun dapit sa dugo nin tawo, dai niato puwedeng ipamugtak na basta dai kita gumadan kita dai nang kasalan. Ipinaheheling kan Kasuratan na kun kita kabtang nin ano man na organisasyon na may kasalan sa dugo sa atubang nin Dios, kaipuhan na putulon niato an relasyon niato dian kun habo niatong makikabtang sa mga kasalan kaiyan. (Kap. 18:4, 24; Miq. 4:3) An siring na aksion dapat na asikasohon tolos.
5. Paano an kahigosan sa ministeryo sa langtad konektado sa pagigin daing kasalan sa dugo?
5 Sa kaso kan mga lingkod nin Dios na isinugo nia na magpatanid manongod sa nagdadangadang na paglaglag sa dakulang kahorasaan, an pagdadanay ninda na daing kasalan sa dugo naghahagad na maimbod nindang ibalangibog an mensaheng iyan. (Ikomparar an Ezequiel 3:17-21.) Ibinilang ni apostol Pablo na sia may utang sa gabos na klase nin tawo huli sa ministeryo na itinao sa saiya. Nakamate sana sia na dai nang paninimbagan sa saindang dugo kan sia makapagtao na nin lubos na patotoo sa sainda manongod sa probisyon nin Dios para sa kaligtasan. (Roma 1:14, 15; Gibo 18:5, 6; 20:26, 27) An saindo daw na kahigosan sa ministeryo sa langtad nagpapaheling nin kaagid sa pakamate sa paninimbagan na nasa gabos na Saksi ni Jehova?
6. Ano an koneksion kan paglikay sa aksidente sa paggalang sa kabanalan nin buhay?
6 An nakagagadan na mga aksidente maninigo man na tawan niato nin seryosong pag-asikaso. Sa irarom kan Pagboot ni Moises an mga tawo na dai tinutuyong nagin dahelan kan pagkagadan nin kapwa tawo dai ibinilang na daing sala. May itinaong mga penalidad. (Ex. 21:29, 30; Deut. 22:8; Bil. 35:22-25) Kun isasapuso niato an prinsipyong napapalabot, magmamaan kita na dai magkontribuwir sa ano man na nakagagadan na aksidente paagi sa pagmaneho niato sa sakayan, sa rungaw na pag-alasuwerte niato o sa pagpabaya na magkaigwa nin mga kamugtakan na delikado sa satong harong o sa lugar kan satong negosyo. An saindo daw na kaisipan manongod sa mga bagay na ini nagpaparisa nin lubos na pakasabot sa kabanalan nin buhay?
Ano Man an Medikal na Paggamit nin Dugo?
7. (a) An pagsasalin daw nin dugo hale sa sarong tawo pasiring sa iba kaoyon sa kabanalan nin dugo? (b) Taano ta bakong rasonable na limitaran an pagboot na ‘lumikay sa dugo’ sa mga kaugalean na uso kan enot na siglo?
7 Minsan ngani bakong bago an kaugalean, partikularmente sa ika-20 siglong ini an dugo ginamit nin lakop para sa mga pagsasalin, sa katuyohan na susteniran an buhay. An bilog na dugo asin an pangenot na mga parte nin dugo pareho ginagamit sa paaging ini. Siyempre, an mga paaging iyan sa medikal dai naggagarantiya na an pasyente dai magagadan. An totoo, may beses na nangyayari an kagadanan bilang direktang resulta kan siring na paggamit nin dugo. Alagad mas importante pa—An kahagadan daw kan Biblia na kita ‘lumikay sa dugo’ aplikado sa medikal na kaugalean na ini? Iyo! An paglaog nin dugo sa hawak hale sa ibang linalang, tawo man o hayop, minalapas sa banal na pagboot. Iyan nagpapaheling nin dai paggalang sa kabanalan nin dugo. (Gibo 15:19, 20) Mayo nin pasisikadan na limitaran an pagboot na ‘lumikay sa dugo’ sa mga kaugalean na uso kan enot na siglo asin sa siring ipuwera an modernong mga paagi medikal. Mangatanosan sa bagay: Siisay an masabi na an pagboot kan Biblia tumang sa paggadan dai kaiba an ilegal na pagkua sa buhay nin tawo paagi sa badil, ta kaidto sanang ika-10 siglo naimbento an pulbura? Asin rasonable daw na mangatanosan na an pagprohibir sa pagbuburat aplikado sana may koneksion sa mga inomon kaidtong enot na siglo asin bakong sa mga arak sa modernong aldaw? Para sa mga tawo na talagang boot na mapaogma an Dios, an mensahe na itinatao kan pagboot na ‘lumikay sa dugo’ malinaw.
8. (a) Paano nindo madedeterminaran kun baga an sarong paagi medikal maninigo sa Kristiano? (b) Kun gusto nin doktor na kuanon an iba sa saindong dugo, istakon iyan dangan ibuwelta iyan sa saindong hawak sa panahon nin operasyon, anong mga prinsipyo sa Biblia an makatatabang saindo na gumibo nin tamang desisyon? (c) Paano puwedeng mangatanosan an saro manongod sa pagbolong na nagkakaipo na an dugo magsirkular paagi sa aparato na nasa luwas kan hawak?
8 Minsan siring, an pagkakomplikado nin pirang medikal na paagi tibaad magpalataw sa mga hapot. Paano daw mareresolberan ini? Enot, humagad sa doktor nindo nin malinaw na paliwanag sa isinusuherir na paagi. Dangan mapagngayongayong analisaron iyan sa liwanag kan mga prinsipyo sa Biblia. Tibaad isuherir kan doktor na an iba sa saindong dugo kuanon asin istakon tanganing gamiton, kun kaipuhan, sa maabot na operasyon. Maoyon daw kamo? Girumdoma na, sono sa Pagboot nin Dios na itinao paagi ki Moises, an dugo na hinale sa sarong linalang kaipuhan na ibubo sa daga. (Deut. 12:24) Kita ngonyan bakong sakop kan Pagboot, pero an pundamental na mensahe iyo na an dugo banal asin, kun hinale sa hawak, kaipuhan na ibuwelta sa Dios paagi sa pagbubo kaiyan sa saiyang tongtongan, an daga. (Ikomparar an Mateo 5:34, 35.) Kaya paano magigin tama na istakon an saindong dugo (dawa kun sa halipot sanang panahon) dangan ibuwelta iyan sa saindong hawak? Alagad ano kun sabihon kan doktor na, sa panahon kan operasyon o iba pang pagbolong, an saindong dugo papaagihon sa aparato na nasa luwas kan saindong hawak, dangan, mabalik man sana? Maoyon daw kamo? An iba nag-isip na, malinaw an konsensia, matotogotan ninda ini, basta an aparato paandaron nin fluidong bakong dugo. Ibinilang ninda an aparato na kasumpay kan saindang sistema nin sirkulasyon. Siyempre, laen-laen an kamugtakan, asin kamo an dapat na magdesisyon. Alagad an saindong desisyon maninigong magtao saindo nin malinaw na konsensia sa atubang nin Dios.—1 Ped. 3:16; 1 Tim. 1:19.
9. (a) Tanganing makaseguro na igagalang an saindong desisyon na ‘lumikay sa dugo,’ anong mga pangandam an kaipuhan na gibohon? (b) Minsan sa panahon nin emerhensia, paano kun beses malilikayan an maraot na diriskutiran? (c) Kun ipirit nin doktor o hokoman an pagsasalin nin dugo, ano an gigibohon nindo?
9 Tanganing makaseguro na igagalang kan saindong doktor an desisyon nindo na ‘lumikay sa dugo,’ kaolayon sia bago mangyari an ano man na medikal na emerhensia. Kun kaipuhan na lumaog sa ospital, mangandam na gumibo nin nasusurat na kahagadan na dai paggamiton an dugo, siring man ipakipag-olay iyan nin personal sa doktor na magkakapot sa kaso nindo. Alagad ano kun may dai linalaoman na emerhensia? An maraot na diriskutiran parateng malilikayan paagi sa pagkaigwa nin magalang, rasonableng pakipag-olay sa doktor, na dinadagka sia na gamiton an saiyang abilidad na tumabang, pero may paggalang man sa saindong Kristianong konsensia. (Tal. 15:1; 16:21, 23) Minsan siring, kun an tibaad marahay man an intension na medikal na mga tawo mag-insistir na an pagsayuma sa dugo magsasapeligro sa satong buhay asin kun siring piriton kitang tumogot, ano na? An pagtubod sa pagigin tama kan mga dalan ni Jehova maninigong magparigon sa sato. An kaimbodan ki Jehova dapat na magpangyari sato na determinadong kumontra, ta pinipili niatong kuyugon an Dios imbes na mga tawo.—Gibo 5:29; ikomparar an Job 2:4; Talinhaga 27:11.
Gurano Kaseryoso kan Bagay?
10. Taano an paghihingako na an pagsasalin kaipuhan tanganing iligtas an buhay ta dai makaliliwat sa satong punto-de-vista sa bagay?
10 Para sa mga dai pa nakakamidbid ki Jehova, an mga pangangatanosan apabor sa pagsasalin nin dugo tibaad kun beses garo baga nagpapaheling nin halangkaw na paggalang sa kabanalan nin buhay. Alagad dai niato nalilingawan na an dakol na nangangatanosan nin arog kaini nagkokonsinte man sa paglaglag sa buhay paagi sa aborsion. Mas nakakaaram si Jehova manongod sa buhay asin dugo ki sa siisay man na medikal na “eksperto.” An gabos Niang pagboot napatunayan na para sa satong ikararahay, na iniingatan an satong presenteng buhay asin an paglaom niato sa ngapit. (Isa. 48:17; 1 Tim. 4:8) Iba man daw an pagboot na ‘lumikay sa dugo’?
11. (a) Ano an solamenteng paggamit sa dugo na itinogot ni Jehova sa mga Israelitas? (b) Taano ta napakahalaga kaini sa sato bilang mga Kristiano?
11 An pagigin seryoso kan paggalang sa kabanalan nin dugo idinodoon kan isinabi ni Jehova manongod sa solamenteng paggagamitan sa dugo. “An kalag kan laman yaon sa dugo, asin ako mismo nagbugtak kaiyan sa ibabaw kan altar tanganing magin pantubos para sa saindong kalag, huli ta an dugo iyo an minatubos paagi sa kalag na yaon dian. Kaya ngani ako nagsabi sa mga aki ni Israel: ‘Daing kalag sa saindo an magkakan nin dugo.’” (Lev. 17:11, 12) An gabos na dugo nin hayop na ibinubo sa altar ni Jehova kaoyon sa kahagadan na iyan nanganino sa mahalagang dugo ni Jesu-Cristo. (Heb. 9:11, 12; 1 Ped. 1:18, 19) Kaya an kabanalan kan dugo ni Jesus mismo idinodoon kan pagboot nin Dios na nangangalad nin ibang paggamit sa dugo. Digdi maheheling na an ano man na salang paggamit sa dugo nagpapaheling nin dakulang paglapastangan sa probisyon ni Jehova para sa kaligtasan paagi sa saiyang Aki.
12. Kun napapaatubang sa kagadanan, taano an tunay na Kristiano ta dai magibo nin salang paggamit sa dugo sa paghihingoa na mabuhay?
12 Kun napapaatubang sa situwasyon na buhay-o-kagadanan, magigin halipot nanggad an pananaw kan pagtalikod sa Dios! Minsan ngani inaapresyar niato an paglilingkod nin maimbod na mga doktor, dai niato desesperadong pinagmamaigotan na buhayon an satong sadiri o an satong mga namomotan sa laog nin pira pang aldaw o taon paagi sa paglapas sa pagboot nin Dios, na garo baga iyo na sana ini an buhay. Kita may pagtubod sa halaga kan pinabolos na dugo ni Jesus asin sa buhay na daing sagkod na pinapangyayari kaiyan. Sa bilog niatong puso kita nagtutubod na an maimbod na mga lingkod nin Dios—dawa an mga nagadan—babalosan nin buhay na daing sagkod.—Juan 11:25; 1 Tim. 4:10.
Pagrerepaso
● Ano an minagibo sa buhay asin dugo na banal? Taano an kinaban ta nangangatanosan apabor sa ibang punto-de-vista?
● Kun dapit sa mga hayop, paano kita nagpapaheling nin paggalang sa kabanalan kan saindang dugo?
● Sa anong laen-laen na paagi maninigong ipaheling niato gabos na ibinibilang niatong banal an buhay nin tawo? Gurano kahalaga na gibohon iyan?