Pagpastor sa Aripompon nin Dios na May Pagkasararo
May mga naghahapot: ‘Paano pinamamahalaan an lakop sa kinaban na kongregasyon nin mga Saksi ni Jehova?’ Kami minasimbag: An areglo sa pamamahala nagsusunod sa arogan kan Kristianong kongregasyon kan enot na siglo.
Kan mga taon nin 1870 si Charles T. Russell asin an saiyang kairiba nangenot sa pagpalakop kan mga resulta kan saindang pag-adal sa Biblia paagi sa mga pahayag asin babasahon. Sa bilog na nasyon, an mga namoot na makiasosyar sa gibohon na ini ibinilang si Russell asin an saiyang haraning kairiba na iyo an grupo nin mga lalaki na pinakamaykabatidan sa pag-otob sa gibohon kan Kagurangnan asin puwede nindang hagadan nin hatol manongod sa saindang mga aktibidad.
Kan 1884 an Zion’s Watch Tower Tract Society ininkorporar sa irarom kan ley kan Commonwealth of Pennsylvania. Si Russell asin an responsable niang kairiba napalabot na gayo sa pagdirehir sa Sosyedad na ini saka sa mga aktibidad kan mga Estudyante sa Biblia. Kan 1909 ibinalyo ninda an saindang opisina prinsipal sa Brooklyn, Nueva York. Sa nag-aging mga taon an mga direktor kan Watch Tower Society asin an iba pang haraning kaasosyar, mga kuwalipikado sa espirituwal, linahidan na mga lalaki naglingkod bilang namamahalang grupo para sa mga Saksi ni Jehova.
An Namamahalang Grupo kompuwesto nin linahidan na Kristianong mga lalaki (13 sa 1986), kaiba an 7 na naglilingkod sa board of directors kan Watch Tower Society. Sinda an nangengenot sa mga aktibidad kan mga Saksi ni Jehova sa bilog na kinaban. Sinda dai pinasabngan nin Dios asin kun siring bakong dai nasasala, pero nagsasarig sinda sa dai nasasalang Tataramon nin Dios bilang an pinakahalangkaw na autoridad digdi sa daga, asin igwa sinda nin halawig na eksperyensia sa pagpasakop sa kabotan nin Dios. An kada saro may rekord na labing 40 taon sa panbilog na panahon na ministeryo kaiba kan mga Saksi ni Jehova.
An Namamahalang Grupo an nagdidirehir sa ipinupublikar kan Sosyedad. An isinusurat basado sa pagmamasid sa espirituwal na mga pangangaipo kan aripompon asin bunga kan mapagngayongayo asin lubos na pag-adal saka pagsiyasat sa Tataramon nin Dios. Mantang an mga lalaking ini nagpapadagos sa pag-adal sa Biblia asin namamasdan an progresibong pagkaotob kan mga katuyohan nin Dios, an kaotoban kan hula sa mga nangyayari sa kinaban, asin an kamugtakan kan banwaan nin Dios sa kinaban, tibaad may panahon na sinda kaipuhan na gumibo nin naliwanagan na mga pagliliwat sa pakasabot sa nagkapirang katokdoan. Sa paaging ini, an kaaraman sa katotoohan orog na nagigin abunda.—Salmo 97:11; Talinhaga 4:18; Daniel 12:4.
An Namamahalang Grupo nagnombra nin Komite kan Sanga na kompuwesto nin tolo o labi pang kuwalipikado sa espirituwal na mga lalaki sa kada saro kan labing 90 sanga sa bilog na daga tanganing magdirehir sa aktibidad sa labing 200 na kadagaan asin isla. An mga sanga nakikipagkomunikar sa mga kongregasyon na nasa irarom kan saindang pagdirehir. Igwa nin regular na komunikasyon sa pag-oltanan kan Namamahalang Grupo asin kan mga Komite kan Sanga, asin an mga miembro kan Namamahalang Grupo personal na minasongko sa dakol na sanga kada taon tanganing maaraman an mga kamugtakan.
An mga lalaking ini bakong kagurangnan kan pagtubod nin iba kundi mga ministro na naghihingoa tanganing an dakol pa makanood manongod sa Tataramon nin Dios. Dai sinda naglilingkod para sa pinansial na pakinabang, kundi an saindang materyal na mga pangangaipo itinatao kapareho sa gabos na ibang miembro kan mga pamilyang Bethel. An pruweba na sinda maimbod na naglilingkod maririsa sa kaigotan, pagkasararo, halangkaw na mga pamantayan moral, asin kaimbodan sa mga katokdoan sa Biblia na ipinaheheling kan mga Saksi ni Jehova sa bilog na kinaban.—1 Corinto 3:5-9; 4:1, 2; 2 Corinto 1:24; 3:1-3; 1 Pedro 5:2, 3.
• Anong areglo sa pamamahala an nahaman?
• Siisay an naglilingkod sa Namamahalang Grupo ngonyan, asin ano an saindang mga paninimbagan?
• Paano natatawan nin pagdirehir an gibohon sa ibang kadagaan?
[Mapa sa pahina 26]
(Para sa aktuwal na format, hilingon an publikasyon)
Mga lugar na duman an mga Saksi ni Jehova nag-ootob kan kabotan nin Dios
[Mga ritrato sa pahina 26]
Nakaaging mga presidente kan Watch Tower Society
C. T. Russell, 1884-1916
J. F. Rutherford, 1916-1942
N. H. Knorr, 1942-1977
F. W. Franz, 1977-1992
[Mga ritrato sa pahina 27]
An nagkapira sa labing 90 sangang opisina na paagi kaiyan natatawan nin pagdirehir an gibohon kan mga Saksi ni Jehova sa bilog na kinaban
Canada
Zambia
Alemania
Hapon
Australia
Brazil