Kabtang 2
Sarong Daga na Daing Kasakitan
1, 2. Ano an laen man na punto-de-vista nin dakol?
MINSAN siring, an minilyon na tawo sa bilog na kinaban biyong laen man an punto-de-vista. May natatanaw sindang magayonon na ngapit para sa katawohan. Sinasabi ninda na digdi mismo sa daga madali nang magkaigwa nin kinaban na biyong mayo nin karatan asin kasakitan. May pagsarig sinda na an maraot madali nang paraon asin iestablisaron an biyong bagong kinaban. Sinasabi pa ngani ninda na ngonyan mismo ibinubugtak na an pundasyon kan bagong kinaban na ini!
2 An mga tawong ini nagtutubod na an bagong kinaban mayo nin guerra, karingisan, krimen, inhustisya, asin kadukhaan. Iyan kinaban na mayo nin helang, kamondoan, pagluha, asin pati kagadanan. Sa panahon na iyan an mga tawo magigin sangkap asin mabubuhay sagkod lamang na may kaogmahan sa sarong daganon na paraiso. Tara, an mga nagadan bubuhayon ngani liwat asin magkakaigwa kan oportunidad na mabuhay sagkod lamang!
3, 4. Taano an mga tawong ini ta may pagsarig sa saindang punto-de-vista?
3 An punto-de-vista daw na ini manongod sa ngapit pangatorogan sana, pangarap sana? Bako man. Iyan napasisikad sa marigon an pundasyon na pagtubod na an nagdadangadang na Paraisong ini segurado. (Hebreo 11:1) Taano ta nakaseseguro sinda? Huli ta iyan ipinanuga kan makakamhan sa gabos na Kaglalang kan uniberso.
4 Manongod sa mga panuga nin Dios, an Biblia nagsasabi: “Ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob sa saindo. Mayo ni sarong tataramon sa mga iyan an nasudya.” “An Dios bakong tawo na magpuputik . . . Sinabi daw nia asin dai nia gigibohon, asin itinaram daw nia asin dai nia ootobon?” “Si Jehova nin mga hukbo nanumpa, na an sabi: ‘Sierto nanggad na siring sa sakong plano, iyan dapat na mangyari; asin siring sa sakong isinabi, iyan an maootob.’”—Josue 23:14; Bilang 23:19; Isaias 14:24.
5. Anong mga hapot an kaipuhan na masimbag?
5 Minsan siring, kun an katuyohan nin Dios mag-establisar nin daganon na paraiso na daing kasakitan, taano ta tinogotan niang mangyari an maraot na mga bagay? Taano ta hinalat niang umagi an anom na ribong taon sagkod ngonyan bago itanos an sala? Posible daw na an gabos na siglong idto nin kasakitan nagpaparisa na an Dios dai talaga nagmamakolog sa sato, o na sia dai nag-eeksister?