Leksion 1

Kun Paano Nindo Maaaraman Kun Ano an Kahagadan nin Dios

Anong mahalagang impormasyon an nasa Biblia? (1)

Siisay an autor kan Biblia? (2)

Taano ta maninigo nindong adalan an Biblia? (3)

1. An Biblia mahalagang marhay na balaog hale sa Dios. Iyan garo sarong surat hale sa sarong mamomoton na ama para sa saiyang mga aki. Sinasabi kaiyan sa sato an katotoohan manongod sa Dios​—kun siisay sia asin kun ano an saiyang pinaninindogan. Ipinaliliwanag kaiyan kun paano mapanggaganahan an mga problema asin kun paano makanonompong nin tunay na kaogmahan. An Biblia sana an nagsasabi sa sato kun ano an dapat niatong gibohon tanganing mapaogma an Dios.​—Salmo 1:​1-3; Isaias 48:​17, 18.

2. An Biblia isinurat nin mga 40 katawo sa laog nin 1,600 na taon, poon kan 1513 B.C.E. Iyan kompuesto nin 66 na saradit na libro. An mga nagsurat kan Biblia pinasabngan nin Dios. Isinurat ninda an mga kaisipan nia, bakong ninda. Kaya an Dios sa langit, bakong an siisay man na tawo digdi sa daga, an Autor kan Biblia.​—2 Timoteo 3:​16, 17; 2 Pedro 1:​20, 21.

3. Sinierto nin Dios na an Biblia kopyahon nin eksakto asin mapreserbar. Mas dakol an inimprentang Biblia kisa sa arin man na ibang libro. Bakong gabos maoogma na maheling kamo na nag-aadal kan Biblia, alagad dai nindo itogot na papondohon kamo kaiyan. An saindong daing sagkod na ngapit depende sa saindong pakamidbid sa Dios asin sa pag-otob sa saiyang kabotan sa ibong nin ano man na pagtumang.​—Mateo 5:​10-12; Juan 17:3.