Kaipuhan Mong Manudan an Manungod sa Diyos

Para magin katuod nin Diyos, kaipuhan mong manudan an manungod sa saiya. Aram daw kan mga katuod mo an pangaran mo asin ginagamit iyan? Iyo. Gusto man nin Diyos na maaraman asin gamiton mo an pangaran niya. Jehova an pangaran nin Diyos. (Salmo 83:18; Mateo 6:9) Dapat na manudan mo man kun ano an gusto niya saka an dai niya gusto. Kaipuhan na maaraman mo kun siisay an mga katuod niya saka kun siisay an mga kaiwal niya. Kaipuhan nin panahon para mabisto mo an saro. Sinasabi kan Bibliya na madunong na magtagama nin panahon na makanuod manungod ki Jehova.​—Efeso 5:​15, 16.

Ginigibo kan mga katuod nin Diyos an nakakapaugma sa saiya. Isipon mo an saimong mga katuod. Kun maraot an ugali mo sa sainda tapos ginigibo mo an mga ikinakauyam ninda, gugustuhon pa daw nindang magin katuod ka ninda? Siyempre dai! Sa kaparehong paagi, kun gusto mong magin katuod nin Diyos, dapat mong gibuhon an nakakapaugma sa saiya.​—Juan 4:24.

Bakong gabos na relihiyon puwedeng makatabang na magin katuod nin saro an Diyos. An pinakadayupot na katuod nin Diyos na si Jesus nagtaram manungod sa duwang dalan. An sarong dalan mahiwas saka pano nin mga tawo. An dalan na iyan pasiring sa kalaglagan. An saro pang dalan hayakpit asin pipira sana an nag-aagi diyan. An dalan na iyan pasiring sa buhay na daing katapusan. Ini nangangahulugan na kun gusto mong magin katuod nin Diyos, dapat mong manudan an tamang paagi nin pagsamba sa saiya.​—Mateo 7:​13, 14.