Ipahiling an Saimong Pagkamuot sa Diyos

Tangani na magdanay an sarong katuod, kaipuhan na makipag-ulay ka sa saiya. Nagdadangog ka sa saiya, saka nagdadangog man siya sa saimo. Nagsasabi ka man sa iba nin marahay na mga bagay manungod sa saimong katuod. Arog man kaiyan an pagigin katuod nin Diyos. Hilinga an sinasabi kan Bibliya manungod digdi:

Regular na makipag-ulay ki Jehova sa pamibi. “Magmaigot kamo sa pamimibi.”​—Roma 12:12.

Basahon an Tataramon nin Diyos, an Bibliya. “An gabos na Kasuratan ipinasabong nin Diyos asin kapaki-pakinabang para sa pagtukdo, sa pagsagwi, sa paghusay kan mga bagay.”​—2 Timoteo 3:16.

Tukduan an iba manungod sa Diyos. “Kun siring paduman kamo asin gumibo kamo nin mga disipulo sa mga tawo kan gabos na nasyon, . . . na tukduan nindo sinda na utubon an gabos na bagay na ipinagbuot ko sa saindo.”​—Mateo 28:​19, 20.

Magin dayupot sa mga katuod nin Diyos. “Siya na naglalakaw na kaiba nin mga madunong magigin madunong.”​—Talinhaga 13:20.

Mag-atender sa mga pagtiripon sa Kingdom Hall. “Konsideraron niyato an lambang saro tanganing mandagka sa pagkamuot asin sa marahay na mga gibo, . . . na magparinigunan nin buot.”​—Hebreo 10:​24, 25.

Tumabang sa pagsuportar sa gibuhon na pang-Kahadian. “[Tumao] an lambang saro nin uyon sa napagdesisyunan niya sa saiyang puso, bakong sa maraot na buot o sa kapiritan, huli ta an Diyos namumuot sa maugmang paratao.”​—2 Corinto 9:7.