Epektibong Paggamit nin mga Hapot

HULING an mga hapot naghahagad nin simbag​—magsalang berbal o nasa isip sana—​nakatatabang iyan na magin kalabot an mga naghihinanyog sa saindo. An mga hapot nakatatabang sa saindo na makapoon nin mga orolay asin magkaigwa nin nakaaanimar na pagrinibayan nin mga nasa isip. Bilang nagpapahayag asin paratokdo, magagamit nindo an mga hapot sa pagpukaw kan interes, pagtabang sa saro na magrason sa sarong tema, o sa pagdoon kan saindong sinasabi. Kun ginagamit nindo nin tama an mga hapot, naeenkaminar nindo an iba na aktibong gamiton an isip imbes na pasibong maghinanyog. Magkaigwa nin nasa isip na obheto, asin ihapot an mga hapot nindo sa paagi na makatatabang na magibo iyan.

Tanganing Makaenkaminar nin Orolay. Kun kamo nasa ministeryo sa langtad, mag-alisto sa mga oportunidad na agdahon an mga tawo na ipahayag an nasa boot ninda kun gusto ninda.

Dakol na Saksi an pinoponan an interesanteng orolay paagi sana sa paghapot nin, “Napag-isip-isip na daw nindo . . . ?” Kun minapili sinda nin hapot na talagang nasa isip nin dakol, haros segurado nang magkakaigwa sinda nin nakagagayagayang ministeryo sa langtad. Dawa kun bago an hapot sa isip kan kaolay, tibaad iyan makapukaw nin interes. Kadakoldakol kan ikaiintrodusir nin mga ekspresyon na arog kan “Ano sa paghona nindo . . . ?,” “Ano sa pagmate nindo . . . ?,” asin “Naniniwala daw kamo . . . ?”

Kan dolokon kan ebanghelisador na si Felipe an Etiopeng opisyal sa korte na nagbabasa nin makosog kan hula ni Isaias, naghapot sana si Felipe: “Ano talagang aram mo [o, ano nasasabotan mo] an binabasa mo?” (Gibo 8:30) An hapot na ini nagbukas kan dalan tanganing ikapaliwanag ni Felipe an mga katotoohan manongod ki Jesu-Cristo. Ginagamit an kaagid na hapot, nanompongan nin nagkapirang Saksi sa presenteng panahon an mga tawo na talagang gutom sa malinaw na pakasabot kan katotoohan sa Biblia.

Oras na matawan sinda nin oportunidad na ipahayag an sadiri nindang mga opinyon, dakol an mas gaganahan na maghinanyog sa saindo. Pakapaghapot, atentong maghinanyog. Magin maboot imbes na matatsar sa pagrekonoser sa simbag kan tawo. Magtao nin komendasyon kun iyan magigibo nindo nin sinsero. Sarong beses, pakatapos na an sarong eskriba ‘magsimbag na may kadonongan,’ inomaw sia ni Jesus, na sinasabi: “Bako kang harayo sa kahadean nin Dios.” (Mar. 12:34) Dawa kun bako kamong magkapareho sa opinyon kan kaolay nindo, mapasasalamatan sia nindo para sa pagpahayag kan nasa boot nia. Tibaad huli sa sinabi nia maaraman nindo an sarong aktitud na kaipuhan na konsideraron nindo sa pagpaabot sa saiya kan katotoohan sa Biblia.

Tanganing Ikaintrodusir an Importanteng mga Ideya. Kun nagpapahayag kamo sa sarong grupo o nakikipag-olay sa sarong indibiduwal, hingoahon na gumamit nin mga hapot na magiya pasiring sa importanteng mga ideya. Seguradohon na an mga hapot nindo manongod sa mga bagay na interesante talaga para sa mga nagdadangog sa saindo. Puede man kamong gumamit nin mga hapot na nakapupukaw nin interes ta dai tolos risa an simbag. Kun mapondo nguna kamo nin kadikit pakapaghapot, posibleng marhay na an mga nagdadangog sa saindo maghihinanyog na may orog na interes sa masunod.

Sarong beses, si propeta Miqueas naggamit nin dakol na hapot. Pakapaghapot kun ano an inaasahan nin Dios sa mga nagsasamba sa saiya, nagtao pa an propeta nin apat na hapot, na an kada saro may kaibang posibleng simbag. An gabos na hapot na iyan nakatatabang na andamon an mga nagbabasa para sa may pakarorop na simbag na ikinonklusyon nia sa kabtang na iyan kan saiyang pagtokar. (Miq. 6:6-8) Magigibo daw nindo an arog kaiyan kun nagtotokdo? Probaran iyan.

Tanganing Magrason sa Sarong Tema. Magagamit an mga hapot tanganing matabangan an iba na masundan an lohika nin sarong argumento. Kan nagtatao nin magabat na kapahayagan sa Israel, ginibo ini ni Jehova, arog kan ipinaheheling sa Malaquias 1:2-10. Enot sinabi nia sa sainda: “Namotan ko kamo.” Dai ninda naapresyar an pagkamoot na iyan, kaya naghapot sia: “Bako daw na si Esau tugang ni Jacob?” Dangan sinambit ni Jehova an gabang kamugtakan nin Edom bilang ebidensia na huli sa karatan ninda, dai namotan nin Dios an nasyon na iyan. Sinundan nia ini nin mga ilustrasyon na sinaliotan nin mga hapot tanganing idoon an dai pakapaheling kan Israel nin tamang reaksion sa saiyang pagkamoot. An ibang hapot isinabi na garo an bakong fiel na mga saserdote an naghahapot kaiyan. An iba mga hapot ni Jehova sa mga saserdote. An pag-oolay nakapupukaw nin emosyon asin nakakukua kan satong atension; an lohika dai mapahihimutikan; an mensahe dai malilingawan.

May mga nagpapahayag na epektibong naggagamit nin mga hapot sa kaagid na paagi. Minsan ngani tibaad mayong berbal na simbag na inaasahan, an mga nagdadangog napapalabot sa isip, na garo nakikikabtang sa orolay.

Kun pinamamayohan niato an mga pag-adal sa Biblia, ginagamit niato an metodo na naghahagad nin pagpartisipar kan inaadalan. Siempre, mas dakulang karahayan an nagigibo kun dai sana binabasa kan inaadalan an simbag. Sa maboot na tono, gumamit nin suplementaryong mga hapot tanganing makipagrasonan sa inaadalan. Sa mayor na mga ideya, enkaminaron siang gamiton an Biblia bilang basehan kan saiyang simbag. Puede man nindong ihapot: “Paano an satong pinag-oolayan konektado sa saro pang puntong ini na pinag-adalan niato? Taano iyan ta importante? Paano iyan maninigong makaapektar sa satong buhay?” An siring na metodo mas epektibo kisa pagpahayag kan sadiri nindong mga kombiksion o pagtao mismo nindo nin halawig na eksplikasyon. Sa paaging ini, tinatabangan nindo an inaadalan na gamiton an saiyang “kakayahan na mangatanosan” sa pagsamba sa Dios.​—Roma 12:1.

Kun dai nasasabotan kan inaadalan an sarong ideya, magin mapasensia. Tibaad ikinokomparar nia an sinasabi nindo sa dakol na taon niang tinubod. Tibaad makatabang an pagtokar kan tema sa ibang anggulo. Minsan siring, may beses na an kaipuhan pundamental na marhay na pagrason. Gamiton parate an Kasuratan. Gumamit nin mga ilustrasyon. Kaiba kan mga ini, gumamit nin simpleng mga hapot na nag-aagda sa tawo na magrason sa ebidensia.

Tanganing Mapaluwas an mga Saboot. Kun minasimbag sa mga hapot an mga tawo, dai ninda pirmeng ihinahayag kun ano talaga an saboot ninda. Tibaad itao sana ninda an simbag na sa paghona ninda gusto nindo. Kaipuhan an pakamansay. (Tal. 20:5) Arog kan ginibo ni Jesus, puede nindong ihapot: “Minatubod ka kaini?”​—Juan 11:26.

Kan an dakol sa mga disipulo ni Jesus magsentir sa saiyang sinabi asin binayaan sia, inagda ni Jesus an saiyang mga apostol na ipahayag an nasa boot ninda. Naghapot sia: “Ano maharale man kamo?” Si Pedro an nagpahayag kan saindang mga saboot, na sinasabi: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan; asin kami nagtubod asin nakaaram na ika iyo an Banal nin Dios.” (Juan 6:67-69) Sa saro pang pangyayari, hinapot ni Jesus an saiyang mga disipulo: “Siisay an sinasabi nin mga tawo na Aki nin tawo?” Sinundan nia ini nin hapot na nag-agda sa sainda na ipahayag an nasa saindang puso. “Pero, para sa saindo siisay ako?” Sa pagsimbag, si Pedro nagsabi: “Ika an Cristo, an Aki kan nabubuhay na Dios.”​—Mat. 16:13-16.

Kun pinamamayohan an pag-adal sa Biblia, tibaad maheling nindong kapakipakinabang na arog man kaiyan an gibohon na pamamaagi sa nagkapirang isyu. Puede nindong ihapot: “Ano an pagheling kan mga kaklase (o katrabaho) nindo sa bagay na ini?” Dangan puede nindong ihapot: “Ano an saboot nindo manongod dian?” Kun aram nindo an tunay na saboot nin saro, nagigin posible para sa saindo bilang paratokdo na makatao kan pinakadakulang tabang.

Tanganing Matawan nin Pagdodoon. Magagamit man an mga hapot tanganing ikadoon an mga ideya. Ginibo ini ni apostol Pablo, arog kan nasusurat sa Roma 8:31, 32: “Kun an Dios nasa kampi niato, siisay an matumang sa sato? Sia na minsan an saiya mismong Aki dai ilinikay kundi itinao sia dahel sa sato gabos, tadaw ta dai man sia maboot na magtatao sa sato kan gabos na iba pang bagay kaiba nia?” Obserbari na, sa kada saro, ginagamit na basehan kan hapot an parteng sinusundan kaiyan.

Pakasuratan kan paghokom ni Jehova tumang sa hade kan Babilonya, si propeta Isaias nagpahayag nin makosog na kombiksion sa pagdagdag: “Si Jehova nin mga hukbo mismo nagdesisyon, asin siisay an makakapapondo kaiyan? Asin an kamot nia an nakaunat, asin siisay an makakapogol kaiyan?” (Isa. 14:27) Sa mismong sinasabi kaiyan, ipinaririsa nin siring na mga hapot na dai madedeharan an ideyang ipinahayag. Mayo nin inaasahan na simbag.

Tanganing Ibuyagyag an Salang Kaisipan. An mga hapot na maingat na pinag-isipan mapuersa man na mga kasangkapan sa pagbuyagyag nin salang kaisipan. Bago paomayan an sarong tawo, hinapot ni Jesus an mga Fariseo asin nagkapirang eksperto sa Ley: “Sono daw sa ley an pagbolong kun sabbath o bako?” Pakatapos na magibo an pagbolong, pinasundan nia nin saro pang hapot: “Siisay sa saindo, kun mahulog an saiyang aki o toro sa bubon, an dai sia tolos hahawason sa aldaw nin sabbath?” (Luc. 14:1-6) Mayong simbag na inaasahan, ni may itinao man. Ibinuyagyag kan mga hapot an sala nindang kaisipan.

Kun beses, pati tunay na mga Kristiano puedeng mahulog sa salang kaisipan. An iba sa Corinto kan enot na siglo idinedemanda an saindang mga tugang tanganing resolberan an mga problema na dapat kutanang sinda-sinda na sana an nakaresolber. Ano an ginibo dian ni apostol Pablo? Naghapot sia nin sunod-sunod na deretso sa puntong mga hapot tanganing ikatanos an saindang kaisipan.​—1 Cor. 6:1-8.

Sa kaeensayo, makakanood kamong gumamit nin mga hapot sa epektibong paagi. Minsan siring, girumdomon na magin magalang, nangorogna kun an kaolay nindo mas may edad, mga dai nindo personal na kamidbid, asin mga nasa katongdan na may autoridad. Gamiton an mga hapot sa pag-atubang kan katotoohan sa Biblia sa paaging nakaaakit.