Binendisyonan nin Dios si Abraham Asin an Saiyang Pamilya

ARAM ni Jehova na an Saro na pinakanamomotan nia kaipuhan na magsakit asin magadan pag-abot nin panahon. An katotoohan na iyan ipinarisa kan hula na nakasurat sa Genesis 3:15. Ikakapasabot daw nin Dios sa katawohan kun gurano man nanggad kadakulang sakripisyo para sa saiya an kagadanan na iyan? An Biblia nagtatao nin buhay na ilustrasyon. Sinabi nin Dios ki Abraham na iatang an saiyang namomotan na marhay na aking si Isaac.

Si Abraham igwa nin dakulang pagtubod. Girumdomon na an Dios nanuga sa saiya na magikan ki Isaac an ihinulang Paraligtas, o Banhi. Huling si Abraham nagtitiwala na si Isaac bubuhayon liwat nin Dios kun kaipuhan, makinuyog na iaatang na kutana nia an saiyang sadiring aki. Alagad eksakto man na pinugolan si Abraham nin sarong anghel gikan sa Dios. Inomaw nin Dios si Abraham huli sa saiyang pagigin andam na iatang an saiyang pinakamamahal, asin inotro Nia an saiyang mga panuga sa maimbod na patriarka.

Paghaloyhaloy, si Isaac nagkaigwa nin duwang aki, si Esau asin Jacob. Bakong arog ni Esau, si Jacob nagpahalaga sa espirituwal na mga bagay asin tinawan nin balos. An ngaran ni Jacob sinalidahan nin Dios na magin Israel, asin an 12 aking lalaki ni Israel an nagin mga payo kan mga tribo nin Israel. Alagad paano nagin dakulang nasyon an pamilyang iyan?

Nagpoon an sunod-sunod na pangyayari kan an kadaklan sa mga aking iyan mauri sa saindang nguhod na tugang na si Jose. Sia ipinabakal ninda bilang oripon, asin sia dinara sa Egipto. Alagad binendisyonan nin Dios an maimbod asin makosog an boot na hoben na lalaking iyan. Sa ibong nin grabeng mga kasakitan, pag-abot nin panahon si Jose pinili ni Faraon, an namamahala sa Egipto, asin tinawan nin dakulang autoridad. Tamang-tama iyan huling dahel sa tiggutom, isinugo ni Jacob an nagkapira sa mga aki nia na magduman sa Egipto tanganing bumakal nin kakanon​—asin si Jose na palan an namamahala sa gabos na kakanon duman! Pakatapos nin emosyonal na pagherelingan giraray ni Jose asin kan saiyang nagsosolsol na mga tugang, pinatawad nia sinda asin iinareglo nia na bumalyo sa Egipto an saindang bilog na pamilya. Sinda tinawan nin marahayon na klase nin daga, na dian sinda puedeng padagos na dumakol asin umoswag. Nasabotan ni Jose na an Dios an nag-areglo kan mga bagay-bagay tanganing otobon an Saiyang mga panuga.

An gurang nang si Jacob namuhay sa Egipto durante kan huring mga taon kan saiyang buhay, na kaibanan an saiyang nagdadakulang pamilya. Kan madali na siang magadan, ihinula nia na an ipinanugang Banhi, o Paraligtas, magigin makapangyarihan na Namamahala na mamumundag sa lahi kan aki niang si Juda. Bago magadan si Jose pakalihis nin mga taon, ihinula nia na pag-abot nin panahon iluluwas nin Dios sa Egipto an pamilya ni Jacob.

​—Basado sa Genesis kapitulo 20 sagkod 50; Hebreo 11:17-22.