Ipinasabong na mga Awit na Nakakaranga Asin Nagtotokdo

AN PINAKADAKULANG libro sa Biblia sarong koleksion nin sagradong mga awit. An bilog na librong ini ginibo sa laog nin mga 1,000 taon. Yaon sa libro nin Salmo an nagkapira sa pinakaodok asin pinakanakakapahiro na mga kapahayagan nin pagtubod na isinurat kasuarin man. Ilinaladawan digdi an manlaenlaen na emosyon nin tawo, siring baga nin kagayagayahan, pag-omaw, asin pasasalamat, saka kamondoan asin pagsolsol. Malinaw na an mga salmista nagtitiwala asin dayupot sa Dios. Isip-isipa an nagkapira sa mga tema kan mga awit na ini.

Si Jehova an may deretso bilang Soberano, na maninigong sambahon asin omawon. Mababasa niato sa Salmo 83:18: “Ika, na an ngaran Jehova, ika sana an Kaharohalangkawe sa bilog na daga.” Sa nagkapirang salmo, inoomaw si Jehova huli sa saiyang mga linalang, arog baga kan mabitoon na kalangitan, makangangalas na buhay sa daga, asin makangangalas na hawak nin tawo. (Salmo 8, 19, 139, 148) Sa ibang salmo, pinapamuraway si Jehova bilang Dios na minahiro tanganing iligtas asin protehiran an mga maimbod sa saiya. (Salmo 18, 97, 138) Sa iba pang salmo, pinapamuraway sia bilang Dios nin hustisya, na nagtatao nin kaginhawahan sa mga inaapi asin nagpapadusa sa mga maraot.—Salmo 11, 68, 146.

Tinatabangan asin rinaranga ni Jehova an mga namomoot sa saiya. Posibleng an pinakabantog iyo an ika-23 na salmo, na dian ilinadawan ni David si Jehova na mamomoton na Pastor, na naggigiya, nagpoprotehir, asin nag-aataman sa saiyang mga karnero. Ipinapagirumdom kan Salmo 65:2 sa mga nagsasamba sa Dios na si Jehova an “Paradangog nin pamibi.” An dakol na nakagibo nin magabat na kasalan narangang marhay kan Salmo 39 asin 51, na dian odok sa puso na ilinadawan ni David an pagsolsol nia huli sa saiyang grabeng mga sala asin ipinahayag nia an saiyang pagtubod sa pagpapatawad ni Jehova. An Salmo 55:22 nagsasadol na magtiwala ki Jehova asin itao sa Saiya an gabos na personal na problema.

Babagohon ni Jehova an kinaban paagi sa Kahadean kan Mesiyas. An dakol na teksto sa Salmo malinaw na minaaplikar sa Mesiyas, an ihinulang Hade. Ihinula kan Salmo 2 na lalaglagon kan Namamahalang ini an maraot na mga nasyon, na nagkokontra sa saiya. Ihinayag kan Salmo 72 na hahaleon kan Hadeng ini an gutom, inhustisya, asin pang-aapi. Segun sa Salmo 46:9, tataposon nin Dios an guerra asin raraoton pa ngani an gabos na armas na pangguerra paagi sa Mesiyanikong Kahadean. Sa Salmo 37, mababasa niato na popohoon an mga maraot, mantang an matanos na mga tawo mabubuhay sa daga sagkod lamang, na igwa nin lakop sa globong katoninongan asin pagkaoroyon.

​—Basado sa libro nin Salmo.