Diosnon na Kadonongan Para sa Buhay

SI Jehova daw madonong na Namamahala? An sarong dai mapagdududahan na paagi na masimbag an hapot na iyan iyo an pag-estudyar sa hatol na itinatao nia. Iyan daw epektibo? An pag-aplikar daw kaiyan nagbubunga nin mas marahay asin mas makahulogan na buhay? An madonong na si Hadeng Salomon nagsurat nin ginatos na talinhaga. Tinotokar kaini an haros gabos na aspekto nin buhay. Estudyare an nagkapirang halimbawa.

Pagtitiwala sa Dios. An pagtitiwala mahalaga sa marahay na relasyon ki Jehova. Si Salomon nagsurat: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Talinhaga 3:5, 6) An pagtitiwala sa Dios paagi sa paghagad sa saiya nin giya asin pagkuyog sa saiya nagtatao nin hararom na kahulogan sa buhay. Paagi kaiyan, napapagayagaya nin sarong tawo an puso nin Dios asin natatawan si Jehova nin ikakasimbag sa mga isyu na pinalataw kan Saiyang kaiwal na si Satanas.—Talinhaga 27:11.

Pagigin madonong sa relasyon sa iba. An hatol nin Dios sa mga agom na lalaki, mga agom na babae, asin mga aki orog na napapanahon ngonyan kisa kasuarin man. “Maggayagaya ka sa agom na babae kan saimong pagkahoben,” an sadol nin Dios sa agom na lalaki, na pinagbobotan sia na dapat siang magdanay na maimbod sa saiyang agom. (Talinhaga 5:18-20) Sa libro nin Talinhaga, maheheling nin mga babaeng may agom an magayon na paglaladawan sa sarong may kakayahan na agom na babae na hinahangaan kan saiyang agom asin mga aki. (Talinhaga, kapitulo 31) Asin maheheling nin mga aki an instruksion na kuyogon an saindang mga magurang. (Talinhaga 6:20) Ipinapaheling man kan librong ini na mahalagang marhay an pakikikatood, huling nagbubunga nin kaimotan kun isinusuway nin saro an saiyang sadiri. (Talinhaga 18:1) An mga katood puedeng magkaigwa nin marahay o maraot na impluwensia sa sato, kaya kaipuhan na magin madonong kita sa pagpili nin katood.​—Talinhaga 13:20; 17:17.

Pagigin madonong sa pag-asikaso sa sadiri. An libro nin Talinhaga igwa nin daing kaagid sa halaga na hatol dapit sa dai pagpalabilabi sa inomon na de alkohol, pagkaigwa nin mga pagmate na nakakarahay sa salud asin paglaban sa mga pagmate na nakakaraot, saka pagigin mahigos na trabahador. (Talinhaga 6:6; 14:30; 20:1) Nagpapatanid iyan na an pagtitiwala sa paghusgar nin tawo na bakong kaoyon kan hatol nin Dios minaresulta sa kapahamakan. (Talinhaga 14:12) Sinasadol kita kaiyan na ingatan an panglaog na pagkatawo, an puso, tumang sa nakakaraot na mga impluwensia asin ipinapagirumdom kaiyan sa sato na “gikan [sa puso] an mga burabod nin buhay.”​—Talinhaga 4:23.

Minilyon na tawo sa bilog na kinaban an nakapagpatunay na an pag-aplikar kan siring na hatol nagbubunga nin mas marahay na buhay. Bilang resulta, igwa sinda nin dakol na dahelan na akoon si Jehova bilang Namamahala sa sainda.

​—Basado sa libro nin Talinhaga.