LEKSION 10
Paano Mo Mamimidbid an Tunay na Pagsamba?
1. Saro sana daw an tunay na relihion?
‘Maglikay kamo sa mga bakong tunay na propeta.’—MATEO 7:15.
Tinokdoan ni Jesus an mga parasunod nia nin saro sanang relihion, an tunay na relihion. Iyan arog sa sarong dalan na pasiring sa buhay na daing katapusan. Sia nagsabi: ‘Diit an nakakakua’ kan dalan na iyan. (Mateo 7:14) An inaako sana nin Dios iyo an pagsambang basado sa saiyang Tataramon nin katotoohan. An gabos na tunay na parasamba nagkakasararo sa sarong pagtubod.—Basahon an Juan 4:23, 24; 14:6; Efeso 4:4, 5.
Hilingon an video na Inaako Daw nin Diyos an Gabos na Paagi nin Pagsamba?
2. Ano an sinabi ni Jesus dapit sa falsong mga Kristiano?
‘Sinda nagpapahayag na sinda tatao sa Dios; alagad sa saindang mga gibo sinda nagpapainda saiya.’—TITO 1:16.
Nagpatanid sia na raraoton nin falsong mga propeta an Kristianismo. Sa pangluwas, sinda garo tunay na parasamba. An mga relihion ninda naghihingakong Kristiano. Alagad, mamimidbid mo kun ano man nanggad sinda. Paano? An tunay na pagsamba sana an nagbubunga nin tunay na mga Kristiano, na may mga kualidad asin gibo na risang-risa nin mga tawo.—Basahon an Mateo 7:13-23.
3. Paano mo mamimidbid an tunay na mga parasamba?
Estudyaran an limang midbidan na ini:
An tunay na mga parasamba may paggalang sa Biblia bilang Tataramon nin Dios. Nagmamaigot sindang mamuhay kaoyon kan mga prinsipyo kaiyan. Kaya, an tunay na relihion laen sa relihion na basado sa mga ideya nin tawo. (Mateo 15:7-9) An tunay na mga parasamba namumuhay kaoyon kan ihinuhulit ninda.—Basahon an Juan 17:17; 2 Timoteo 3:16, 17.
An tunay na mga parasunod ni Jesus nagtataong onra sa ngaran nin Dios na Jehova. Si Jesus nagtaong onra sa ngaran nin Dios paagi sa pagpamidbid kaiyan. Tinabangan nia an mga tawo na mamidbid an Dios asin tinokdoan sindang mamibi na pakangbanalon an ngaran na iyan. (Mateo 6:9) Sa lugar nindo, arin na relihion an nagpapamidbid kan ngaran nin Dios?—Basahon an Juan 17:26; Roma 10:13, 14.
An tunay na mga Kristiano naghuhulit dapit sa Kahadean nin Dios. Isinugo nin Dios si Jesus tanganing ihulit an maogmang bareta kan Kahadean. Iyan an solamenteng paglaom para sa katawohan. Padagos na ipinakipag-olay iyan ni Jesus sagkod kan aldaw na naghihingagdan na sia. (Lucas 4:43; 8:1; 23:42, 43) Sinabi nia na ihuhulit iyan kan mga parasunod nia. Kun may magdolok sa saimo tanganing makipag-olay dapit sa Kahadean, sa anong relihion sia posibleng marhay na kabilang?—Basahon an Mateo 24:14.
An mga parasunod ni Jesus bakong kabtang kan maraot na kinaban na ini. Mamimidbid mo sinda huli ta sinda dai nakikilabot sa politika o kariribokan sa sosyedad. (Juan 17:16; 18:36) Siring man, dai ninda inaarog an nakakaraot na mga gibo asin atitud kan kinaban.—Basahon an Santiago 4:4.
An tunay na mga Kristiano may pambihirang pagkamoot sa lambang saro. Paagi sa Tataramon nin Dios, nanonodan nindang igalang an gabos na grupong etniko. Minsan ngani parateng suportado nin falsong mga relihion an mga giera kan mga nasyon, habo kan tunay na mga parasamba na gibohon iyan. (Miqueas 4:1-3) Imbes, daing kaimotan na ginagamit nin tunay na mga Kristiano an panahon asin mga rogaring ninda tanganing tabangan asin pakosogon an iba.—Basahon an Juan 13:34, 35; 1 Juan 4:20.
4. Puede mo daw mamidbid an tunay na relihion?
Arin na relihion na an gabos na katokdoan basado sa Tataramon nin Dios, nagtatao nin onra sa ngaran nin Dios, asin nagbabalangibog na an Kahadean nin Dios an solamenteng paglaom nin katawohan? Arin na grupo an nagpapahiling nin pagkamoot asin dai nakikilabot sa giera? Ano sa hiling mo?—Basahon an 1 Juan 3:10-12.