Kongklusyon

1, 2. Taano ta mahalaga na magkaigwa kita ngunyan nin pagtubod? Iilustrar.

PAGTUBOD. Magayon na tataramon iyan, na naglaladawan sa sarong kaakit-akit na marhay na kuwalidad. Minsan siring, pag nahihiling o nadadangog niyato an tataramon na iyan, may saro pa na dapat tang isipon: “Apurado!” Huli ta kun mayo kitang pagtubod, kaipuhan kitang humiro nin apurado para magkaigwa kaiyan. Asin kun igwa na kitang pagtubod, kaipuhan kitang humiro nin apurado para protektaran asin pakusugon iyan. Taano?

² Imahinaron na naglalakaw ka sa mahiwason na disyerto. Kaipuhan mong marhay nin tubig. Kan makakua ka, kaipuhan mong protektaran iyan na dai mabalad sa aldaw. Dangan kaipuhan mong dagdagan iyan para dai ka maubusan sagkod na makaabot ka sa dudumanan mo. Ngunyan, kita gabos nabubuhay sa espirituwal na disyerto, sarong kinaban na an tunay na pagtubod—arog nin tubig​—bihira asin nawawara tulos kun dai poprotektaran asin dadagdagan. Kaipuhan tang marhay iyan; kun ­paanong magagadan kita kun mayo nin tubig, magagadan man kita sa espirituwal kun mayo nin pagtubod.—Roma 1:17.

3. Ano an itinao ni Jehova tanganing tabangan kitang pakusugon an satong pagtubod, asin anong duwang bagay an kaipuhan tang tandaan?

³ Aram ni Jehova kun gurano kaapuradong magkaigwa kita nin pagtubod, asin aram niya kun gurano kadipisil na pakusugon saka papagdanayon iyan ngunyan. Mayong duda na iyan an dahilan kaya nagtao siya nin mga halimbawa na dapat tang arugon. Pinasabngan ni Jehova si apostol Pablo na sumurat: ‘Magin mga paraarog kaidtong mga nagmamana kan mga panuga huli sa pagtubod asin pakatios.’ (Heb. 6:12) Asin iyan an dahilan kaya dina­dagka kita kan organisasyon ni Jehova na magmaigot na arugon an halimbawa kan maimbod na mga lalaki asin babayi, siring kan mga pinag-adalan ta sa librong ini. Pero, ano an maninigo tang ­gibuhon ngunyan? Tandaan niyato an duwang bagay: (1) Kaipuhan tang padagos na pakusugon an satong pagtubod; (2) kaipuhan tang papagdanayon na malinaw sa isip an satong paglaom.

4. Taano ta masasabi na si Satanas kaiwal kan pagtubod, alagad taano ta dai kita maninigong matakot?

⁴ Padagos na pakusugon an saimong pagtubod. An pagtubod may makusog na kaiwal—si Satanas. Ginibo kan namamahala kan kinaban an sistemang ini nin mga bagay na garo sarong disyerto na masakit papagdanayon an pagtubod. Mas makusog siya kisa sa sato. Dapat daw kitang matakot na tibaad dai ta kayang mapakusog an satong pagtubod? Dai nanggad! Si Jehova an nangungurog na Katuod nin gabos na gustong magkaigwa nin tunay na pagtubod. Sinisiyerto niya sa sato na basta kaiba niyato siya, kaya tang labanan asin padulagon pa ngani an Diyablo! (Sant. 4:7) Linalabanan ta siya paagi sa paggamit nin panahon aroaldaw tanganing pakusugon an satong pagtubod. Paano?

5. Paano nagkaigwa nin pagtubod an maimbod na mga lalaki asin babayi sa Bibliya? Ipaliwanag.

⁵ Arog kan naaraman ta, an may pagtubod na mga lalaki asin babayi sa Bibliya dai namundag na igwa na tulos kaiyan. Sinda buhay na patotoo na an pagtubod bunga kan banal na espiritu ni Jehova. (Gal. 5:22, 23) Namibi sinda para sa tabang, kaya padagos na pinakusog ni Jehova an pagtubod ninda. Arugon ta man sinda, na nungkang linilingawan na bukas-palad na itinatao ni Jehova an saiyang espiritu sa mga naghahagad kaiyan asin naghihiro kauyon kan mga pamibi ninda. (Luc. 11:13) Igwa pa daw kitang ibang puwedeng gibuhon?

6. Paano kita lubos na makikinabang sa pag-adal niyato kan mga istorya sa Bibliya?

⁶ Sa librong ini, pira sanang halimbawa nin pambihirang pagtubod an napag-ulayan ta. Dakulon pa nanggad! (Basahon an Hebreo 11:32.) An lambang saro sa sainda puwede tang mapagngayo-ngayo asin udok sa pusong pag-adalan. Kun babasahon niyato nin hiridalian an mga istorya sa Bibliya dapit sa mga nagpahiling nin pagtubod, dai ta mapaparigon an sato mismong pagtubod. Tanganing lubos na makinabang sa pagbasa niyato, kaipuhan tang gumamit nin panahon sa pagsiyasat kan konteksto asin iba pang detalye kan mga istorya sa Bibliya. Kun pirmi tang tatandaan na an bakong perpektong mga lalaki asin babaying idto may ‘mga pakamati siring sa sato,’ mas magigin totoo sa sato an halimbawa ninda. (Sant. 5:17) Kun iisipon ta an kamugtakan ninda, mamamatian man niyato an namatian ninda kan mapaatubang sinda sa mga kasakitan asin problema na kapareho kan sa sato.

7-9. (a) Ano daw an puwedeng mamatian kan nagkapirang may pagtubod na lalaki asin babayi kan mga panahon kan Bibliya dapit sa pagsamba ki Jehova sa paagi na arog kan ginigibo ta ngunyan? (b) Taano ta maninigo niyatong pakusugon an satong pagtubod paagi sa gibo?

⁷ Napapakusog ta man an satong pagtubod paagi sa gibo, huli ta ‘an pagtubod kun [mayong] gibo gadan.’ (Sant. 2:26) Imahinara na sana an kagayagayahan kan mga lalaki asin babaying pinag-adalan ta kun iasignar sa sainda ni Jehova an gibuhon na ipinapagibo Niya sa sato ngunyan!

⁸ Halimbawa, paano kun sinabihan si Abraham na puwede niyang sambahon si Jehova, bako sa mga altar na gibo sa gapo asin nasa kaawagan, kundi sa magayon na mga Kingdom Hall saka darakulang kumbensiyon—kaiba kan organisadong grupo nin mga kapwa parasamba—na diyan detalyadong tinutukar asin ipinapaliwanag an mga panuga na natanaw niya sana “sa harayo”? (Basahon an Hebreo 11:13.) Asin paano kun sinabihan si Elias na an gigibuhon niya bakong an paggadan sa maraot na mga propeta ni Baal mantang pigmamaigutan niyang maglingkod ki Jehova sa irarom kan ­pamamahala nin maraot na apostatang hadi, ­kundi an matuninong na pagbisita sa mga tawo dara an mensahe nin karangahan asin paglaom? Iyo, bako daw na aakuon tulos kan may pagtubod na mga lalaki asin babaying idto an pagkakataon na sambahon si Jehova sa paaging arog kan ginigibo ta ngunyan?

⁹ Kaya padagos tang pakusugon an satong pagtubod paagi sa gibo. Paagi kaiyan, inaarog niyato an halimbawa kan may pagtubod na mga lalaki asin babayi na nasa ipinasabong na Tataramon nin Diyos. Arog kan sinambit sa Introduksiyon, mas mapaparani pa kita sa sainda na garo mga katuod. Pero dai mahahaloy, magigin totoong katuod ta na sinda.

10. Anong kagayagayahan an maeeksperyensiyahan ta sa Paraiso?

¹⁰ Papagdanayon na malinaw sa saimong isip an paglaom. An maimbod na mga lalaki asin babayi pirming nagkukua nin kusog sa paglaom na itinao nin Diyos. Ika iyo man? Halimbawa, imahinaron an kagayagayahan na makaulay an maimbod na mga lingkod nin Diyos pag ‘binuhay na liwat an mga matanos.’ (Basahon an Guibo 24:15.) Ano an mga gusto mong ihapot sa sainda?

11, 12. Sa bagong kinaban, ano an ihahapot mo ki (a) Abel? (b) Noe? (c) Abraham? (d) Rut? (e) Abigail? (f) Ester?

¹¹ Pag nakaulay mo si Abel, gusto mo daw siyang haputon manungod sa mga magurang niya? O puwede mong ihapot: “Kinaulay mo lamang su mga kerubin na nagbabantay sa entrada kan Eden? Ano, nagsimbag sinda?” Kumusta man si Noe? Puwede mong haputon siya: “Natakot ka sa mga Nefilim? Paano mo napakakan sa laog nin sarong taon an gabos na hayop sa arka?” Pag nakaulay mo si Abraham, puwede mong ihapot: “Nakaulay mo si Sem? Siisay an nagtukdo sa saimo dapit ki Jehova? Nadipisilan kang maghali sa Ur?”

¹² Isipon man an gusto mong ihapot sa maimbod na mga babaying binuhay liwat. “Rut, ano an nagpahiro sa saimo na sumamba man ki Jehova?” “Abigail, natakot kang sabihon ki Nabal kun paano mo tinabangan si David?” “Ester, ano an nangyari sa saimo asin ki Mardokeo pagkatapos kan istorya sa Bibliya dapit sa saindo?”

13. (a) Ano an puwedeng ihapot sa saimo kan mga binuhay liwat? (b) Ano an masasabi mo dapit sa paglaom na makaulay an maimbod na mga lalaki asin babayi kan suanoy na mga panahon?

¹³ Siyempre, tibaad dakul man an ihahapot sa saimo kan maimbod na mga lalaki asin babaying idto. Nakakaugma nanggad na iistorya sa sainda an pagtatapos kan huring mga aldaw asin kun paano binendisyunan ni Jehova an mga lingkod niya durante kan masakit na mga panahon! Daing duda na mapapahiro nanggad sindang maaraman kun paano inutob ni Jehova an gabos na panuga niya. Pag-abot kan ­panahon na iyan, dai ta na kaipuhan pang imahinaron an maimbod na mga lingkod nin Diyos sa rekord kan Bibliya. Makakaiba ta na sinda duman sa Paraiso! Kaya padagos na gibuhon an bilog na makakaya mo ngunyan na magin totoo sinda sa saimo. Padagos na arugon an saindang pagtubod. Lugod na mapaglingkudan mo si Jehova kaiba ninda bilang saimong namumutan na mga katuod sagkod lamang!